Get Adobe Flash player
АУ УР "Ӟечбур!"

Тузӥ дэрем, чильыр-бильыр кукей но утись кылчин, яке "Быдӟым Паска" конкурслы йылпумъян

IMG 5131Газетэз лыдӟисьёсмы сое чидатэк витё ни, луоз. Ваньмызлэн (конкурсэ 200 пала адями пыриськиз) сюлэмазы бадӟым оскон, ужъёс угось котькудӥз туж тыршыса, вань быгатонлыксэс поныса лэсьтэмын. Тросэз нылашъёс зэмос усточиос вылӥллям. «Паскалы – выль дэрем» номинацие пыриськыса, мунёослы тузӥесь дэремъёс пӧрмытӥллям, куд-огъёсыз асьсэлы, покчи сузэръёссылы кузьым лэсьтӥллям. «Утись кылчинэ» номинацие пыриськисьёс тунсыко учыръёсты гожтӥллям, суредаллям. Нош «Буям курегпуз» номинация пиналъёслэсь кӧня пӧртэм быгатонлыкъёссэс шараяз! Ужъёссэс тросэз электрон почта пыр келяллязы. Та амал, конечно, туж умой: уж дыраз вуэ, марысь-мар ке, сое выльысь но келяны луэ, нош ачиз сюлэмлы дуно луэм киуж, суред кие кыле – ышоз шуыса кышканэз яке сое выльысь басьтон сярысь сюлмаськонэз ӧвӧл. Но азьланяз, пиналъёс, оригиналъёстэс ик келяны тырше. Мукет ортчытъяськись конкурсъёсын дунъясьёс соосты гинэ лыдэ басьто. Туспуктэмъёс вылысь учкыса гинэ киужъёстэс дунъяны секыт вал, соин ик куд-огез, оло, ӝоже но усиз. Нош редакцие вуттэм киужъёс (Пичи Пургалась, Шор Постолысь, Ижкарысь, Быгиысь, Казьмасысь, Ушурысь) кӧня пырась-потасьёсмес паймытъязы! Соослы редакциямы нимысьтыз сэрег но висъямын вал. Пырем-потэммылы быдэ асьмелэн но синъёсмы шумпотылӥзы.
Шугъ-ясь-ки-и-м!

Вуриськисьёс пӧлысь устооссэ бырйыны зэмзэ но туж шугъяським. Куд-ог покчиослэн дэрем вурыны юрттӥсьёссы вылӥллям. Нош тросэз ужзэс асьсэос вуриллям-керттӥллям, малпаллям. Туж шумпотӥм, песянаез юрттэмъя, Пичи Пургалась Даниил Лобановлэн но дэрем вурыны мылкыдыз бурдъяськем.
Вань ужъёсты трос пол бергатъяса-учкыса, конкурсмылэн огъя нимыз но «Паскалы – выль дэрем» вал бере, вань пинал вуриськисьёсты дипломен, кузьымен, кинэ ке ческыт саламен пусъёно кариськимы.

Кузьыт, небыт, чилясь…

«Буям курегпуз» номинацие тужгес трос ужъёс вуизы. Малэсь гинэ лэсьтӥллямтэ пиналъёс кукейёсты: пенопластлэсь, ыжгонлэсь, кузьыт ыльняньлэсь, бумагалэсь, пулэсь. Нош чеберъяллям бисерен чильпаса, кагазлэсь лэсьтэм сяськаос лякылыса, декупаж амалэн...
Курегпузъёсты «буяса» конкурсэ котькинлэсь вазь пыриськыны чупырскеменызы шумпоттӥзы Игра ёросысь Лонки-Ворцы нылпи садысь покчиос. Дэмен пыриськизы Шаркан ёросысь Мувыр, Зюзино, Быги школаосысь нылпиос, озьы ик – Ува ёросысь Булай школаысь продлённой группае ветлӥсьёс, Жужгес школаысь нимаз-нимаз классъёс но трос-трос мукетъёсыз. Та номинацие пыриськемъёс пӧлысь нимысьтыз пусйиськом Ижкарысь Кузебай Герд нимо гимназиысь Вика Андрияноваез, 93-тӥ школаысь Нина Петроваез, Можга ёросысь Кибья школаысь Роман Гурецкихез, Пичи Пурга черкогуртысь Юлия Ивановаез но Аня Панфиловаез (та нылъёслэсь анайёссы юрттэмъя лэсьтэм киужзэс ми тужгес устоен лыдъямы — учке улӥысь туспуктэмез), Венера Зиновьеваез, Ува ёросысь Булай школаысь Инна Петроваез, Глаз ёросысь Дондыкар школаысь Диана Максимоваез, Пичи Пурга ёросысь Иваново-Самарск школаысь Лиза Кочуроваез.

