Get Adobe Flash player
АУ УР "Ӟечбур!"

Адскисьтэм тулкымъёс но... кусыпъёс

Омырын, асьме котырын, кӧня тулкымъёс лобало-ветло! Соостэк радио но, телевизор но, сотовой телефон но, интернет но уг ужало. Куд-ог нымы-кибыос, пӧйшуръёс, тылобурдоос со тулкымъёсты шӧдо, пе. Тодосчиослэн верамзыя, куд-ог интыосын сотовой телефон тулкымъёсын йырин мушъёс йыромылыны кутскиллям ни. Соин валче быдэс муш семьяос чиптэм-чаптэм ышыло, пе. Татын муш палдон сярысь вераськон уг мыны.
Адскисьтэм тулкымъёсты шӧдысалзы ке, адямиос улыны ӧй быгатысалзы. Соос изёнэз-кӧлонэз ӧй тодысалзы. Озьы ке но асьмелэн шӧдонъёсмы вань. Тани асьтэ улонысьтыды учыръёсты тодады вае ай. Ӵемысь тазьы луылэ: кин ке сярысь малпаськиськоды но, огшап улыса, со адямиен пумиськиськоды, шуак луиськоды. «Биотоктэ тон мыным лэземед, со йырам вуиз, тон сярысь малпаськыны косӥз», – тодмоосылы тазьы вералляме вань. Малпамея, адямиос ог-огзылы кыӵе ке адскисьтэм тулкымъёс-иворъёс ысъяны быгато. Улонысь кӧня ке учыръёсын тодматэме потэ.
Тазэ мыным удмурт писатель Михаил Иванов вераз. Офицер луыса, со Дальний Востокын служить карем. Одӥг ӝытэ аслаз комнатаяз, койка вылын, кыллисько, пе. Борддорысь одӥгез обой кесэг витёнтэм шорысь шатыр карыны кутскем, собере быдэсак усем. Урод лякиллям, дыр, малпам Михаил Матвеевич. Кӧня ке час ортчыса, офицерлы телеграмма вуэм, анаезлэн кулэмез сярысь ивортӥллям. Берло со тодэм: обойлэн усем дырыз анаезлэн берпумзэ шокчеменыз ӵапак тупам. Озьы кулӥсь кышномурт пиезлы кыӵе ке ивор сётэм. Мукетыз учыр. Таиз Башкортостанысь мынам вордӥськем Алтау гуртам вал. Сагит нимо егит пи, вина интые, кыӵе ке кышкыт суретэз юэ. Сое больницае нуо. Врачъёс егит пиез утён понна уйбыт сямен сюлмасько, озьы ке но ядлэсь бервылзэ вормыны уг быгато. Ӵукна пал Сагит кулэ. Дорысьтыз борддор чассы егит пи кулон минутэ ветлэмысь дугдэ. Кызьы та учырез валэктод меда?
Куинетӥез учыр. Мынам выны секыт висьыны кутскиз. Уфаын эмъяськиз, собере дораз кыллиз. Одӥг нуналэ анае монэ гуртэ бертыны косӥӟ выныдлэн тазалыкез туж лябӟиз, пе. Гуртэ бертэм бере чай юыса ӝӧк сьӧрысь потыкум, дэремелэн саесысьтыз горд виштыез адӟи. «Варенняен наштаськиськем-а, мар-а?» – пайми мон. Виштые киыным йӧтӥськи но – со кӧс. Дэремысьтым виштыез мукетъёс но адӟизы. Собере мон со сярысь огдырлы воксё вунэтӥ. Ӝытазе дэремме кыльыкум адӟиськӧ саесысь виштылэн пытьыез но ӧвӧл ни.
Со нуналэ ик Уфаысь сузэре но миськем дэремысьтыз горд виштыез адӟем. «Со виштыез мон олокызьы но миськыны выри, гладить но кари, нокызьы уг кошкы», – тодаз вае Фариса. Ӵуказеяз со вишты дэремаз вылымтэ ни.
Кӧня ке нунал ортчыса, вынмы та югыт дуннеысь кошкиз. Мар вишты вал со? Малы кылдӥз, ма вераны турттӥз?
Адями ас ӵыжы-выжыосызлы, эшъёсызлы малпанъёсыз пыр иворъёс ыстыны тырше. Кыӵе ке кышкыт яке секыт югдуре сюрыкуз, со иворъёс кужмо тулкымъёсын кыдёке кошко, уно сюрс иськемъёсты ортчо. Соосты адӟиськом, кылӥськом ке но, «лыдӟыны» ум быгатӥське.
Адямиослэсь адскисьтэм тулкымъёс пыр кусып воземзэс яркыт возьмато кыкто, куиньмо вордскемъёс: огез висьыны усьыку, мукетыз сое шӧдэ ни, асьсэос ог-огзылэсь кыдёкын ке но.
Асьмеос будосъёсын, улэп макеосын но кусып возиськом. Биофизикъёслэн верамзыя, адями но вордӥськем палъёсысьтыз писпуос, мукет будосъёс ог-огзэс, мукет интыосысь будосъёсын ӵошатыса, ӟечгес «валало». Соин ик ас палъёсысьтыд бичам эмъюм турынлэн пайдаез бадӟымгес луэ.
Вуоз сыӵе дыр, куке асьмеос, скайпын сямен ик, ог-огмылы малпанъёсмес, веранъёсмес адскисьтэм тулкымъёсын ыстылом. Вераськытэк но ог-огмес валалом.

