Get Adobe Flash player
АУ УР "Ӟечбур!"

"Ми янгыш шат, кужыммы ке бен вань, задормы но уг сӥя бере..."

 42 3Арлыдо муртлэн шутэтскыны потэмез бере ваньмон дырыз йылэ. Кин кызьы радъя сое. Тросэз, калыкен кусыпсэс ыштонтэм понна, выль коллективъёсы вуэ. Отын соос выль киужъёслы дышетско яке огшоры кырӟаса-вераса пуко. Тазьыгес луиз Шор Постол гуртысь арлыдо апайёсын нӧ огазе люкаськыса, соос «Уӵыос» ансамбль кылдытӥзы. Котькуд пумиськонзэс «уӵыос» чидатэк витё.
 Г.З. Юрьева та коллективе кылдэмез дырысен ветлэ. «Нырысь ми огшоры пукыны люкаськылӥм. Милесьтым дырмес пайдаё ортчытъяны тыршиз Н.Л. Хохрякова, собере сое воштӥз Э.М. Шитова. Озьы «Посиделки» клубын кырӟалляса пукылӥмы. Куддыръя гинэ концертэн поталлямы. Быдӟым Вормонлы 60 ар тырмыку, асьме клубын ортчем концертэ, Завьял черкогуртын смотр-конкурсэ но пыриським. Отын милемыз «Соловушки» шуыса ивортӥзы. Нырысьгес ми куать кузя вал ке, табере йылӥм, арганчиен ӵош дас ньылёзь но вуылӥм ни. Ансамбль луэммы бере дэра дэремъёс но шедьтӥмы.
 Нош одӥг пол сюанчиосты шулдыртыны ӧтизы. Кыӵе мон тулкымъяськи соку. Эмеспизы ӟуч, выжыез но ӟуч. Вань кунооссы паймизы, дэра дэремъёсмес киынызы ик исазы-кутылӥзы. Милемлы соку вить сюрс манет уксё сётӥзы», – тодаз вае Галина Захаровна.
 Ансамбль 2002-тӥ арын кылдӥз. Али соин кивалтэ И.О. Петрова. Песянайёс концертъёс сётъяло, фестивальёсы но смотр-конкурсъёсы пыриськыло, кылсярысь, «Роза мира» но «Инме укно» калыккуспо фестивальёсы. Берлоез кык арлы одӥг пол радъяськылэ, со Д.К. Зеленин улосчимылы сӥземын. «2007-тӥ арысен ёросъёстӥгес ветлӥськом. Пӧртэм ужрадъёсын артистъёсмы асьсэлы выль эшъёс шедьто, выль кусып тупато, собере ог-огзы доры куное ветлыло. Эшъёссы пӧлын, кылсярысь, Ижысь «Ӟардон», чугун сюрес вылын ужасьёслэн лулчеберетъя юртысьтызы ансамбльёс, Улӥ Посьтол, Норья, Подшивалово гуртъёсысь песянайёс.
 Репертуарамы кырӟанъёс ӵемгес бырйисько мон, конечно, одно ик дэмен кенешиськом. Асьсэос но ӵекто, таизлы шумпотӥсько гинэ. Концерт ортчем бере ӝӧк сьӧрын пукиськом, мылкыдъёсмес вераськом. Мыным соосын ужаны туж кельше, дыши ни бордазы», – вера Ирина Олеговна.
 Песянайёслэн воргоронъёсты пӧлазы кутэмзы туж потэ. «Гурт кузя но соосты утчаса-ӧтьыса ветлӥмы, – шуэ Галина Захаровна. – Вазенгес Н.С. Соловьёвез но чортӥськом вал, мон, пе, егит ай тӥ пӧлын ветлыны, шуиз. Али тани кузпалэныз ӵош лыктӥзы».
 Та дырозь одӥг гинэ воргоронзы вал. В.Н. Мерзляков кузпалэныз коллективе 2005-тӥ арын вуизы. Вячеслав Николаевич азьвылгес клубын ужамын, гуртлы шуыса сӥзем кырӟанэз но вань. «Сое гимн интые но ӵектылӥзы, котькуд Гырон-быдтонэз соин кутскылӥзы. Берло дыре малы ке вунэтэмын. Кырӟаны яратӥсько бере, пӧлазы вуи. Репетициосы тани костылен но ветлӥсько. Ваньмон дыръям йыртӥянъёсты сэрттыны-пертчыны яратӥсько», – вера Вячеслав Николаевич. Кузпалэныз соос трос пудо вордо вал, табере курегъёссы гинэ кылемын на. Александра Александровна кырӟаны школаын дышетскыкуз ик яратылӥз. Кырӟам улсын керттӥське но, вуриське но. Синмыз лябӟемен, пужыятӥськонлэсь но макрамеен выронлэсь куштӥськем ини. Туж, пе, яратӥсько вал пӧраськыны. Табере, пе, пӧрам сиён но трос уг сииськы ни.
 Коллективзылы 10 ар тырмон юбилейзэс «уӵыос» паськыт пусйизы, со понна юри выль дэремъёс басьтӥзы (клубысь сётэм нырысетӥ костюмъёссэс но асьсэос выльдӥзы-тупатъязы вал). Чеберъяськон арбериос, кышетъёс, чулкаос – артистъёс ваньзэ асьсэос утчало.
 «Уӵыос» пӧлы ветлӥсьтэм арлыдоос та коллективез туж ярато. Бадӟым ужрадын ке соосты уг кыло, соку ик юанзы кылдэ инӥ «Нош малы тӥ туннэ уд кырӟаське ай?» «Эшъёсмы коллективысь кошко ке, ӝожомиськом, выльёсызлы – шумпотӥськом», – шуо песянайёс. Тани берло дыре бордазы итӥськизы Вылӥ Женвайысь В.Б. но А.А. Беловъёс, Л.П. Силина. Вазенгес доразы ӧтизы М.А. Ивановаез. Вить пинал будэтэм анайлэн табере нунокъёсыз котыраз бинисько, соин ик Мария Артемьевна толэзь-кык ветло но дугдо шуэ вал, нош табере празднике сямен дыртэ, одӥг пумиськонзэс но кельтэмез уг поты.
«Ми янгыш шат,
Кужыммы ке бен вань,
Задормы но уг сӥя бере…», –
асьсэлэсь гимнзэс кырӟаса лэзё апайёс. Угось соослэн малпанъёссы трос, тазалыксы гинэ мед луоз. Гурт калыклы но, лулчеберетъя юртлы но асьсэды кулэен лыдъяло на, нош выль пумиськонъёс выль мылкыд кузьмало, огсыр ортчись нуналъёсы яркыт буёлъёс пырто.


