Get Adobe Flash player
Ошибка
  • You use too big image
АУ УР "Ӟечбур!"

Ульчаын жингыртэ "Ураме"

 IMG 2461

«Анна-связисткамы но шонерскем ини», – Раиса Константиновналэн куараез шунды сиос вылтӥ лэйкаса кошкиз кадь. Ноку адӟылымтэ адямиез понна сокем юн шумпотэмез монэ но тылсиятӥз. Шонерскем, озьыен, бурмытскем. Раиса Константиновна Моториналэн вераськон манерез ик аспӧртэм. Котькыӵе учырлы со анекдотъёс, лэчыт веранъёс шедьтэ. Соин но, лэся, та нылкышноен пумиськыны мылкыд карисьёс уг бырыло.
  Таяз учыре пумиськыны кичӧлтон сётӥз Балезино ёросысь Люк гуртысь Фаина Николаевна Наговицына. Телефон пыр герӟаськыны юрттӥз бускелез Анна Ивановна Наговицына, соин ик солы Анна-связистка ним но лякиськиз. «Дядьпилэн одӥг пал урамысьтыз вазисько ке, мукет пал урамаз монэ кыло, микрофон но кулэ ӧвӧл», – сцена вылэ потыса, ӝот-ӝот вазиз со. Анна Ивановна угось вань улонзэ школаын ужамын, Дядьпи (Люк) гуртысьтызы ваньзэ сямен пиналъёсты дышетӥз бере, котькудзэ аслэсьтыз матысь адямизэ кадь мусо каре. «Коркаяз сизьым укноез, ваньмыз сяськаосын ворекъяло. Мурӝолаз ньыль сэрегез ик толлы дасям бакча сиёнъёсын тырмытэмын. Бускельёслэн нылпиоссы но сое туж ярато, дорысьтыз уг ик кошкыло. Толалтэ лымы мунё лэсьтыса кельто азбараз. Киыз солэн котьмалы усто. Мыным мертэтъёс но лэсьтыса ӧз улы, удмурт айшет но дэрем вуттӥз, ӵап ас вылам мертаса вуремын кадь», – тазьы вера со одӥгез дышетэм нылыз но бускелез Фаина Николаевна сярысь. «Вуремын?» – паймеменымы Анна Ивановнаез куспетӥ кариськом. Айшетэз угось куэмлы кельше, озьы пужыятэмын. «Травка» шортлэсь керттэм миндэрзэ со юри Раиса Константиновналы шуыса лэсьтэм, пужыятэм. 
  Дядьпиын ваньмыз сямен киужлы но кырӟаны-вераны устоос уло, шӧдске. Кылбурчиослы но, крезьгурчиослы но уг ёрмо. Ваньзэ асьсэос мылысь-кыдысь лэсьто. Коллективзылы но «Мылысь-кыдысь» ним понӥллям. Юнме шорысь ӧвӧл со. Арганчиенызы валче 11 кенакъёс (ваньзы лыктыны быгатӥллямтэ) мылысь-кыдысь кырӟаса-вераса, ческыт табанен кунояса пумитазы милемды. Арганчизы но нылкышно. Кытысь ке адӟеммы вань кадь шуыса юамлы, серектӥзы гинэ. 1912-тӥ арын «Элькуновидение» ӵошатсконэ пыриськемзы бере, соосты котькытын тодмало угось. Коллективзэс 11 ар талэсь азьло кылдытыкузы, воргоронзы но вал. Вениамин Валерьянович Алексеев соку клубын ужаз, коллективлэсь ужзэ радъяз, баянэн шудылӥз. Нош коллектив кылдытыны кичӧлтон сётӥз Тамара Евгеньевна Волкова. Школаын со физика но математика удысъёсты нуэмын, директорлэсь ужзэ но быдэсъямын. «Школаын дышетскыкумы котькуд праздниклы концерт дасялляськом вал, калыкез шулдыртылӥм. Со мылкыдмы аръёс ортчемъя но ӧз сӥя, – шуэ Тамара Евгеньевна. – Вуриськыны яратӥсько. Сцена вылэ потан дӥсьме ачим вури». Светлана Васильевна но вуриське, таиз историен дышетэм. Валентина Александровна немец кылъя дышетӥсь вылэм, Эмма Семёновна, Тамара Алексеевна покчи классъёсты дышетӥллям. Диана Зосимовна Волкова али но крезьгуръя дышетӥсь луыса ужа. Та коллективе ветлӥсьёс ӝыныез сямен дышетӥсьёс. Тужгес мӧйыез кырӟасьсылы тямыстон вить арес. Арняяз кык пол пумиськыло та кенакъёс. Концертъёсын артысь Кез, Глазов ёросъёсы но вуыло. «Элькуновидениын» соос «Ураме» кырӟанэз быдэстӥзы. Кылъёссэ но крезьгурзэ Диана Зосимовна малпам. «Тӥ та палъёсысь ӧвӧл шат? – юасько. – Ураме шуыса уд вераськиське но, малы кырӟандэс озьы нимады?» Гурак гинэ серектӥзы артистъёс. «Ульча», пе, зол уг чузъяськы, «урам» жингрес кылӥське. Тӥни озьы соос кылъёссэс но чузъяськемзэ чакласа куто. Улмопуэз веракузы нош дугдытӥ. «Тӥ яблок шуиськоды, дыр, ук?» «Ма, литературной кылын вераськыны тыршиськом», – валэктӥзы дышетӥсьёс-артистъёс.

