Get Adobe Flash player
АУ УР "Ӟечбур!"

Асьсэлы удмурт ним быръё

12 8042Элькунмылэн пӧртэм сэрегъёсаз вуылыса адӟиськомы: удмурт кылэз анай кыл чотын дышетыны мылкыд карисьёслэн лыдзы ичиёме. Куд-ог дышетӥсьёс туж тыршо дышетскисьёссэс анай кыл пала берыктыны. Со понна пӧртэм амалъёсты куто. Но куд-огъёсызлы капчиятэм программая ужаны кельшегес. Пиналъёслэсь ӟучомыны сётӥськемзэс шӧдӥз ини Ува ёросысь Булай школаысь покчиосты дышетӥсь А.Н. Семёнова но. «Урокъёсын пиналъёсын ӝыныё ӟуч, ӝыныё удмурт вераськиськом. Классамы украинкамы вань. Удмурт кылэз уг дышеты шуэ. Краснодар улосвылысь вуэм пияшмы но пумит кариське вал, озьы ке но лыдэз но буёлъёсты тодэ ини. Пиналъёс шудыны ярато ук. Урокъёсын тросгес ӝӧквыл («Пуксьы, буква, интыяд!», «Кырӟась азбар») но калык шудонъёсты кутӥськом. Озьы соос удмурт кылъя уроке шумпотыса лыкто.
 «Ӟеч-а, бур-а, удмурт кыл!» программая ужаськом бере, «Ӟечбур!» газетлы дырмы трос уг ни кыльы. «Кыл тугоко» тунсыко потэ, «Буква бӧрсьы буква» рубрикады но яраз вал. Дышетскисьёс мадиськонъёсты тодылыны кельшытӥзы», – шуэ Ангелина Николаевна.
 Али куинетӥ классысь пиналъёс «Мынам удмурт нимы» проект бордын тыршо. Вашкала сямъёсты тодазы вайыса, арлэн вакытъёсаз быдэсъяно ужъ-ёсты чакласа, кыӵе ним соослы сётыны луысал, малпасько. Мукет сямен вераса, нылъёс но пиос асьсэлы кушем ним быръё. Проектсы быдэсмиз ке, оло, кушем нимъёссы мусогес но потозы ай. Соку, оло, ваньзылэн удмурт кылэз мургес дышетэмзы потоз.