"Кузьымгурт кенакъёс", "Пинал сюлэмъёс", "Палэзё сӥзьыл"

 Дышетскон ар кутскемен валче, тӥ, пиналъёс, нош ик пӧртэм кружокъёсы, секциосы, сюлэмады кельшись занятиосы ветлыны кутскиды, вылды. Пужыятскыны, керттӥськыны, суредаськыны, спортэн вырыны но трос-трос мукет ужъёсты быдэсъяны дышетскоды отын.
 Ватсаса тодон-валан басьтыны луонлыкез, зэмзэ но, нокызьы но палэнтоно ӧвӧл, со азьланяз тӥледлы ваньмон дырдэс шонер радъяны, сое пайдаё ортчытъяны юрттоз. Тани, учке ай, анай-атайёсты, песянай-песятайёсты ма гинэ карыны уг быгато. Тӥледлы шуныт носки-пӧзьёс кертто, чильпасько-пужыятско, ческыт пыжисько-пӧрасько. Эшшо соос куспазы тупаса, ог-огзылы юрттыса но огинын кырӟаса-вераса улыны дыр шедьто. Ёросъёсы потакумы ми соосын но пумиськылӥськом. Мӧйыос уго матысь юрттӥсьёсмы: нылпиоссылы, нунокъёссылы гожтыса, газетлэсь лыдӟисьёссэ соос шӧдскымон йылэтыны быгато.
 Алнаш ёросысь Кузьымгурт, Якшур-Бодья ёросысь Мукши, Пермь шаерысь Гожан гуртъёсысь (Куеда ёрос) мӧйыос тани ма но карыны уг быгато вылэм. Котькудаз асьсэлэн ансамбльзы вань. Кузьымгуртын – «Кузьымгурт кенакъёс», Мукшиын – «Палэзё сӥзьыл», Гожанын – «Пинал сюлэмъёс». Ойдолэ вакчияк тодматском соосын.

