Get Adobe Flash player
АУ УР "Ӟечбур!"

Пычас гуръёс сюлэме пыӵало

IMG 6148Легезьпу выльысь сяськаяськем на

  Пегаса шудӥсь кадь читыр-чутыр нуись сюрес зарнивуам писпуосыныз уӵерак-уӵерак ворекъяса вуттӥз милемыз Можга ёросысь Удмурт Пычас гуртэ. Вешаськись небыт тӧл но ӟыгыръяса ик пумитаз. Ӧтисько, пе, тӥледыз выжыкыл дуннее. Школае пырон азьын будӥсь легезьпуослэн горд быгыльскем мульыоссы вӧзы лемлет сяськаоссы бычыраллям – гужемен сӥзьыл озьы эшъяськиллям. Пиналъёс но таӵе дыръя школаын пукыны уг ӵыдо. Выльысь усьтӥськем сяськаос кадь вӧлскиллям соос школа азбаре. Пичи ӟусъёс вылэ интыськем пиналъёс доры матэктӥмы но, нош паймон муг сюриӟ пельугыен пияш син шорамы йӧтӥз. Пичи сьӧд чонариез бырттэм со пеляз. «Чонари аслэсьтыз вотэссэ кузь ке нуйтэ, сӥзьылэд кема кыстӥськоз ай», – шуо калыкын. Удмуртлыксэс чылкак вунэтэмын шуыны уг луы пиналъёс сярысь. Пӧлазы «Ӟечбур!» газетэз тодӥсьёссы, лыдӟисьёссы, удмурт сямен вераськисьёссы но вань на. Нош ог ӝыны даур ортчыса, та гожъяме пычасъёслэн син шоразы йӧтӥз ке, 2014-тӥ арын удмурт кылэз тодӥсьёссы но вылӥллям на шуыса уз пайме-а – таӵе малпанэлэсь чонари ортчиз кадь мугортӥм.

 

Ӟучъёсты удмуртомытылӥзы

  Бадӟым городъёслэсь палэнэ интыяськем гуртын, ышыгын улӥсь пиналъёслэн ӟучомем мугзы валантэм. Песянай-песятайёссы чылкак удмуртъёс угось. Азьвыл аръёсы ӟучъёс но удмуртомо вылэм татын. Тани, кылсярысь, Татьяна Петровна Колесникова чылкак ӟуч семьяысь. Вуз карисьын ужась муртлы удмурт кылэз тодэмез юрттылӥз гинэ. Крезьгурез яратонэз вуттӥз сое удмурт коллективе. «Ӝыт тылъёс» фольклор коллективысь котькуд артист сярысь нимысьтыз гожтыны луысал. Ваньзы сямен угось соос, кузь улон сюресэз ортчыса, шӧгзэ но, курытсэ но веръямын. Нош шуг-секытъёсты вормыны, егит мылкыдо улыны юрттэ соослы кырӟан.

 

Мандолина тырмытэк, арганэз но лушкалляз

 «Азьвыл гуртоосмы ваньмыз сямен балалайкаен, мандолинаен шудыны быгато вал, арган берлогес кылдӥз ай, – мылкыдзэ усьтэ Николай Михайлович Михайлов. — Мынам мемие, 1914-тӥ арын вордскем мурт, балалайкаен шудыны туж ӟеч быгатэ вал, агаез фортепьяноен но шудылӥз. Соин но, лэся, мемие мыным балалайка басьтӥз. Гуртомы Иван агай гур пӧрмытэмме шӧдӥз но быгатэмелы шумпотӥз, тыныд, пе, табере мандолинаен шудыны дышетсконо. Ачиз Иван агай та крезьгуро инструментэн туж мыло-кыдо шудэ вал. Балалайкалэн куинь гинэ сиез, нош мандолиналэн – тямыс. Бӧрысьгес ини юмшан пӧлын арган куараос но чузъяськыны ӧдъязы. Коркась корка ветлон куспазы, мон арганзэс басьтыса кошкылӥ. «Нош ик та Колялэн ужез, дыр, ини, шуо вал. Ма, мон быдэс азбар трос кыскасько но, куара чузъяськемъя ик шедьтылӥзы…»
 Николай Михайлович кырӟанъёс но ачиз гожъя. 1980-тӥ аръёсы Ижкарын ортчылӥсь фольклор ӝытъёсын ӵемысь чузъяськылӥзы солэн мандолинаен шудэм улсын быдэстэм кырӟанъёсыз. Али ёросысьтызы коллективъёс пӧлын «Ӝыт тылъёс» мандолинаен шудэменызы висъясько, мукет коллективъёслэн соин шудыны йӧндырисьёссы ӧвӧл.

 «Мынам куме со, котьма ужаны быгатэ, муш но вордэ. Лена нылыз верос-выжыкылъёс гожъя, тодӥськоды, луоз, – тазьы вера Николай Михайлович сярысь мукетыз усточизы Н.Н. Емельянов.

