Get Adobe Flash player
АУ УР "Ӟечбур!"

Бадӟымез пичиысен башла

12-1-1 Та пияшез кыдёкысен синйылтод. Шундылэсь туссэ гинэ ӧвӧл, сямзэ но со басьтэм, шӧдске. Соин но, вылды, Мирослав котыре эшъёсыз люкасько. Со угось нылъёсын но, пиосын но капчиен огкыл шедьтыны быгатэ. Мирослав Паркутдиновен Ижкарысь Кузебай Герд нимо гимназиысен тодматскимы.
– Удмурт литератураез яратӥсько, соин та предметъя кужымме эскерыны малпай, – мылкыдзэ усьтэ со. Удмурт писательёс пӧлысь тужгес яратоноосыз – Фатых Пукроков но Михаил Петров. «Италмас» поэма туж кельшиз, ачим но кылбураны йӧндырисько. Фатых Пукроков – со милям аспалмы, соин но, дыр, солэн малпанъёсыз мыным матын пото. Ачим мон Башкортостанысь Калтасы ёросысь Бадӟым Качак гуртын улӥсько, дышетскисько 9-тӥ классын. Удмурт кылъя сяна, географияя, биологияя, литературая, англи кылъя олимпиадаосы пыриськылӥ. Ижкаре олимпиадае нырысьсэ лыктӥ. Мылкыд туж шулдыр кылиз, трос выльзэ тодӥ, адӟи, ӟеч адямиосын тодматски. Вуоно арын но одно ик лыкто шуыса малпасько.
«5»-лы гинэ уг дышетскиськы, «4»-сы но луыло. Спортэз но мон туж яратӥсько. Бызьылонъя, волейболэн шудонъя ёрос но элькун ӵошатсконъёсы пыриськылӥсько. Бадӟым вормонъёсы ӧвӧл на, нош пичи вормонъёсы трос ини. Бадӟымез пичиысен башла ук.
– Котькыӵе удыс капчиен сётӥське бере, вуоно профессидэ бырйыны секыт йӧтоз, дыр, яке тодӥськод ни-а азьланяз кыӵе удыс бырйыны?
– Трос удысъёсы монэ кыске. Врач нолуэме потэ… Берло дыре журналис-тикаен мургес тунсыкъяськыны ӧдъяй. Малпаськыны дыры вань на.
– Семьяяды эмъясьёсты вань-а, кытысь потӥз врач луон мылкыдыд?
– Анае, Салима Паркутдинова, гуртын фельдшер луыса ужа, нош атае – мушкась. Кык апайёсы но агае будэмын, кошкемын ни. Мон гуртын анай-атаелы огнам юрттӥсько. Ваньмон дыръям трос лыдӟиськисько. Кунсьӧр писательёс Рэй Брэдбери, Джоан Роулинг, Стивен Кинг но трос мукетъёсыз кельшо. Ӟуч писательёс пӧлын тужгес яратоноосыз: Антон Чехов, Николай Гоголь но Сергей Есенин.
– «Усточикар» лагерьын шутэтскылӥд ни-а?
– Кылем гужем «Лидеръёслэн» группаязы ветлӥ. Лагерьын туж тунсыко вал, котькуд нунал мар ке вылезлы дышетским, адямилэсь пуш дуннезэ мургес валаны кутски. Удмуртиысь но нылпиос отчы вуылӥзы. «Усточикар» трос зэмос эшъёс кузьмаз. Дуннеын эшъёстэк уд улы. Соос котьку юрттозы но валалозы.

Антонида ЕРМОЛИНА.

Нош ик "Быдӟым Паска" конкурс

Шӧдыса-валаса но ум вуттэ, липет вылъёсы тол ӵоже люкаськем лымы ӟузырась шапыкъёслы пӧрмытскоз но жильыртыса-гурласа шуръёсы но тыметъёсы дыртоз. Шырчикъёс шулдыр гурзэс мытозы, писпуос вожектозы, нырысетӥ сяськаос усьтӥськозы… Нош солэсь азьлогес ай вуоз Быдӟым Паска…
Озьыен, дыр вуиз солы дасяськыны: корка миськыны, выль дэрем вурыны, курегпузэз буян амалъёсын, кулич пыжон рецептъёсын, сям-йылолъёсын тодматскыны, нош милемлы, редакциын ужасьёслы но «Удмурт Кенеш» огазеяськонлэн ёзчиосызлы, – «Быдӟым Паска» конкурсэз ялыны. Ужъёстэс витём куинь номинациосъя.

1. «Паска азьын кузьмам шумпотон». Таяз номинацие пыриськисьёс кыӵе ке ӟеч уж лэсьтыны: кинлы ке но юрттыны (шуге-леке шедем пӧйшуръёслы но), огназы улӥсь пересьёсты, секыт югдуре шедем семьяосысь нылпиосты маин ке шумпоттыны но со сярысь редакцие гожтыны кулэ.