Улонысь учыръёс пыр

«Утись кылчинэ» номинацие вуэм ужъёс пӧлын тужгес ушъямон пӧрмиллям Балезино ёросысь Исак школаысь Жанна Князевалэн, Шаркан ёросысь Быги школаысь Полина Бехтеревалэн, Пичи Пурга ёросысь Иваново-Самарск школаысь Марина Лебедевалэн гожтэмъёссы. Номинацилэсь пуштроссэ соос туж умой валаллям но, улонысь учыръёс вылэ пыкиськыса, сое пыр-поч усьтӥллям. Игра ёросысь Лонки-Ворцы нылпи садысь Снежана Христофоровалэн, Татарстанысь Балтаси ёросысь Шор Кушкет школаысь Яна Гришкиналэн (ужез печатламын газетмылэн 17-тӥ номераз, но ми сое янгышаса Шаркан ёросысь Быги школаысь Даша Беляевалэн гожтӥськеммы. Куриськом, Яна, вождэ эн вайы.), Ижкарысь Кузебай Герд нимо гимназиысь Яна Матвеевалэн суредъёссы но пусйымонэсь.
Аспӧртэм мастер-классэз понна пусйиськом Ижкарысь Кузебай Герд нимо нылпи садысь Ася Баймурзинаез, песянаезлэсь Паскалы выль дэрем пумысен тодэ ваёнъёссэ тунсыко мадемез понна – Алнаш ёросысь Кузьымгуртысь Коля Сосновез.
«Вконтактеын» котькинлэсь трос лайкъёс бичазы Диана Ефремова – 150 (Покчи Лӧзя школа, Балтаси ёрос, Татарстан), Алина Мазитова – 85 (85 номеро школа, Ижкар), Илья Матвеев – 58 (Кузебай Герд нимо гимназия).
Конкурсэ пыриськем егит но мӧйы эшъёсмес пусъёмы таукаронъёсын. Озьы ик таукарон басьтозы пиналъёсты конкурсэ ӝуткась-бурдъясь дышетӥсьёс.
«Быдӟым Паска» конкурсэ пыриськисьёсты инвожо толэзьлэн берпуметӥ нуналъёсаз ӧтёмы Ижкаре. Со сярысь ивортомы, дырыз но интыез тодмо луэм бере. Учкылэ ялонъёсмес.
Со сяна, тодады вайытӥськом: тӥ пӧлысь кин ке «Ӟечбур!»-лы быдэс арлы гожтӥськемын ӧвӧл ке, 2-тӥ паларе но газет басьтон понна, 13-тӥ инвожоозь почтае дыртэ.

Надежда Шкляева.