Выемед ӧз поты ке - уяны дышод

 11 7835Завьялово школаын ортчем «Шундыберганын» одӥгзэ мастер-классэз ортчытӥзы Балкисэн Эдуардо. Та нылашен пияш асьме шаере кыдёкысь, зарезьёс сьӧрысь вуэмын: Балкис – Индонезиысь, нош Эдуардо – Гондурасысь. Кунгож сьӧрысь пиналъёс та школаын AFS программая 2009-тӥ арысен дышетско ни. толшор толэзе 14-тӥ езлы студентлы – Эдуардолы – дэриос ӧсъёссэс усьтӥзы. Нош та школаысь куинь нылъёс та программая ик Германие, Италие но Финляндие вуылӥллям.
 Арлы быдэ кунгож сьӧрысь вуэм пиналъёслэн тужгес но матысь эшсы, куддыръя, оло, анайзы но луэ та школаысь англи кылъя дышетӥсь О.П. Урсегова.
 «AFS программаез Россиын «Интеркультура» фонд радъяны юрттэ, –веранзэ мытӥз Ольга Павловна. – Та прог-раммая 15–18 аресъем пиналъёс мукет кунэ мыныса дышетско. Кыӵе кунэ мынэмез потэ но кӧня толэзьлы дорысьтыз кошкыны дась – пинал ачиз быръе. Вань 3, 6 но 10 толэзьем программаос.
 Но мурт калыклэсь культуразэ валан но кылзэ дышетон понна, 10 толэзь ик кулэ луэ. Нырысь пиналлэн, кызьы шуо, «культурный шок» луэ ай. Чылкак мукет улонлы со шорлыдын куинь толэзь ӵоже дышыны выре. Пиналъёс кыӵе ке но семьяын нокыӵе дун тырытэк уло. Озьы соослэн выль семьязы кылдэ: анайзы, атайзы, сузэрзы яке вынзы. Эдуардоез доразы басьтӥз со ик семья, кудӥз дорын Гондурасысь ик пияш улӥз ни вал. Озьы Эдуардолэн 8-тӥ классын дышетскись Ваня выныз но университетын дышетскись Лиза апаез кылдӥзы. Россие Гондурасысь ваньмыз-ӧвӧлэз кык пинал гинэ лыктӥз ай. Кыкез ик одӥг семьяе сюризы. Тӥни сыӵе тунсыко учыр».
 Балкис асьме шаере кылем арын гудырикошконэ вуэм. Нылаш ӟуч кылын но, удмурт кылын но валамон, чебер вераське ни. Ольга Павловна солы мугорызъя кельышлы удмурт дэрем но вурем.
 «Ми доры котьку но туж умоесь пиналъёс вуылӥзы. Но Балкис туннэ нуналлы тужгес но быгатӥсез, – веранзэ азьланьтӥз О.П. Урсегова. – Мон сое ӟуч кыллы дышетӥсько. Кунгож сьӧрысь нылпиослы милям нимысьтыз учебникмы вань. Куд-огъёсыныз ми сое быдэс ар куспын ортчыса ум быдтӥське вал. Нош Балкис сое пырпотӥз ни, али ми соин асьме школаысьтымы 5-тӥ классын дышетскисьёслэн учебниксыя ужаськом. Англи кылын но Балкис туж чебер вераське. Со англи кылъя элькун олимпиадае но ветлӥз. Отын 60 адями пӧлысь 16-тӥ инты басьтӥз. Математикая дышетӥсьмы но сое туж ушъя.
 Россие ваньмыз сямен ик англи кылэз тодӥсь пиналъёс вуо. Одӥг пол гинэ дорамы Турциысь англи кылэз тодӥсьтэм пияш вуылӥз. Но со ик собере ваньмызлэсь ӝог ӟуч кыллы дышиз. Выемед ӧз поты ке – уяны дышод. Куд-ог волонтёръёс асьсэос англи кылэз уг тодо. Подмосковьеысь одӥгез сыӵе тодмое, кылсярысь, мынам дышетскисьёсы толэзь куспын ӟуч кылэз дышето, шуэ.
 Кунгож сьӧрысь эшъёссы асьме нылпиосты но ӟечгес дышетскыны бурдъяло. Соослэн но мукет кунъёс сярысь тодон-валанзы будэ, дунне шоры учконзы но воштӥське.

Ольга Москвина.

Ялӥськом "Быдӟым Паска" конкурсмес

Туэ Быдӟынналэз 1-тӥ куартолэзе пусъёмы. Озьыен, дыр вуиз «Быдӟым Паска» конкурсэз ялыны. Сое нош ик «Удмурт Кенеш» огазеяськемен ӵош ортчытомы. Конкурс куинь номинациосъя луоӟ

1. «Паскалы – выль дэрем»

