Get Adobe Flash player
АУ УР "Ӟечбур!"

Укмыс иськемъем колды?..

 Нянез адямиос вашкала дырысен ярато, дунъяло. Азиысь но Европаысь кунъёсын али ке но пурысьтамзэ но нянез куштыны уг лэзё.
 Та сиён адямилы тодмо луиз ог дас сюрс ар талэсь азьло. Туннэ нуналлы тупась нянь, пе, шӧдтэк шорысь кылдэм. Вашкала Египетын улӥсь вуэн сурам пызьзэ шуныт гуре пуктэм но быдэс уйлы отчы вунэтэм. Нош ӵукна адӟем: шуныт интыын возьыса чырсам ыльняньлэсь пыжем сиён, огшоры суретлэсь пыжемезлэсь, трослы ческытгес пӧрмем.
 Туала вакытэ ог кызь пумо паськыт вӧлмем нянь пыжо, нош тодмотэмгес луисьёсыз сюлэсь ятыр.
 Вашкала славянъёс, ӟеглэсь, йыдылэсь, чабейлэсь сяна, изэм тыпы мульылэсь, пушмульылэсь но нянь пыжылӥзы.
  Тужгес бадӟым нянь пыжизы Мексикаысь Акапулько городын 1996-тӥ арын. Солэн кузьдалаез 9 иськем вал.
  «Батон» «палка» француз кыллэсь пӧрмемын, «булка» – полякъёслэн. Римской Папалэн печатез, со нимаськем «Bulla», булка кадь ик котырес вылэм.
«Сайка» пӧрмемын эстон кыллэсь. «Сай» «тӧдьы» шуэмез возьматэ. Ӵапак таӵе нянен герӟаськемын Николай II эксэй кивалтон вакытэ Россиын луэм одӥг тунсыко учыр. Со вакытысь тужгес тодмо булка пыжисьлы Филипповлы генерал-губернатор доры ӝегатскытэк лыктыны косон вуэм. Солэн няньысьтыз уго пыжем таракан шедьтӥллям. Пыжиськись нош амал шедьтэм, «со таракан ӧвӧл, изюм» шуэм но ваньмызлэн син азязы тараканэн нянь юдэсэз сием. Озьы, нокыӵе кылкутон улэ сюрытэк, дораз бертэм но ужасьёсызлы ыльнянь пӧлазы кӧня ке изюм ватсалляны косэм.
  Уйпал Европаысь одӥгаз кунын таӵе калык чакланзы вань: егит ныл но пи, юри малпатэк ке но, одӥг нянь сукыриез (булкалэсь, батонлэсь) быдэн пичи юдэсэн ке но сиыны шедьтӥзы ке – соослы ог-огзэс яратыны но кузпалъяськыны кылдэмын. Таӵе чаклан но вань: ӝӧк вылэ сутӥськем палыныз (корка) понэм нянь умойтэме вуттэ. Озьы ик уродэн лыдъяське одӥг ымтыр нянез сиытэк кельтон. Нош Ымусьтонлы пыжем нянь, пе, ноку но уг пурысьта.
 . Вашкала дыръя узыръёс тӧдьы нянь сиё вылэм, нош куанеръёс – сьӧдзэ. Табере югдур мукет: узыръёс сьӧдзэ быръё, ӟег нянь пӧртэм витаминъёсын узыр угось, нош куанеръёс – тӧдьызэ.
Молдавиын пурысь нянь но пыжо. Отчы патока, тмин но мукет тырметъёс поно, со ческыт но аспӧртэм пӧрме.
 . Нуналлы быдэ асьмеос 9 000 000 колды нянь сииськом. Сомында няньлэсь 90 миллион бутерброд лэсьтыны луоно. Нялтас вераса, бутербродъёслы ог 50% пыжем нянь кошке.

Интернетын бугыръяськиз Надежда Шкляева.

bord