Антонида ЕРМОЛИНА.

bord

"Омга куараослэн" ваньмыз азьпалан ай

 IMG 1308

Удмурт литературая урокын 10-тӥ классын дышетскисьёслы уж сётэмын вал: гуртысь тодмо адямиосын тодматсконо. Пиналъёс «Омга куараос» ансамбльлэсь юалляськыны мылкыд каризы, кивалтӥсезлы Лидия Фроловналы Константиновалы вазиськылӥзы.
Маша Снурницена.
 – Лидия Фроловна, вералэ вал, ку но кызьы кылдӥз ансамбльды? 
 – Кыӵе интыосы вуылӥды ни?
 – Кык ар гинэ ай милемлы, озьы ке но олокытчы но вуылӥм нӥ бигер шаерез уйпалысен кутскыса лымшорозь котыртӥм. Тужгес но данъяськымонэз – кылем гужем Казане Универсиадае ветлӥмы. Гуртамы одӥг ужрад но митэк уг ортчы.
Настя Николаева:
 – Кыӵе ужпумъёс азьпалады сыло но мар бордын тросгес ужаськоды?
 – Нырысь ик вераны кулэ: кытчы ке потаны милям транспортмы ӧвӧл, но гуртмылэн тӧроез Анатолий Владимирович Касьянов вазиськыкумы одно мар ке но шедьтэ, тау солы ваньмыз понна. 
Репертуармес узырмытон понна, али выль кырӟанъёс бордын ужаськом, эктонъёс дасяськом.
 Люда Павлова:
 – Азьланезлы малпанъ-ёсты кыӵеесь?
 – Огинтыямы ум сылӥське, но туж потэ вал удмурт шаере потаммы, милемыз отын ӧз адӟе на. Мукет коллективъёсын тодматскеммы потэ.
 Вика Тимофеева:
 – Лидия Фроловна, коллективды сярысь мар верасалды на?
 – Ми егитэсь ай, ас азямы пуктэм ужпумъёсмы одно мед быдэсмозы. Азьланьын тросгес вормонъёс мед шумпоттозы, коллективамы лыктыны мылкыд карисьёс уката но тросгес мед луозы. 
 Озьы мед луоз. «Омга куараослэн» ваньмыз азьпалан ай.

 

Е.И. Гаврилова.
Сарсак-Омга черкогурт.
Агрыз ёрос, Татарстан.

bord

"Куректонмес но шори люкиськом"