Будо шудыса но визь люкаса

IMG 8383Шорын Юри школаын пиналъёс но дышетӥсьёс одӥг бадӟым семья кадь уло, каникул дыръя но ог-огзылэсь мӧзмо. «Библиотекамы ӧвӧл но, пиналъёсын Улын Юрие экскурсие ветлӥськом. Киужен выронъя кружокъёсмы ужало, эктӥськом но кырӟаськом, спортзалмы ӧвӧл ке но, спортлэсь но ум палэнскиське. Пиналъёслэн медальёссы но трос», – школазы сярысь вера Е.В. Бибикова. Елена Васильевналэн пичи дырысеныз воспитатель луэмез потэ вылэм, но продлённой группаын 20 ар ужамез сярысь чик уг жаля. Ваньмон дыръяз кырӟаны яратэ, куасэн эшъяське. Вазенгес ӵошатсконъёсы но пыриськылӥз, вормонъёсыз но вал. Пужыятскыны, керттӥськыны, чильпаськыны, инӟыосын вырыны – котьма ужаны быгатэ нылкышно, пиналъёсты но дышетэ. «Мылкыд гинэ мед луоз, дыр сюре», – таӵе малпанэ вуэм со туннэ нуналозь.
Урокъёс вискын но ортчемзы бере покчиос шашкиосын но шахматъёсын шудыса йырзэс ужатыто, суредасько, нюръясько. Маша Кирилловаен Яна Алексеева шахмат пул вылын «уголкиен» шудо. Та нылъёслы но Динара Берёзкиналы шахматэн шудон капчиен сётӥське. Математикаен задачаосты капчиен «куадало». Ма, соос чильпаськон венен но ужаны, гофробумагаез но улӟытыны быгато.
Пиоссы, оло, адӟем карымон спортсменъёс луозы ай. Илья но Егор Тихоновъёс, Данил Демидов, Рустам Абрамов куасэн нискыланы туж ярато. Ильялэн куинь медалез вань ни.
Лымы шунам бере пиос пыдын бызьыло, футболэн шудо. Нылъёс но соослэсь бере уг кылё.
– Соос милемыз уг вормо. Ми ка-ак ӵыжиськом, соку ик гол пыртӥськом, – нылъёслэсь быгатӥсьгес кариське Егор.
– Ми но тӥледыз вормиськом, – уг сётӥсько нылъёс. Соос туж шумпричесь. Динара тани туж зол бызьылэ, куддыръя гинэ, пе, канжаськыкуз, пиос сое суто.
Тӥни озьы споръяськыса но шудыса, урокъёсын но кружокъёсын тодон-валан, визь люкаса ортчыто нуналъёссэс Шорын Юриысь пиналъёс. Котькудзылэн вань льӧль малпанзы, отчы сузьтӥськыны гинэ кулэ.

Эльвира СИМАКОВА.
Пичи Пурга ёрос.

Яркыт буёлъёслы но вакыт вуоз

 IMG 0668Ижкарысь 17-тӥ школаын дышетскись Софья Чугаева пичи дырысеныз буёлъёсын эшъяське. Соин ик урокъёс бере искусствоосъя 6-тӥ нылпи школае дыртэ. Удмурт кылъя дышетӥсез С.М. Винокурова ӵектэмъя Ашальчи Окилэн творчествоезлы сӥзем вожвылъяськонэ пыриськиз, угось туж адӟемез потӥз, кызьы суредасько мукет школаосысь пиналъёс. Ачиз Соня вож но пеймыт-лыз буёлъёсты яратэ, но туж оске – яркытъёсызлэн но вакытсы вуоз.
«Витьёслы» гинэ дышетскись нылаш лыдӟиськыкуз шутэтске. Солы тужгес ярало лул-сюлэме пыӵась произведениос. Синмаське «Чучелоысь» Ленкалы, жаля но сое. Героиня туж кужмо адями. Соня но, быгатэ ассэ возьматыны, малпанъёссэ вераны. Улонын но, суредъёсыз пыр но.

 

А.Окилэн "Возьытлык" кылбурезъя суред.

Паймисько... 2

IMG 0981Римма Ивановна Шкляевалэсь «паймонъёссэ» («Ӟечбур!», 13-тӥ номер) азьланьтэ Пичи Пурга ёросысь Гожня школаысь библиотекарь Зинаида Елизарова.
Паймисько,
кызьы малпамтэ шорысь, шуак сюлэм гыркысь потӥзы но «Сюлэм гурлан» книгае выдӥзы чуръёсы. Малпаны но ӧй дӥсьтылы, ужъёсы куке но газет бамын потылозы шуыса. Нош туннэ ручка ачиз кие куриське.

Быдэс текст

Со вӧзын зэмзэ ик югыт

012Куинетӥ классын дышетскись Олеся Чернова – школаысьтымы одӥгез тужгес шаплы, котькытчы вутскись, быгатонлыкъёсыныз паймытыны быгатӥсь усточи. Классын но школаын со вӧзын зэмзэ ик югыт, малы ке шуоно тодон-валанъёсыныз котырысь эшъёссэ югдытыны быгатэ. Одӥг нуналэ ми сое «Юнкор» кружокмылэн занятияз ӧтчамы но кӧня ке юанъёсын вазиськимы.

Быдэс текст