Ульфат Бадретдинов,
писатель.

Пичи нылэз будэтон - со сыӵе ик Барбиен шудон

 55Алёна Родионова Вавож ёросысь Выль Бия школаез йылпумъямын. 1995-тӥ арын Барби мунёлы сӥзем конкурсын вормыкуз нырысьсэ тодматски та нылашен. Кие кутыса вешамон мунё кадь гинэ вал ай со ачиз но соку. Нош табере аслаз пичи «барбиез» будэ. Алёна сярысь гожъямме выльысен лыдӟи но паймӥ гужем куазен, уриськон вакыт, но Алёна немец кыллы школаязы рос-прос дышетӥсьсы ӧвӧл шуыса вера. Соку ик ини солэн кылъёсын тунсыкъяськонэз шӧдӥське вылэм. Удмурт кун университетэ дышетскыны пырыса, Алёна кылъёсын тунсыкъяськонзэ азинтыны быгатӥз. Татын со мадьяр кылэз мылысь-кыдысь дышетӥз, тодон-валанзэ волятон понна, Будапештысь Этвеш Лоранд нимо университетэ но Балашши Институтэ стажировкаосы ветлылӥз. УдГУ-эз йылпумъяса, Этвеш Лоранд нимо университетысь аспирантураын тодон-валанзэ будэтӥз. Тодос ужзэ Петер Домокош дорын утиз. 2011-тӥ арын Алёна философи наукая доктор степень басьтӥз.
Будапештын, Москваын улыса но, Алёна «Ӟечбур!» газетэн кусыпсэ уг ышты. Шаермылэн палэназ, удмуртъёсын артэ улытэк, кызьы меда луэ ас кылдэ утьыны? Таӵе юанэн вазиськи азьвыл юнкормылы. Юанэлы валэктон Алёна аслаз блогысьтыз утчаны косӥз. Татчы егит анай Софья нылыныз ортчытэм нуналъёссы сярысь гожъя. Софья мадьяр но удмурт культура вылын будэ. Анаез соин удмурт сямен вераське, нош атаез – мадьяр.
«Венгриын туннэ но ӵуказе Паска каро, – гожтэ Алёна аслаз блогаз, – Софья буям курегпуз ӵукна сииз. Толон ми Москва вӧзысь коттедж посёлоке куное ветлӥм. Москва котырын зэмос гуртъёс ик ӧвӧл ни кадь, котыр дачаос, оломар пӧртэм коркаос. Пыдлоязгес мыныса гинэ сыӵе интыосы вуоно, кудъёсызъя адске, отын зэмзэ но ялан уло шуыса.
 Ужан нуналъёсы ми Софьяен арнялы быдэ кык пол кытчы ке ветлӥськом. Одӥг полаз венгер эшъёсынымы пумиськылӥськом, мукет полаз – ӟучъёсыныз…Кылем арняе одӥгаз ӝытэ Мадьяр лулчеберетъя центре вуылӥм, мукет нуналаз Ботанической садэтӥ поръям, ӵӧжъёс сьӧры уйылӥським, крокусъёсты учким но сад вӧзы ик интыяськем кафее пырыса шудӥм, сиським. Кафелэн нимыз «Ribambelle», туж умой инты! Пиналъёслы отын бадӟым шудон площадка вань, аниматоръёс пӧртэм шудонъёс ортчыто. Менюазы вань нылпи сиёнъёссы, но сьӧре кутэм сиёнэз но пал кыл вератэк шунто. Ботанической садэ кафеысь билеттэк потаны луэ. Но Ботанической сад палъёсы вуылон понна, ми Софьяен нырысьсэ автобусэн но метроын ворттылӥм. Туспуктэмъёсме тазьы нимай: «Кышкыт ӧвӧл метроын, мамае ке мон вӧзын».
 Нош таяз арняе зоопарке но «АндерСон» нимо кафее ветлӥмы.
 Зоопаркын Софья ог час но ӝыны пала бызьылӥз, собере куинь час но дас вить минут изиз. Нош мон сайкамзэ возьмаса дас одӥг иськем поръяськем. Ӵукна потэмъёс доре ӝыт пал гинэ вуим. «АндерСон» кафе – туж мыло-кыдо инты, отын но пиналъёслы шудон комнатаез вань. Шудӥськод-жадиськод- сиськиськод. Татын пиналъёслы озьы ик вань пӧртэм ческыт сиёнъёс.
Нош эшшо котькуд нунал нуназе бере но ӝытазе 1 – 2 часлы шудон площадкае потаськом. Великмы но, самокатмы но вань ини!»
 Бадӟым удмурт диктантэз но Алёна палэнэ уг кельты, тани кызьы гожтэ туэ диктант гожтыны выремез сярысь: «Туэ ньылетӥзэ диктант гожтӥсько. Туннэ ми Мускоысь дыръя 12-ысен 13-озь уямы, 13.45 котырын дорамы вуимы. Картэ базаре кошкиз. Малпасько вал, уяса супыляк жадем Софимы чаляк гинэ умме усёз но, мон диктант гожъяса гань-гань пуко. Но Софья изьыны ӧз но малпа. Кылем арын сямен ик, нош ик мукет амалъёс ӝогак утчатэк ӧйлась. Тани-тани лыдӟыны кутскозы ини! Диктофонме ӝуатыны вырисько – батарейкаез пуксем! Бызьыса телефонме кутӥ но отысь диктофонзэ утчаны кутски. Пӧрмиз ик, лэся. Кӧня ке кылзыса эскери но – Софьялэн вераськемез но отчы ик гожтӥськем. Табере матысь нуналъёсы кагаз вылэ гожтоно. Та ужрадлы дырмес арлы одӥг пол висъяны, котьма ке но, туж капчи, ойдолэ яратоме но гажаломе анай кылмес!»
 Егит анайлэн пӧраськыны быгатонлыкезлы но паймоно. Та ужез со зэмос творчестволы пӧрмытэ. Пӧраськемезлэсь туспуктэмзэ адӟыса гинэ но мылкыдыд ӝутскоз. Эшъёсыз солэсь пӧран амалъёсыз сярысь юаллясько. Соин ик туспуктэм улэ егит пӧраськись пӧртэм кылын гожтэм рецептъёс интыяны тырше, куд-ог сиёнлэсь кулэлыксэ но пусйыса кельтэ.
 «27-тӥ апреле Софьялы арес но ӝыны тырмиз! Сыӵе бадӟым, но со дыре ик сыӵе пич-и-и-и на! Вордскем нуналэзлы шуыса, мон солы гоносутэрен (крыжовникен) пирог пыжи. Нош эшшо Софилы шудон тусьты-пуньы кузьмамы.