 DSC01279

Завьял ёросысь Выль Казмасысь «Казмас гуръёс» кырӟанъя ансамбль 2009-тӥ арын кылдӥз. Соин Т.П. Бахтигареева кивалтэ, нош баянэн шудэ О.Н. Бимаков.
  – Нина Петровна Никитина, культура юртмылэн директорез, одӥг пол шуиз, бичалэ, пе, коллектив – баянистмы кылдӥз, – ансамбльлэн кылдон сюресэз сярысь вераны кутскиз солэн старостаез Екатерина Аркадьевна Ситникова. – Коллективмы туж умой, эшъяськись. Куке гинэ эн вазиськы, ваньмыз сыӵе ӝог лыкто, вазисько, мыным туж кельше. Адӟиськоды, кыӵе умой выступать каро. Калыкъёслы но яра. Куинь пол лауреат луимы ни. Тыршеммес Данъян грамотаосын, дипломъёсын пусйыло. Пычанкиысь реабилитационной центре, оло, тямыс пол ветлӥмы ини. Можгала, Шарканэ но, Тол бабай доры, вуылӥмы. Котькытын ик учкисьёс шумпотыса пумитало. Ӟуч но удмурт кырӟанъёсты, туала авторъёслэсь но быдэсъяськом. Ваньмы ми пенсионеръёс ни. Даслэсь трос кузя люкаськиськом. Пӧлысьтымы самой бадӟымезлы 72 арес ни вал, но со тазалыкез лябӟемен кошконо луиз. Гуртын пукыны туж секыт, куд-огезлэн семьяоссы но кошкемын. Мон соосты ӧти – огназы мӧзмыса медаз улэ.
  – Но ваньмызлэн кырӟаны быгатонлыксы огкадь ӧвӧл ук?
  – Мон малпасько, мылкыдыз луиз ке, котькудӥз кырӟаны быгатоз.
  – Семьяоссы пумит уг луо-а?
  – Котькыӵеез вань. 
  –Праздникъ-ёсты пусйыны огинэ люкаськылӥськоды, луоз?
  – Котьмармес но ӵош пусйиськом-пумитаськом. Вордскем нуналъёсмес но. Кинлэн ке куректонэз луэ ке, сое но шори люкиськом.
  – Ёросысьтыды коллективъёсын но тодмоесь, дыр?
  – Бен. Тани Лудорвае но ветлӥм. Собере кылем арын мон нылкышноосме буран песянайёс доры нуллӥ. Цирке но, зоопарке но ветлӥмы ни. Ойдолэ, ойдолэ шуисько но, мыно. Жаль, костюмъёсмы пересесь, пӧсьто ни. Соосты выльдыны спонсоръёс шедьтоно вал, но культура удыслы юрттӥсь шедьтыны капчи ӧвӧл.
  Мон ачим 38 ар пудо эмъясь луыса ужай. Пичиысен кырӟасько. Бабино гурт кылдытэтэ пырись Шайтангуртын вордскемын. Дышетсконме быдтэме бере татчы лэзизы но, 31 ар татын улӥсько, пересьми ини.
   Выль Казмасын Раиса Моториналэн книгаеныз тодматскон ӝыт ортчыку валай: «Казмас гуръёс» зэмзэ но асьсэлы синмаськытыны быгато.

bord

Капчи мылкыд кузьмало

  6 9975Пичи Пурга ёросысь Улӥ Посьтол гуртысь «Капчи мылкыд» ансамбле одӥг супер-песятай но сизьым супер-песянайёс ветло. «Мылкыдмес капчи карон понна ик тазьы огазе люкаськылӥськом, — шуо песянайёс. — Кырӟаськом-вераськом но, бӧрдӥськом но, огшоры лабыртыса но пукиськом».
  Сӥзьыл соос куспазы «Супер-песянай» конкурс ортчытӥллям. Ваньзы ик супер-песянайёс луиллям ке но, ёросын ортчоно таӵе ик конкурсэ Тамара Петровна Григорьеваез ыстӥллям. Со гуртсэс но, коллективзэс но возьытэ уз уськыты уго: кыллы но кисыяз уг пыра, кырӟаны-вераны но усто. Нош супер-песятай луиз Терентий Александрович Иванов. Ансамблязы одӥгназ пиосмурт шуыса со уг возьдаськы, котькуд репетицие мыло-кыдо ветлэ.
  «Капчи мылкыдъёслэсь» кырӟаны-вераны быгатэмзэс Иваново-Самарскысь культура юртлэн директорез Ангелина Ивановна Бушкова эскере. Ог-огзылэсь мылкыдъёссэс ӝутон понна, соос арняяз кык пол люкаськыло. Ансамбльзы кылдэм дырысен куать ар ортчем ини. Капчи мылкыдъёссэс кузьманы песянайёс Ижкарысь ӧлексыос доры кык пол ветлӥллям. Нош гурт калыксылэсь мылкыдзэ соос котькуд ужрад дыръя бурдъяны быгато. «Гуртэ, мынам гуртэ» книгалэн презентациез но соостэк ӧз ортчы.

bord

"Асме выльысь пинал кожаны кутскисько"