 "КУЗЬЫМГУРТ  КЕНАКЪЁС"

 

11 MG 2122«Пичи Пурга ёросысь «Гожня кенакъёслэсь» адӟем карыса, ансамбльмес «Кузьымгурт кенакъёс» нимам. Та ним мыным туж чебер потӥз, – шуэ библиотекарьын 30 арлэсь кемагес ини ужась Галина Васильевна Митрофанова, Алнаш ёросысь Кузьымгуртысь ансамбльлэн кивалтӥсез. – «Ветеран» ниманы ӵектӥсьёс вал но, ӧз кельшы, ансамблямы егитъёс но мед ветлозы кадь потӥз. Быдэс гуртэн ужаськом. Котькытчы вуиськом, турлы пумо ужрадъёс ортчытъяськом. Котькуд вирнуналэ люкаськылӥськом. Туэ Литературалэн арез бере, гожъясьёс сярысь но вераськиськом. Г. Мадьяровлэсь, К. Ломагинлэсь книгаоссэс лыдӟим, туж кельшиз. Вераським но соосъя. Ёросэ туж ум потаське, арганчимы ӧвӧл. Кырӟанъёсты асьмелы кельшисьёссэ бырйиськомы. Радиоез кылзӥськом, выль кырӟан потэ ке, ми сое кырӟаськом ни. Кылъёссэ Людмила Матвеевнамы радиоысь кылзыса гожтэ.
 Коллективмы туж ӟеч, котькудӥз сярысь умоен вераны луоно».

Надежда ШКЛЯЕВА.
Алнаш ёрос.

 "ПИНАЛ СЮЛЭМЪЁС"

11 049
«Чебер эн лу, луы шудо,

Шуд со чебер адӟытэ», –
тазьы кырӟало Гожанысь «Пинал сюлэмъёс» ансамбльысь песяйёс. «Ансамблямы дас куинь кузя ветлӥськомы, — веразы соос асьсэ сярысь. — Вашкала но туала удмурт, ӟуч кырӟанъёсты кырӟаськом. Буран бабушъёслэсь англи кырӟанзэс но дышетӥм ни.
Митэк гуртамы одӥг ужрад но уг ортчы. Кытчы ӧтё, отчы ик мынӥськом, палэнэ но потаськом». Ижкарысь зоопаркез адӟыны но ветлӥзы «Пинал сюлэмъёс», нош отысь соосты УдГУ-э, пиналъ-ёсын но студентъёсын пумиськонэ, ӧтчазы.
Шуркынмонэ «Пинал сюлэмъёс» ансамбль кылдэмез дырысен 17 ар тырмонзэ пусъёз. Ӟечкыласьком соосты.

Ольга МОСКВИНА.
Куеда ёрос, Пермь шаер.

 «Палэзё сӥзьыл»

11  MG 1990Мукшись мӧйыослэн коллективзылы туэ 20 ар тырмем ини. Нырысь соос огшоры гинэ люкаськылӥллям. «Рябиновая осень» кырӟанэз кылыса малпаськонэ усиллям, малы, пе, та дырозь нимтэк улӥськом? Кырӟанлэн нимыз туж ярам: сӥзьыл емышъёсын узыр, нош арлыдоос – улонэз адӟеменызы. Озьы соос «Палэзё сӥзьыл» луиллям. Тросэз кырӟанъёссы Римма Ивановна Шкляеваен гожтэмын, кылсярысь, берло дыре удмурт радиоын ӵем гинэ чузъяське солэн «Сизьым сюресъёс» кырӟанэз. «Арлэн кырӟанэз» ӵошатсконын со понна уно кылзӥсьёс дурбасьтӥзы.

Эльвира СИМАКОВА.
Якшур-Бодья ёрос.