2. Кылем арын «Паскалы – выль дэрем» номинация лыдӟисьёсмылы кельшиз вал, отчы пыриськыны мылкыд карисьёс трос луизы, соин ик сое туэ но азьланьтыны малпам. Та номинацияя пиналъёс дэрем вурыны кулэ. 7–11 аресъемъёс – мунёлы, 12–14 аресъемъёс мунёлы яке сузэр-вынзылы, 15–17 аресъемъёс асьсэлы яке сузэр-вынзылы. (Технология урокын яке бадӟымъёс юрттэм улсын вуремын ке со, озьы ик пусъёно.)

3. «Паска – суредасьёслэн но кылбурчиослэн синмынызы».
Суреданы яратӥсьёс А4 быдӟалаё альбом лист вылэ лэсьтыны кулэ суредзэс. А3 яке А 5 быдӟалаё ужъёсты, огшоры тетрадь лист вылэ суредамъёссэ лыдэ ум басьтэ.
Кылбурчиослы нокыӵе могӟетъёс ӧвӧл, темаез гинэ умой мед усьтозы.
1-тӥ но 3-тӥ номинациосы пыриськисьёслэсь ужъёссэс дунъялом, 6–10, 11–14, 15–17 арлыдзэс лыдэ басьтыса. Ужъёсты кутомы 15-тӥ оштолэзёзь, конкурслы йылпумъян лэсьтомы 20-тӥ оштолэзе потоно номерын.
Котькуд номинацияя быдэн куинь (котькуд арлыдъя – быдэн одӥг) вормись-ёсты, котьку сямен ик, дипломъёсын но синпель кузьымъёсын пусъём. 2–3-тӥ интыосы потэмъёс диплом басьтозы.
Ужъёсынызы шумпоттыны быгатозы мӧйыос но.

Басма кесэгъёслэсь – газет яке книга

Мар гинэ пӧрмытыны уг луы басма кесэгъёслэсь! Шуом, мунёлы сумка, шобрет, 8-тӥ Мартлы кузьымъёс-прихваткаос, вуриськисьлы кулэ луись чыры-пырыосты, пӧртэм йырси тэчетъёсты возён косметичка… Эшшо вурыны луэ на… пичи нылпиослы аспӧртэм «книга»! Ӵапак таӵе киуж кылдытыны ӵектӥськом ми тӥледлы 1-тӥ инвожолы – Нылпиосты утён нуналлы. Нош тужгес быгатӥсьёсызлы, котькуд выль уж борды саесъёссэс пужалляса басьтӥськисьёсызлы, чибори басма кесэгъёслэсь «Ӟечбур!» газетлы укшась лякиё шобрет вурыны дэмласькомы. Отын мед луозы «туспуктэмъёсыз» но, «суредъёсыз» но, «йыртӥянъёсыз» но, «гожъямъёсыз» но. Кызьы, кыӵе амалэн тӥ сое быдэстоды – фломастерен, маркерен гожъяса-а, гожъямо басма юдэсъёс шедьтыса-а, оло нош тӧдьы вылэ пӧртэм буёло басма юдэсъёсты вурӟылыса-а – соиз ини тӥляд фантазиды. Конкурсэ пыриськыны быгато нимаз пиналъёс но, кӧня ке кузя но:
– 10–14 аресъемъёс;
– 15–17 аресъемъёс.
– 18 но солэсь бадӟым арлыдоос.
Газетлы укшась-а аспӧртэм лякиё шобрет, книга кылдытӥсьёс «Айкай» ансамбльлэсь концертсэ дунтэк учкыны быгатозы.
Озьыен, ялӥськом «Басма кесэгъёслэсь – газет яке книга» конкурс.
Котькуд номинацияя луозы быдэн куинь вормисьёс (коллективен быдэстэм уж понна сётӥськоз одӥг кузьым но одӥг дип-лом).

Басма кесэгъёслы кулэяськисьёс редакцие вазиське.

"8-тӥ Мартлы - басмалэсь сумка"