   Кытын меда «тусоваться» карисько чебер куараё, задор мылкыдо песяйёс? Пичи Пурга черкогуртысь песянай-песятайёс «Азвесь тулкымъёс» ансамбльын мылкыдзэс ӧръяло вылэм. Соин монэ тодматӥз одӥгез жингрес куараё эшсы Елизавета Кирилловна Некрасова.
   – Та ансамбле мон 1993-тӥ арысен ветлыны кутски. Татчы янгышен сюри, шуыны луэ. «Азвесь тулкымъёсы» вуэмелэсь азьло, «Народный хоре» ветлӥсько вал ини. Кыкеныз ик та ансамбльёсын М.М. Бочкарёва кивалтэ вал. Соку «тулкымъёс» фестивале мыныны дасясько вылэм, но сӥзьыл куазьлы луыса, тросэзлэн тазалыксы лябӟем. Соин Мария Михайловна монэ юрттыны ӧтиз. Со дырысен мон кыказ ик хоре ветлыны кутски. Ар ортчыса, «Народный хорез» кельтӥ, аслам огъ-ёзоосы доры гинэ ветлоно кариськи на. Кылем арын хормылы 20 ар тырмиз, сыӵе шумпотӥсько, ансамбль арысь аре синмаськымонгес луэ шуыса. Та хорез Александра Павловна Опарина – небыт сямо, капчи мылкыдо нылкышно – кылдытӥз. Отын нырысь кызь ньыль кузя кырӟасьёс вал, табере дас тямыс гинэ на. Жаляса верано луэ, пиос куинь сяна ӧвӧл, тросгес луысалзы ке, кырӟанъёс эшшо но шулдыргес чузъяськысалзы. 
   – Кыӵе ке тужгес яратоно кырӟанъёсты вань-а?
   – Ваньзэ яратӥськом. Но ӵемгес «Эх, эше тон мынам» кырӟанэз быдэсъяськом, туж сюлме пырись со. Берло дыре вашкалаоссэгес кырӟаны кутским, кылсярысь, «Кытысен мон тыныд синмаськи», «Самовардэ пукты али»…
   – Нош кинъёслы но кытын тӥ кырӟаськоды?
   – Пӧртэм праздникъёс дыръя Пурга сцена вылын калыкез шулдыртӥськом, сьӧр гуртъёсы вуылӥськом. Олокыӵе но фестивальёсы пыриськиськыса, дипломантъёс луиськом. «Встреча с поколениями» ӝытъёсмы туж тунсыко ортчыло. Отчы ми 4—7-тӥ классъёсын дышетскисьёсты ӧтчаськомы. Секыт аръёсы адямиос кызьы-мар улӥзы шуыса соослы возьматыны тыршиськомы. Кылсярысь, асьмеос ик сукыри нянь пыжиськомы, кешырлэсь чай пӧзьтӥськомы. Куэм штаниосты, кутъёсты но мукет вашкала дӥсьёсты возьматъяськомы. Мылкыд карисьёссэ асьмеос ик черсӥськыны, керттӥськыны, куиськыны дышетӥськомы… Нылпиослы туж кельше. Анай-атайзылы веръятыны шуыса, сьӧразы но куро сукыриез. Берло вакытэ со нылпиосты ик ӵыжы-выжыоссылэсь материал бичатӥськом. Ваньзэ люкаса, Быдӟым ожлы 70 ар тырмон азьын нимысьтыз альбом поттыны малпаськом, – мылкыдзэ шараяз Мария Михайловна.
   Кызьы асьсэос шуизы, пумиськылыкумы соос «каникулын» вал, емыш бичан ужен выризы. «Гуртын уж тросэн, ваньмыны туж ик уг луы, соин та вакытэ кырӟаны ум ветлӥське, – вераськонмес азьланьтӥз Елизавета Кирилловна. – Мӧйыослэсь нуналзэс пусъёнлы дасяськонэн мытомы ужмес».
    – Юрт котырын нылкышнолэн ужез уг бырылы. Хоре ветлон трос-а дырдэс басьтэ? Мар со тӥледлы сётэ?
    – Дорын пукон – со туж умойтэм. Гуртысь потатэк, мон малпамъя, туж троссэ ыштӥськом. Кырӟаны ми арняяз кык пол ветлӥськом. Соин ик мон тодӥсько, мае ку лэсьтоно, соин ик ваньзэ быдэстыса вуттӥсько. Тӥни озьы кырӟаны но вуттӥськисько, дорме но уг вунэтӥськы. Малы со мыным кулэ? Татчы ветлыса, ачим ёзо нылкышноосын адӟиськыса-вераськыса, асме выльысь пинал кожаны кутскисько. Угось ми эктӥськом, кырӟаськом, шудӥськом! Нош малпамтэ шорысь ульчаын пумиськиськом ке, шуныт шундыен пумиськем кадь луиськом. Милям коллективмы туж капчи, мыло-кыдо угось.
   – Мар сӥзьысалды эшъ-ёстылы, ансамбльдылы?
   – Эшъёсылы андан кадь юн тазалык, котьку но капчи мылкыдо луон, сюлмо эшъёс, ог-огзэс гажан, нош хормылы азинлык но пќсь кичабонъёс сӥзисько.

Люба Михайлова,
УдГУ-ын дышетскись.

40 3

Ӟеч-а, бур-а, гужеме! (Ив.-Самарск)
Ӟеч-а, бур-а, гужеме! (Ив.-Самарск)

Ми контактын