Телефон пыр кырӟаны но, сяськаос вӧзын кӧлыны но соос дасесь

 ndA1 YQ1EbkМожга тракт вылтӥ ортчыку, Завьял ёросысь Вуколуд гуртысь чебер пичи юрт син шоры йӧтэ. Мыло-кыдо песянайёслэн Пукон корказы, пе, со. Киужъёсын, выж лёгетъёсын шулдыртӥллям соос сэрегзэс. Кырӟало-верало, киужен выро, куно пумитало песянайёс та юртазы. 2000-тӥ арын «Вуколуд кенакъёс» ансамбль кылдытӥллям, нош люкаськылыны нимаз интызы вылымтэ.
 Коркалы кузё кариськыны оскизы С.А. Зайцевалы. Куамын ар ӵоже со покчиосты дышетӥз. «Коркамылы бугро кузьмаз В.С. Малышев, – шуиз Светлана Афанасьевна. – Пушсэ асьме кужымен лэсьтӥм. Гурзэ картэным ӵош шуккыны вырим. Люкаськылӥськом, пукиськом, нылкышноосмы кошкыны но уг ӵыдо. Ачим но валес котырме ке вайысал, оло, ӧй ни бертылысал. Коркамы сыӵе шулдыр потэ».
 «Корка пуктыны инты висъямез понна, Михаил Ильич Четкарёвлы музъемозь йыбырттэм потэ», – мылкыдзэ шарая Е.И. Косарева. «Кыӵе мон крутой бабка» шуыса, буям гижыоссэ пумен возьматэ: «Внучкае универын дышетске. Алигес тани дорам вуылӥз. Аслэсьтыз гижыоссэ буян сямен, мынэсьтымзэ но чеберъяз.
 Коллективе мон кылдэмез дырысен ветлӥсько. Кырӟаны туж яратӥсько, Инмар мылкыд сётэм, дыр.
2000-тӥ арын пенсие потӥ. Соку ик Екатерина Павловна Малышева, интыысь депутат, милемыз концерт дасяны ӝутказ. Нырысетӥ концертмы Бадӟым Веньялан вал. Со ик луиз ансамбльлэн кылдонэз».
 К.Ф. Малышева кенакъёс борды берлогес итӥськем. «Пиосмуртъёс ведь ваньзы огкадесь ӧвӧл. Нырысь картэ ӧз лэзьы вал, али «мын, мон тонэ уг кутӥськы», шуэ. Мон сое ассэ ӧтисько пӧламы. «Ойдо, Витя, ӵош кутскыса кырӟалом», – шуисько. Туж шулдыр куараез солэн. «Когда весна придёт не знаю…» кырӟанэз Е.П. Малышевалэн вордӥськем нуналаз быдэстӥз но – Екатерина Павловналэн картэз синвуоссэ ик возь-ыны ӧз быгаты. Кузпалэным ӵош кырӟаме туж потэ вылэм но, мылкыдыз ӧвӧл. Дорам кырӟасько но, эктӥсько но. Озьы висён но кошке кадь йӧтэ. Та Пукон коркамес усьтыку, больницаын кыллисько вал. «Клава, та выль кырӟанмылэн гурез кызьы вал ай?» – жингыртыса ик юазы огпол. Телефон пыр кырӟаса возьматӥ. Эмсузэр ӧсэз ик усьтыса кылзӥз, туж, пе, шулдыр кырӟаськод».
 Кырӟанъёсты сяна, Клавдия Фёдоровна сяськаосты туж яратэ. «Кытчы ке вуисько ке, садъёсты соку ик учкылӥсько, – шуэ со. – Одӥг пол сяськаосме туж берозь ури. Картэ шуэ: «Сяськаосыд вӧзын ик изь ни, мар корка пыралод на».
М.Н. Малышева но огинтыяз пукыны уг чида. 2008-тӥ арын «Деревенька моя. Вуколудэ мынам» нимо книга поттӥз. «Котькуд гуртлэн ачиз сярысь книгаез вань шуыса вожъяськи, лэся. Малы меда дышетскем адямиос уг гожто шуыса малпалляй», – шуэ песянай. Маргарита Николаевна дас ар ветлӥз та ансамбле, табере тазалыке ӧвӧл, шуэ. Эшеныз Н.С. Малышеваен совхозын ужан вакытазы но уйлы гинэ люкиськылӥськом, пе, вал. «Куштэм кут кадь огнам улӥсько», – шуэ ке но эшез, пукон корка соосты матэ каре. «Нина Семёновна пинал дырысеныз дугдылытэк гожъяське. Мон доры но гожъяськон огвакытлы кожаз. Малпамтэ шорысь ортчем улонэ сярысь тодэ ваёнъёсы, кылбур чуръёсы вордӥськыны кутскизы. Нина ик ужъёсме ёрос газетамы но «Ашальчи» журналын печатланы сюлмаськиз», – лачмыт гинэ ивортӥз улонэз адӟем нылкышно.
 Ангелина Степановна Ивановаез кык ар талэсь азьло кенакъёс пӧлазы кыскизы. «Татын эшъёсын пумиськем, вераськем потэ. Ёрос центрысь ӧнерчиосын ӵош мунёос но лэсьтӥмы ни. Татьяна Александровна Коротаева вилкаен шаль керттыны дышетӥз», – маде нылкышно.
«Интернет пыр фин амалэн ветлонэн тодматским. Табере ӝытлы быдэ вить-куать кузя люкаськиськом но куас бодыосын ветлӥськом, – тодматсконмес азьланьтӥз Екатерина Викторовна Кондратьева. – Милям куноосмы но луыло. Совхознойысь ветло, администрациысь. Котькуд люкаськонамы кин ке но вуылэ».
 «Вуколуд кенакъёс» Дэриысь «Мӧзмон» клубен эшъясько. Пукон корказы егитъёс но кыстӥськозы шуыса оско. Ӝоген татын нылпиослы кружокъёс ужаны кутскозы, берлогес, оло, доразы нылпиен пукись анайёс но куриськозы. Светлана Афанасьевналэн ужаны мылкыдыз но, азьланезлы малпанъ-ёсыз но вань. Ачиз верамъя, одӥг-ог, йыртэмась кадь, кылбур но гожтоз, кулэ ке луиз, кырӟанэз но удмурт кылэ берыктоз.