S6302665Жагкуянниос котырысь бусыосын но отчы нуись сюресъёс вӧзын лошъяськись корт банкаосты, пияла но пластик посудаосты адӟылэмды вань, луоз. Соосты пуныос, тылобурдоос пазяло, тӧл эшшо но пасьтана вӧлдэ. Кырсёмытэм музъеммы шоры учкыса, сюлэм вӧсь луэ. Кызьы ке воштыны быгатом-а асьмеос та югдурез? Оло, магазинысь басьяськемъёсмес асьме киосынымы вурем сумкаен нуллыса! Басмалэсь вурем арбери угось кема чида. Ма, собере вань сюлэм шунытэз, ӟеч мылкыдэз поныса вурем арбериез зӥртыны ки ӝутӥськоз шат? Ойдолэ, гажано лыдӟисьёсмы, мӧйыос но, пиналъёс но, вуриськемлэсь кылем басма кесэгъёслэсь, кылем-мылем дӥсьёслэсь чебересь сумкаос вуромы но анайёсмылы, песянайёсмылы, дышетӥсьёсмылы но гуртоосмылы, мынӥсь-ветлӥсьёслы кузьмаломы – медаз ветлэ магазинэ полиэтилен пакетъёсын!
Озьы асьмеос «кык кечез» кутомы: экологиез утёнэ асьмелэсь пичильтык «шапыкмес» ватсаломы но нылкышноослы 8-тӥ Март азьын ӟеч мылкыд кузьмаломы. Кузьымлы угось пичиез но, бадӟымез но шумпотэ. Шумпотон басьтэ ачиз кузьмаськись но. Нимысьтыз вазиськиськом тӥледлы, технологияя дышетӥсьёс, тӥляд угось нылпиосты ӝутканы-бурдъяны, та ужез ӵош быдэстыны луонлыкты вань.
Акцие пыриськемъёс быдэстэм ужзы сярысь милемлы ивортыны но сое туспуктэмъёсын юнматыны кулэ. Соослы ми «Сактон» огазеяськонлэсь но «Шаркан трикотаж» фабрикалэсь ӵыжак выль басма кесэгъёссэс кузьмалом, соослэсь мукет арбериос но кылдытыны мед быгатозы,
Озьыен, та нуналъёсы ик сумка вурон борды басьтӥськомы. Акцилы йылпумъян лэсьтомы южтолэзь пумын (туспуктэмъёсты но гожъямъёсты отчыозь редакцие келяса вуттоно).

Надежда Шкляева.

 

Туала вакытэ нуллыны ярасьтэм луэменызы шифоньер-комодады яке чуланады кыллись дӥсьёсты котькуддылэк вань, луоз. Куштыны но соосты жаль, вылэ но уд дӥся… Оло, маке вурыны яралозы? Кылсярысь, тани та пичи сумкаос гожмо джинсовой брюкилэсь но крепдешин дэремлэсь пӧрмытэмын, мылкыд каремъя чеберъямын.

Порозысь позырес сюресъёстӥ - Москваозь

IMG 2754Шаркан ёросысь Пороз школаысь 11-тӥ классын дышетскись нылъёс Катя Титова но Настя Вахрушева котыр ласянь адӟем карымонэсь. Кыкназы ик ӟеч дышетско, пӧртэм предметъёсъя олимпиадаосын вормыло, кырӟаны-вераны, эктыны, киужен вырыны быгато. Школа ужрадъёс но соостэк уг ортчыло, одӥг кылын вераса – ӟечокъёс. Синмаськоно спортэн эшъяськемзылы но. Настя туж яратэ тол куазез. Кыӵе умой ук тол сикетӥ калгыны, кезьытлы ӧч карыса, тӧлэн ӵошатскыса куасэн бызьылыны. Оло, соин ик куасэз аслыз матын кариз.
Катя но спортэн эшъяське. Кылем гужем со капчи атлетикая ёрос командае пыртэмын вал. Ёрос ӵошатсконъёсын 100 но 400 метре бызьылонын, тэтчанын вормись луылэ. Озьы ик баскетболэн, волейболэн шудыны яратэ, татын но вормонъёсыз вань.
Кылем ар пумын нылашъёс Москвае вуылӥзы. Соос «Билингва» конкурсын вормисьёс луизы. Отчы пыриськизы Россилэн пӧртэм улосъёсысьтыз но кунсьӧрысь пиналъёс. «Та конкурсэ сизьым ужмес ыстӥмы вал, – вера нылъёслэн дышетӥсьсы Людмила Николаевна Рудина. – Соос пӧлысь кыкез финалэ потӥзы. Катя но Настя ужзэс Москваын утизы, ас номинациоссыя вормисьёс луыса бертӥзы». Пусйыны кулэ: Людмила Николаевналэн пиналъёсыз пӧртэм конкурсъёсы пыриськыло, ньыльдон ар ӵоже школаын ужатозяз, со трос визьмо, кыл радлыкез валась, литератураез гажась пиналъёсты будэтӥз. Москваын вормонзы нырысетӥез ӧвӧл ни.
«Анай кылды тӥледыз тодмо но дано кариз, шуыны луоз. Кык кылэз ӧй тодысалды ке, конкурсэ пыриськемды но ӧй луысал. Та ӵошатскон воштӥз-а анай кыл шоры учкондэс?» – юанлы нылъёс веразы: «Удмурт луэменымы туж данъяськиськом. Зэм но, мургес гажаны кутскимы сое, нош куддыр кер но потылоно, ас кылмес туж ик усто ум тодӥське шуыса. Классын удмурт кылын вераськиськом ке но, мур малпанъёсмес, сюлэмшугъяськонъёсмес удмурт кылын шараяны секытгес потэ», – мылкыдзэс усьто соос.
Бадӟым вормонзылэсь йырзы поромымтэ, асьсэ бордын ужано на шуо. Вормонъёссы азьланяз но луозы на.

Туспуктэм вылын: Настя Вахрушева (паллян паласез) но Катя Титова (бур паласез) дышетӥсенызы Л.Н. Рудинаен ӵош.