 

Кырӟась кузпалъёс

  Николай Николаевичлэн нимыз лыдӟисьёсмылы ӟеч тодмо. Уно аръёс ӵоже ни со газетэнымы ӟеч кусып возе. Нылпиосыз но газетэ гожъяськыса будӥзы. Таиз артист аспӧртэм луэ кунсьӧр кылъёсты, кырӟанъёсты тодэменыз. Уно аръёс ӵоже со Мельниково школаын историяя но кунсьӧр кылъёсъя дышетӥсь луыса ужамын. Та вакыт пенсиын ни ке но, ассэ дышетӥсь шуыса уг вунэты. Туэ Ижкарын улӥсь нуноксэ 1-тӥ классэ келяса мынӥз но ӟуч пиналъёслы урок ортчытоно кариськиз. «Туж ӟеч пумитазы, шумпотӥ, ява, – вера со ачиз. – Пиналъёс верамъёсме асьсэлэн тетрадьёсазы ик гожъяса кельтӥзы. Табере соос тодозы ни шаерысьтымы усточиосты».
 Николай Николаевичлэн шаерысьтымы усточиослы сӥзем «Тодмо, дано нимъёс уно» книгаез но потэмын.
«Егитгес дыръямы ӵошен кырӟаны туж яратӥськомы вал, – вераськонамы итӥське кузпалыз Валентина Андреевна. – Али тани мылкыдмес буйгатыны «Ӝыт тылъёсы» потаськомы. Вить нылпиосмес быдэ вуттӥмы. Кыкнамылэн ик вордскем гуртъёсмы быремын ини. Кузпалы Можга ёросысь Атас починка гуртын вордскемын. Нош мон – Дэри ёросысь Симанки гуртын. Эрик Батуевлэн мумиз Анна Филипповна милемыз покчи классъёсын дышетӥз. Ачим мон школаын пӧраськись луыса ужай».
 Кырӟаны быгатонлыкъёссэс Емельяновъёс нылпиоссылы, нунокъёссылы но кузьмаллям. Наташа нылзы улонзэ крезьгурен герӟаз, Можгалась «Дубитель» культура юртын ужа.

 

Парта сьӧрысен ик – кырӟанэн

 «Нош ми Николай Михайловен одӥг классын дышетским, – школа аръёсысьтыз ноку кошкылымтэ кадь чырткем нылкышно Галина Александровна Касьянова веранзэ мытӥз. – Школаысен ик туж кырӟаськомы вал ми соин. «Котыр лыз-лыз сяська» кырӟанэз дуэтэн кырӟаса, ёрос смотрын вормылэммы но вань».
 Галина Александровналэн куараез зыл-зыл вӧлске. Артист луыны мылкыд карысалыз ке, одно ик пӧрмытысалыз.

 

Зарни медалез но вань

 Валетина Николаевна Бах-матова туэ сӥзьыл ветеранъёслэн спортъя спартакиадаысьтызы зарни медален бертэм. «Дартс амалэз пичи дыръямы тодэммы но ӧй вал. Огшоры гинэ лэзьясько кадь но, вормись луисько, – шуэ Валентина Николаевна, ветеранъёслэн огазеяськонэнызы кивалтӥсь. – Весь кырӟаса гинэ ум улӥське. Толалтэ ми финской ходьбаен выриськом. Бусы ужъёс дыръя пӧрмеммыя эштосмылы юрттӥськом, субботникъёс лэсьтылӥськом, шайвылэз утялляськом. Тыложе ветлэм ветеранмы одӥг гинэ кылиз на, сое ӟечкыланы туннэ ветлӥмы.
 Вордскемея мон Алнаш ёросысь. Шарипово гуртмы быриз ини. Ужан сюресме Грах ёросын мытӥ вал. Туж потэ сопала вуылэме, Баба-Ягаенызы тодматскысалмы».
 Озьы ик ӝӧк сьӧрын милемыз шулдыртӥзы А.А. Афанасьева, Л.А. Семёнова, В.Д. Кириллова… Азьвыл аръёсы кырӟаны-вераны потасьёслэн лыдзы данаклы тросгес вал. Ӵемысь соос бускель Ува ёросэ но вуылӥзы. Арлы быдэ ортчытъяськись ёрос ӵошатсконъёсы али но пыриськытэк уг кылё.
 «Пичи гуртын бадӟымесь азинсконъёс басьтыны шуггес. Мон ачим Пичи Пурга ёросысь Баграш-Бигра гуртын, Сосновъёслэн семьяязы, вордскемын, – вера «Ӝыт тылъёс» коллективлэн кивалтӥсез Жанна Анатольевна Михайлова. – Гуртамы «Ӝыт тылъёс» коллектив вань, соослы туж синмаськисько вал, соин ик аслэсьтым коллективме но озьы нимаме потӥз. Отын мынам тятяелэн агаез Матвей Иванович Соснов мандолинаен шудылӥз. Выжымы милям кырӟась-верась. Вить агайёсы ик арганэн шудо. Мон кепырасьгес вал. Калык азе потыны кышкалляй, соин но, дыр, библиотекарьлэсь удыссэ бырйи. Лыдӟиськыны туж яратӥсько. Дышетсконме йылпумъяме бере, Удмурт Пычасэ келязы но, тачы ик выжы лэзи ни. Пие Культурая колледжын театральной люкетаз дышетске. Нылы – УдГУ-ысь филология факультетлэн фин люкетаз. Улонэ крезьгур удысэн ик герӟаськиз, клубен кивалтыны оскизы, пичиослы «Домисолька» кружок нуисько. Калык татын капчи, вазиськись. Сӥзьыл бакча ужъёс быро ке, огазе люкаськиськомы ини. Туэ сезон понна нырысьсэ тани люкаськимы».
 «Ӝыт тылъёс» милемлы быдэс концерт возьматӥзы. Инкуазе туспуктыны шуыса потэммы бере но кырӟазы на. Писпуос зарни куаръёсынызы шильыртыса чабизы.

Антонида ЕРМОЛИНА.

Ӟеч-а, бур-а, гужеме! (Ив.-Самарск)
Ӟеч-а, бур-а, гужеме! (Ив.-Самарск)

Ми контактын