Та нуналлы шуыса, вашкалаосмы нылпиоссылы выль дӥсь вурыса дасяллязы. Соин но, дыр, Паскаез пичиос чидатэк витьылӥзы. Туала вакытэ нокинэ но выль дэремен уд паймыты ни, магазинын угось олокыӵе но чебер дӥсь вузало. Паскаез витьытэк, сое котьку басьтыны луэ. Но со одӥгмылы но сомында шумпотон уг вайы, дыр, кӧня шумпотон вайылӥз ёрмонэз адӟыса будэм песянай-песятайёсмылы пичи дыръязы. Ойдолэ, пиналъёс, Паскалы выль дэрем вурон сямез тодамы ваёмы но та праздник нуналэ Барбиосмес, но мукет мунёосмес (оло, сузэр-вынъёсмес но) удмурт манеръя вурем дӥсьёсын шумпоттомы. Дэремъёслы кӧня ке кесэгланъёсты шедьтоды южтолэзе-оштолэзе потоно номеръёсысьтымы яке Интернетысь. Но соосъя вурем дӥсез удмурт амалэн чеберъяно. Дась ужъёсты мунё вылэ дӥсяса туспуктоно но редакцие келяно, вайыны но луоз.
Таиз конкурс, валамон ини, вуриськыны яратӥсь нылъёслы (ма, пиос пӧлын но мылкыд карисьёс шедизы ке, ми шум гинэ потом. Кин тодэ, пӧлазы, оло, вуоно Вячеслав Зайцев будэ).
Таяз номинацие пыриськыны быгатозы 9–17 аресъем пиналъёс. 9–12, 13–17 аресъемъёслэсь ужъёссэс нимаз учкомы. Паскалы вурем дэременызы, пичи дырысьтызы тодэ ваёнъёсынызы паймытыны быгатозы мылкыд карись песянайёс но, анайёс но, студентъёс но.

2. «Буям курегпуз»

Паскалэн одӥгез син шоры йӧтӥсь тодметэз – курегпузэз буян, соин ик таяз номинацие пыриськисьёслы пенопластлэсь, мукет кыӵе ке арбериослэсь лэсьтэм яке тырттэм курегпузъёсты чеберъяно. Соосты туспуктоно но редакцие ыстоно яке дась ужез ваёно.

3. «Утись кылчинэ»

Асьтэлэсь утись кылчиндэс суредалэ сыӵеен, кыӵеен тӥ сое адӟиськоды. Со тӥледлы кыӵе ке секыт югдурысь потыны юрттӥз ке, со сярысь но гожтэ.
2-тӥ но 3-тӥ номинациосы пыриськыны быгато 7–17 аресъемъёс. Ужъёссэс озьы ик дунъяломы, арлыдзэс чакласа.
Утись кылчинэнызы герӟаськем тунсыко учыръёссэс мадьыны быгатозы мӧйы лыдӟисьёсмы, студентъёс но.
Конкурсэ ужъёсты келяно 25-тӥ оштолэзёзь. Вормисьёс ӧтемын луозы Ижкарысь одӥгаз черке яке Эшъяськон юртэ (таиз сярысь конкурслы йылпумъян лэсьтэммы бере ивортом).

Стрелковъёссы - быдэс гурт

Стрелковъёссы - быдэс гурт

«Милям ваньмыз сямен татын Стрелковъёс», – Дэбес ёросысь Котегурт школаысь дышетӥсьёсын тодматсконъямы огкадь фамилиоссылы паймемысьтымы, валэктӥзы милемлы. Надежда Владимировна Стрелкова 1977-тӥ арысен ини школаын ужа. Дышетэм пиналъёсызлэсь суредъёссэс дуно макеосты кадь утьыса возе. «Таиз тани врач, таиз – крезьгурчи…» – нылпиосызлэсь суредъёссэс возьматъянъяз маде со. Котькуд дышетэм пиналэзлэсь улон сюрессэ чакласа возе, улонын азинскемзылы анай сямен шумпотэ. Биологиен дышетӥсьсы Людмила Аркадьевна Стрелкова но кема аръёс ӵоже тырше ни та школаын. Директорзы Надежда Николаевна Стрелкова Котегурт школаысьтыз Глазовысь пединститутэ гинэ дышетскыны кошкылэм. Собере нош ик вань улонзэ герӟам школаеныз. Любовь Вячеславовна Стрелкова «Жингрес куараос» ансамбленыз тодмо луэ. «Кырӟаны-вераны усточиос лыкто но, кошко но, мыло-кыдоос вань ке, нош концертъёсын потаськом. Ӵуказе Тыловае дасяськиськом», – мылкыдзэ усьтэ со.