Г о н о с у т э р е н к у т э м н я н ь
Кулэ луоӟ
125 г нӧкы вӧй,
75 г сакыр,
2 курегпуз,
100 г пызь (мон сезьы пызен пӧрасько),
50 г изэм миндаль (кофемолкаын изыны луэ),
1 пичи пуньы разрыхлитель,
250 г гоносутэр,
1 бадӟым пуньы изэм сукари.
Небыт нӧкы вӧез сакырен шукконо, пӧлаз курегпуз одӥген-одӥген ватсано. Ваньзэ рос-прос сурано. Табере татчы разрыхлителен сурам пызез пужноно но изэм миндаль пононо. Нап йӧлвыллы укшась ыльнянез табае кисьтоно. Таба вылэ нырысь пергамент вӧлдоно. Табере ыльнянь пушкы гоносутэр “бышкано” но вылтӥз изэм сукари пызьнано. Пирогез 180 градусэ пуктэм духовкаын ог 25 – 30 минут пыжоно.
Куртчиськод но – небыт, вӧё пыжиськемез веръяськод, нош чырсалэс емыш со дыре ик гужемез тодэ вайытэ».
Ӝоген асьме дорын но гоносутэр кисьмалоз ни, Алёналэн та дэмланэз лыдӟисьёсмылы но мылкыдзыя тупалоз. Пыжиськемъёсын туспуктэмъёсыз улын солы сётэм трос юанъёс пӧлын таӵеез но юан вань: кельше-а венгер кухня, дышид-а ини? Нош Алёна гожтэ: «Каллен ваньмыз кельшыны кутскиз ини. Тросэзлы дыши но сомындаезлы дышетсконо на».
Нош таиз лымы вылын кыллись нылызлэн туспуктэм улаз гожтэмеӟ «Пичи дыръямы, тулыс каникул вакытэ, юж вылтӥ тазьы тыбыр выламы нискыласа кызьпу но пужым бычы бичаны ветлӥськом вал. Собере сое першалъёсмы кӧня ке уксёен басьто но яке витамин сёто вал кадь…» Та чуръёсты лыдӟыса валаськод: Алёналэсь сюлэмзэ шунтэ дорзэ яратон мылкыдыз, соин герӟаськем шудо дыръёсыз. Улонын азинсконъёс басьтыны юрттэ солы кылъёсын тунсыкъяськемез.