Эльвира СИМАКОВА.
Дэри ёрос.

Пычас гуръёс сюлэме пыӵало

IMG 6148Легезьпу выльысь сяськаяськем на

  Пегаса шудӥсь кадь читыр-чутыр нуись сюрес зарнивуам писпуосыныз уӵерак-уӵерак ворекъяса вуттӥз милемыз Можга ёросысь Удмурт Пычас гуртэ. Вешаськись небыт тӧл но ӟыгыръяса ик пумитаз. Ӧтисько, пе, тӥледыз выжыкыл дуннее. Школае пырон азьын будӥсь легезьпуослэн горд быгыльскем мульыоссы вӧзы лемлет сяськаоссы бычыраллям – гужемен сӥзьыл озьы эшъяськиллям. Пиналъёс но таӵе дыръя школаын пукыны уг ӵыдо. Выльысь усьтӥськем сяськаос кадь вӧлскиллям соос школа азбаре. Пичи ӟусъёс вылэ интыськем пиналъёс доры матэктӥмы но, нош паймон муг сюриӟ пельугыен пияш син шорамы йӧтӥз. Пичи сьӧд чонариез бырттэм со пеляз. «Чонари аслэсьтыз вотэссэ кузь ке нуйтэ, сӥзьылэд кема кыстӥськоз ай», – шуо калыкын. Удмуртлыксэс чылкак вунэтэмын шуыны уг луы пиналъёс сярысь. Пӧлазы «Ӟечбур!» газетэз тодӥсьёссы, лыдӟисьёссы, удмурт сямен вераськисьёссы но вань на. Нош ог ӝыны даур ортчыса, та гожъяме пычасъёслэн син шоразы йӧтӥз ке, 2014-тӥ арын удмурт кылэз тодӥсьёссы но вылӥллям на шуыса уз пайме-а – таӵе малпанэлэсь чонари ортчиз кадь мугортӥм.