 

Соняоссы - куинь8 4101
Котегуртын огкадь фамилиос гинэ ӧвӧл, огкадь нимъёс но трос пумиськыло. Кылсярысь, Женяоссы – кык. Огез – нылаш, мукетыз – пияш. Нош Соняоссы – куинь. Куиньназы ик соос «Жингрес куараос» ансамбле ветло. Ярато удмурт кырӟанъёсты. Ваньзы ӟеч дышетско, киужлы но устоесь.

 

Лымызы - котыр
Школа юртсы вуж ке но, спортзалзы ӧвӧл ке но, дышетскись пиналъёссы 46 гинэ ке но, пӧртэм ужрадъёсы пыриськыло котегуртъёс. Спортъя ӵошатсконъёсын но вормонъёссы вань. «Пионерской правда» газетлэн призэз понна куасэн бызьылонын 10 устоосыз пӧлы пыро. Лымызы татын трос на. Гурезьёс но, бусыос но, ульчаос но юг-югесь. Татӥ угось машинаосын трос уг ворттыло. Соин ик со чылкыт но чебер. Доразы вуылыкумы, куазь синтэм-пельтэм жобаське, лымызэ васькытэ вал. Школа азьын радэн-радэн куасъёс тыремын. Озьыен, ветлымтэ сюресэз лёгисьёс луозы.

Антонида ЕРМОЛИНА.

Талам дуранда но... "Жмых" кылбур

 IMG 1525Школаямы Л.Т. Со-зонова-Лукиныхен пумиськон ортчиз. Со сузэрезлы – удмурт кылбурчилы Алла Кузнецовалы – сӥземын вал.
 50-тӥ аръёслэн кутсконазы улон соосты Вуж Бодья гуртамы вуттэм: анайзэс колхозамы агроном луыса ужаны лэзиллям. Гуртысь пиналъёс туж ӝог эшъяськиллям та кык ӟуч нылъёсын. Соос, пе, туж чебересь вал, дӥсьсы но вожъяськымон. Аля трос лыдӟиськем. Солэсь адӟем карыса, сузэрез но книга доры кыстӥськем. Удмурт кылэз уг тоды шуыса, пичи сузэрзэ нырысетӥ классэ басьтӥллямтэ. Ар куспын гурт нылъёс пичи Людаез удмурт кылын вераськыны дышетӥллям.
 Людмила Тимофеевна верамъя, нырысетӥ чуръёссэ Алла Кузнецова милям Вуж Бодьяямы, школа бордгазетэ, гожтэм. Куинетӥ классын дышетскыкуз, уроке бере кылись нылаш сярысь пичи сценка гожтэм. Со понна солы В. Бианкилэсь «Лесные сказки» книгазэ кузьмаллям. Сценкаез пиналъёс колхоз клубын пуктӥллям.
 Алла Кузнецова котьку но алдаськонлы пумит вылэм, аслэсьтыз пичиослы дурбасьтылэм.
 Гуртын гужем шулдыр но, умой но. Котырысьтыз чебер инкуазьлы паймыса, Аля ӟуч кылын туж чебер кылбур гожтэм.
 Война бере аръёсы гуртъёсын сиёнлы ёрмылӥзы на. Лыктэм нылъёслэн сиёнзы умойгес вылэм. Озьы ке но мукет нылпиослэсь сиёнзэс ческыт потыса оскалтылӥллям соос. Етӥнэз, кенэмез пызьыртэм бере кылем дурандаез (жмых) туж ческыт потыса сиылӥллям. Одӥг пол нылъёс гуртысьтызы пияшлэсь дурандазэ таланы малпаллям… Аръёс ортчыса ини Алла Кузнецова, та учырез тодаз вайыса, «Жмых» нимо кылбур гожтэм.
 1952-тӥ арын гуртамы мукет агроном вуэм. Соин ик Алла Кузнецовалэн семьяез дор палъёсаз кошкем.
 Ми данъяськиськом, Алла Кузнецовалэн гожъяськон мылкыдыз милям гуртамы ӝутскиз шуыса.

Люда ЛЕБЕДЕВА.
Вуж Бодья школа.
Кизнер ёрос.