Антонида ЕРМОЛИНА.

Кызь минуттэк сизьым, яке Кыӵе аресын лыктэ дыр сярысь валан

27 06511. «Улонысь учыръёсы гожтоноосыз уно на»

Одӥг ӵукна редакциямы Вера Григорьевна Пантелеева пыриз. Ӝӧк выламы ӵап али потэм «Триптих» книгаез кылле вал бере, куномес озьы гинэ лэземмы ӧз поты ни. Берло дыре та книга пумысен трос гинэ вераськылӥмы уго, котькудмылэсь мылкыдмес бугыртӥз со. Книгае пыремын веросъёс, улонысь учыръёс, кылбуръёс. Гожтэмын со ӟуч но удмурт кылъёсын, Вероника Дор нимын. Та нимез «Кенеш» журналысь но «Удмурт дунне» газетысь одӥг-ог адӟылыны луылӥз ни вал. Нош нимаз книгаен та авторлэн ужъёсыз лыдӟисьёс доры нырысьсэ вуизы. Соин но со лыдӟисьлы витьымтэ шорысь кузьым выллем луиз.

Быдэс текст

Атай сямен сюлмаськыса…

 27 1«Дась лу!» («Ӟечбур!»)  газетлэн валтӥсь  редакторъёсыз пӧлысь одӥгезлы – Пётр Константинович Черновлы – 13-тӥ  пӧсьтолэзе  80  арес тырмысал.
Ортчем аръёсыз тодэ вайыку, тужгес кулэез сярысь вераны, тросэз пӧлысь кудӥз тужгес верано кадь бырйыны шугъяськоно. Азьвыл чыры-пыры кадь потӥсь учыръёс но туннэ нуналэ укыр интыяз вылӥллям кадь йӧто уго.
 …Пётр Константинович Черновлэсь «Комсомолец Удмуртии» — «Удмуртиысь комсомолец» газетъёслэн редакцияз ужаны лыктэмзэ тодӥсько на. Дӥсья пумитало юнме уг шуо. Мынам но тодам со кылиз ӝикыт дӥсяськеменыз. Сайкыт синъёсыз, вылтыраз лач-лач пукись кисыритэм пурысь костюмез чильпыратыса возьматӥзы кадь солэсь ужын но пыр-поч луонозэ, улонэз лад-лад радъяны тыршонлыксэ. Озьы ик луиз. Москва университетын трос тодон-валан басьтыса бертэм журналист шаерысьтымы егитъёсын газет пыр вераськыны, кенешыны тунсыко мугъёс шедьтылӥз. Но солэн дано но дуно ужъёсыз пӧлысь тужгес ӟечез, мыным потэ, Быдӟым Атыкай ож кутскемен валче потэмысь дугдэм «Дась лу!» газетэз выльысь поттыны сюлмаськемез. Солэн тыршемезлы луыса, 1968-тӥ арын 1-тӥ толшоре, пиналъёслэн улоназы выль вакыт усьтыса, 22 000 удмурт семьяе «Дась лу!» вуиз. Редакция но кылдытэмын ӧй вал на, нош газет потӥз ни. Пётр Константинович тодӥз уго кинлы вазиськыны. Вуоно кылкутӥсь секретареныз, Григорий Степанович Симаковен, дасязы нырысетӥ номерез. Ма, уже кутыны чакламъёс но юрттӥзы. Но соос огзы но нимысьтыз дышетскемын ӧй вал. Со аръёсы журналистэ дышетскем удмуртъёс туж ӧжыт вал уго. Ужасьёссэ дышетон сярысь редактормы ялан сюлмаськиз. Мукет республикаосысь нылпи газетъёслэн редакциоссылэн уженызы тодматскыны ысъялляз. Мон Уфае, «Пионер Башкирии» газетлэн редакцияз, ветлӥ. Отчы вуись гожтэтъёсты нимысьтыз журналэ гожъяло вылэм, кинлэсь, кытысь, ку вуэмзэ пусйыса. Соослэсь адӟем карыса, ми но озьы ужаны кутскимы. Нуналлы быдэ вуись гожтэтъёс пӧлысь одӥгез но арам