 

Ӟучъёсты удмуртомытылӥзы

  Бадӟым городъёслэсь палэнэ интыяськем гуртын, ышыгын улӥсь пиналъёслэн ӟучомем мугзы валантэм. Песянай-песятайёссы чылкак удмуртъёс угось. Азьвыл аръёсы ӟучъёс но удмуртомо вылэм татын. Тани, кылсярысь, Татьяна Петровна Колесникова чылкак ӟуч семьяысь. Вуз карисьын ужась муртлы удмурт кылэз тодэмез юрттылӥз гинэ. Крезьгурез яратонэз вуттӥз сое удмурт коллективе. «Ӝыт тылъёс» фольклор коллективысь котькуд артист сярысь нимысьтыз гожтыны луысал. Ваньзы сямен угось соос, кузь улон сюресэз ортчыса, шӧгзэ но, курытсэ но веръямын. Нош шуг-секытъёсты вормыны, егит мылкыдо улыны юрттэ соослы кырӟан.

 

Мандолина тырмытэк, арганэз но лушкалляз

 «Азьвыл гуртоосмы ваньмыз сямен балалайкаен, мандолинаен шудыны быгато вал, арган берлогес кылдӥз ай, – мылкыдзэ усьтэ Николай Михайлович Михайлов. — Мынам мемие, 1914-тӥ арын вордскем мурт, балалайкаен шудыны туж ӟеч быгатэ вал, агаез фортепьяноен но шудылӥз. Соин но, лэся, мемие мыным балалайка басьтӥз. Гуртомы Иван агай гур пӧрмытэмме шӧдӥз но быгатэмелы шумпотӥз, тыныд, пе, табере мандолинаен шудыны дышетсконо. Ачиз Иван агай та крезьгуро инструментэн туж мыло-кыдо шудэ вал. Балалайкалэн куинь гинэ сиез, нош мандолиналэн – тямыс. Бӧрысьгес ини юмшан пӧлын арган куараос но чузъяськыны ӧдъязы. Коркась корка ветлон куспазы, мон арганзэс басьтыса кошкылӥ. «Нош ик та Колялэн ужез, дыр, ини, шуо вал. Ма, мон быдэс азбар трос кыскасько но, куара чузъяськемъя ик шедьтылӥзы…»
 Николай Михайлович кырӟанъёс но ачиз гожъя. 1980-тӥ аръёсы Ижкарын ортчылӥсь фольклор ӝытъёсын ӵемысь чузъяськылӥзы солэн мандолинаен шудэм улсын быдэстэм кырӟанъёсыз. Али ёросысьтызы коллективъёс пӧлын «Ӝыт тылъёс» мандолинаен шудэменызы висъясько, мукет коллективъёслэн соин шудыны йӧндырисьёссы ӧвӧл.

 «Мынам куме со, котьма ужаны быгатэ, муш но вордэ. Лена нылыз верос-выжыкылъёс гожъя, тодӥськоды, луоз, – тазьы вера Николай Михайлович сярысь мукетыз усточизы Н.Н. Емельянов.

 

Кырӟась кузпалъёс

  Николай Николаевичлэн нимыз лыдӟисьёсмылы ӟеч тодмо. Уно аръёс ӵоже ни со газетэнымы ӟеч кусып возе. Нылпиосыз но газетэ гожъяськыса будӥзы. Таиз артист аспӧртэм луэ кунсьӧр кылъёсты, кырӟанъёсты тодэменыз. Уно аръёс ӵоже со Мельниково школаын историяя но кунсьӧр кылъёсъя дышетӥсь луыса ужамын. Та вакыт пенсиын ни ке но, ассэ дышетӥсь шуыса уг вунэты. Туэ Ижкарын улӥсь нуноксэ 1-тӥ классэ келяса мынӥз но ӟуч пиналъёслы урок ортчытоно кариськиз. «Туж ӟеч пумитазы, шумпотӥ, ява, – вера со ачиз. – Пиналъёс верамъёсме асьсэлэн тетрадьёсазы ик гожъяса кельтӥзы. Табере соос тодозы ни шаерысьтымы усточиосты».
 Николай Николаевичлэн шаерысьтымы усточиослы сӥзем «Тодмо, дано нимъёс уно» книгаез но потэмын.
«Егитгес дыръямы ӵошен кырӟаны туж яратӥськомы вал, – вераськонамы итӥське кузпалыз Валентина Андреевна. – Али тани мылкыдмес буйгатыны «Ӝыт тылъёсы» потаськомы. Вить нылпиосмес быдэ вуттӥмы. Кыкнамылэн ик вордскем гуртъёсмы быремын ини. Кузпалы Можга ёросысь Атас починка гуртын вордскемын. Нош мон – Дэри ёросысь Симанки гуртын. Эрик Батуевлэн мумиз Анна Филипповна милемыз покчи классъёсын дышетӥз. Ачим мон школаын пӧраськись луыса ужай».
 Кырӟаны быгатонлыкъёссэс Емельяновъёс нылпиоссылы, нунокъёссылы но кузьмаллям. Наташа нылзы улонзэ крезьгурен герӟаз, Можгалась «Дубитель» культура юртын ужа.

 

Парта сьӧрысен ик – кырӟанэн

 «Нош ми Николай Михайловен одӥг классын дышетским, – школа аръёсысьтыз ноку кошкылымтэ кадь чырткем нылкышно Галина Александровна Касьянова веранзэ мытӥз. – Школаысен ик туж кырӟаськомы вал ми соин. «Котыр лыз-лыз сяська» кырӟанэз дуэтэн кырӟаса, ёрос смотрын вормылэммы но вань».
 Галина Александровналэн куараез зыл-зыл вӧлске. Артист луыны мылкыд карысалыз ке, одно ик пӧрмытысалыз.

 

Зарни медалез но вань

 Валетина Николаевна Бах-матова туэ сӥзьыл ветеранъёслэн спортъя спартакиадаысьтызы зарни медален бертэм. «Дартс амалэз пичи дыръямы тодэммы но ӧй вал. Огшоры гинэ лэзьясько кадь но, вормись луисько, – шуэ Валентина Николаевна, ветеранъёслэн огазеяськонэнызы кивалтӥсь. – Весь кырӟаса гинэ ум улӥське. Толалтэ ми финской ходьбаен выриськом. Бусы ужъёс дыръя пӧрмеммыя эштосмылы юрттӥськом, субботникъёс лэсьтылӥськом, шайвылэз утялляськом. Тыложе ветлэм ветеранмы одӥг гинэ кылиз на, сое ӟечкыланы туннэ ветлӥмы.
 Вордскемея мон Алнаш ёросысь. Шарипово гуртмы быриз ини. Ужан сюресме Грах ёросын мытӥ вал. Туж потэ сопала вуылэме, Баба-Ягаенызы тодматскысалмы».
 Озьы ик ӝӧк сьӧрын милемыз шулдыртӥзы А.А. Афанасьева, Л.А. Семёнова, В.Д. Кириллова… Азьвыл аръёсы кырӟаны-вераны потасьёслэн лыдзы данаклы тросгес вал. Ӵемысь соос бускель Ува ёросэ но вуылӥзы. Арлы быдэ ортчытъяськись ёрос ӵошатсконъёсы али но пыриськытэк уг кылё.
 «Пичи гуртын бадӟымесь азинсконъёс басьтыны шуггес. Мон ачим Пичи Пурга ёросысь Баграш-Бигра гуртын, Сосновъёслэн семьяязы, вордскемын, – вера «Ӝыт тылъёс» коллективлэн кивалтӥсез Жанна Анатольевна Михайлова. – Гуртамы «Ӝыт тылъёс» коллектив вань, соослы туж синмаськисько вал, соин ик аслэсьтым коллективме но озьы нимаме потӥз. Отын мынам тятяелэн агаез Матвей Иванович Соснов мандолинаен шудылӥз. Выжымы милям кырӟась-верась. Вить агайёсы ик арганэн шудо. Мон кепырасьгес вал. Калык азе потыны кышкалляй, соин но, дыр, библиотекарьлэсь удыссэ бырйи. Лыдӟиськыны туж яратӥсько. Дышетсконме йылпумъяме бере, Удмурт Пычасэ келязы но, тачы ик выжы лэзи ни. Пие Культурая колледжын театральной люкетаз дышетске. Нылы – УдГУ-ысь филология факультетлэн фин люкетаз. Улонэ крезьгур удысэн ик герӟаськиз, клубен кивалтыны оскизы, пичиослы «Домисолька» кружок нуисько. Калык татын капчи, вазиськись. Сӥзьыл бакча ужъёс быро ке, огазе люкаськиськомы ини. Туэ сезон понна нырысьсэ тани люкаськимы».
 «Ӝыт тылъёс» милемлы быдэс концерт возьматӥзы. Инкуазе туспуктыны шуыса потэммы бере но кырӟазы на. Писпуос зарни куаръёсынызы шильыртыса чабизы.

Антонида ЕРМОЛИНА.

Киужен вырыны кутскиське ке, дыдые бызьыса дорам лыктэ

 Котькуд вирнуналэ гуртысьтымы нылкышноос школаямы интыяськем лулчеберетъя юртын ужась «Пукон корка» клубазы люкаськыло. Киужлы усточиос отын керттӥсько-пужыятӥсько, кельшем пужыосты ог-огзылэсь асэсто, азьвыл тодымтэ-адӟымтэзэ асьсэлы усьто. Малы базаре ветлонэз, куке троссэ арбериосты ас киосыныд лэсьтыны но соосты дуно адямиосыдлы кузьманы луэ бере? Мылкыддэ но сюлэм шуныттэ гинэ пононо. Турлы буёло бугоръёс но сӥньысъёс син азьын улӟо. Ужан но пӧсь чай юон висказы кылэм-адӟемзэс ог-огзылы мадё, пӧран амалъёсынызы тодматско, шулдыр удмурт гуръёсты нёжъяло. Та чупрес нылкышноослэн чеберез валамзы, сое калык пӧлы вуттыны быгатэмзы данъяськон но шумпотон мылкыдэз пуромытэ.
 – Анай кылмес, сям-йылолъёсмес дышетон-тодон мылкыд нылпиослы пичиысен ик пыӵатыны сюлмаськонӧ черсон, пӧлэстӥськон, пужыятскон но чильпаськон ужъёсты мед тодозы, асьсэлэн но та чеберлык дуннеен эшъяськыны мылкыдзы мед пуромоз, – шуэ усточи Людмила Афанасьевна Петрова. – Киужен вырыны кутскисько ке, дыдые бызьыса дорам лыктэ, ма но со карыны юрттэмъяське, черсме бергатэ, веньёсме поттылэ… Тазьы ӵош кариськыса киужен вырон удмурт кырӟанъёсты дышетыны, пиналъёсты пичиысен уж борды кыстӥськытыны ӟеч луонлык сётэ.
 – Нош ку кутскиз киужен тунсыкъяськонды? Маин со тӥледыз ас бордаз кыске?
 – Пичи дырысеным тодмо. Туж шунытэн тодам вайисько гуртысьтымы кибашлы нылкышноез, лякыт сямо Семёнова Нинапаез но солэсь киужъёссэ: синмаськымон чебер пужыё миндэр пуйыоссэ, шуныт пӧзьёссэ, ковёръёссэ, сандык, пукон вылэ керттэм шобретъёссэ. Соос синме мальдытыса, сюлэмме ик чепыльтыса, выжыкыл дуннее вуттылӥзы. Кышетэ керттылэм турлы буёло сӥньысъёсызлы нош кыӵе паймылӥ! Со аръёсы угось магазинысь басьтыны-шедьтыны соосыз туж секыт вал. Пужыятсконэн вырыны ӝутӥськем мылкыдме валаз, лэся, шырыт сямо Нинапай, сӥньысъёссэ мыным но сётӥз. Со ик луиз пужыятскон-чильпаськон борды кутскеме. Табере нунал потэм соин вырисько.
 – Берло дыре кыӵе киужъёсын выриськоды?
 – Куинь ар талэсь азьло керттэм шальлы синмаськи. Мылкыды вормиз. Табере ачим но керттӥсько но матысь адямиосылы кузьмасько.
Небыт сюлэмо, котькыӵе ужлы кибашлы нылкышно «Тӧдьы юсь» ансамбльлэн ужаз но мылысь-кыдысь пыриське. Кырӟась-верась эшъёсыныз ӵош соос пӧртэм ужрадъёсты, синмаськымон адямиосын пумиськон ӝытъёсты, юбилейёсты шулдырто.
 Вӧзамы таӵе адямиос вань дыръя, анай кылмы, пыдэстэм узыр калык культурамы будоз но пушъёз.

 

Пётр ДАВЫДОВ,
Завьял ёрос.

bord

Норья Батыръёс
Норья Батыръёс

Ми контактын