медаз луы шуыса тыршимы. Газетэ поттымонзэ дыраз дасяно, мукетызлы валэктоно, мар сярысь но кызьыгес гожъяно. Будӥсь нылпи гожъяськемезлэсь кулэлыксэ, сое адями чот каремез, гажамез мед шӧдоз. Соин ик Пётр Константинович гожтэтъёсын ужанлы бадӟым саклык висъялляз. Пиналъёс понна редакциысь вуэм гожтэт – со паськыт дуннеен кусып возён но, дышетскон но, юрттэт, визь-нод басьтон но. Сое мон шӧдылӥ, шаермылэн пӧртэм сэрегъёсысьтыз юнкоръёслэсь альбомъёссэс адӟылыкум: газетэ потэм материалъёсынызы артэ лякылэмын луо вал газетысь вуэм гожтэтъёс но.
 Нылпиослэсь гожтэтъёссэс Пётр Константинович ваньзэ лыдӟылӥз. Ужасьёсмылэсь но соослы гожъямъёссэс куд-огъёссэ учкылӥз. Тодам лыктэ таӵе учыр. «Нюлэскы ветлыкумы, ӟичыез ӧжыт ӧй куты, быж пумыз гинэ киям кылиз», – гожтэм пияш. «Инкуазен тодматскемды – умой уж, но ӟичыен луэм учыр сярысь оскытэмед потэ ке, солэсь быж пумзэ редакцие ысты», – гожтэт пыр валэктэм егит ужасьмы. Редактормы, кабинетэ пырыса, йӧн-йӧн юалляськиз, кызьы, пе, син азяд пуктӥськод пияшлэсь шугъяськемзэ, редакциын ужасьлэсь куронзэ одно ик быдэстоно кожаса, быж пумез конвертэн келяны курадӟемзэ. Зэм потӥсьтэм чуръёссэ пыртытэк, гожтэтэз дасяны луысал, шуиз.
– Гожтэтъёсъя отделысь корреспондентлэн уждунэз, мукетъёслэн сярысь, ичигес вал. Соин, лэся, Пётр Константинович отчы тэтэ карисьёстыгес басьтылӥз, азьланяз дышетскыны пырон ласянь сюрес усьтон вылысь. Одӥгез озьы дышетскыны кошкиз но, нодлыко учётчицамес корреспондентэ пуктӥз. Тыршись мурт но янгыша шуэм сямен, нылкышномы огаз летучкаын кыл кылоно луиз. Егит муртлэн сюлмыз вӧсь луиз, дыр, дӥсяськыса кытчы ке кошкиз. Атай мурт кадь сюлмаськыса, Пётр Константинович мон доры пыриз, шугъяськон мугзэ вераз. Сокем чутрак куаретыны уг яра вал, дыр, шуиз. Вуиз ке, кызьы ке котыръяськыса либыт кылъёс вераны, лӥятыны косӥз.
 Озьы, тупаса улӥсь семья кадь ужаса, кык ар ортчиз. Пиналъёслэн газетлы шумпотэмзы уно гожтэтъёс вуэмъя шӧдӥськылӥз. Одӥгаз вордӥськон нуналэ фотографмы юри снимок но лэсьтӥз – гожтэтъёс вырйыл кадь кыллё, ог 400 муртлэсь вуиллям. Соос пӧлысь тросэз – йыртӥянъёслы валэктонъёс, «Шонер тодӥзы» сэреге ыстэмъёс. Пиналъёслэн озьы «вераськемзы» редакцимес шаерысьтымы вань гуртъёсысь семьяосын герӟалляз. Газетэ рос-прос гожъясьёс но данак луизы. «Дыр вуиз ини, – одӥг пол шуиз кивалтӥсьмы, – соосты ӧтьыса, ог-огенызы тодматыны, асьмемын, писательёсын, суредасьёсын пумиськытыны. Бызьылонэз, сюлмаськонэз трос луоӟ кӧлон, сюдон интыос но кулэ. Цирке, Удмурт театре но вуттылоно, кузьымъёс но дасяно. Нош вуоно кивоштӥсьёсты дасяны сюлмаськись муртлы со вормонтэм ӧвӧл, со уката сэзъялмытӥсь, йыг-йыгмытӥсь ужрад».
 Озьы пинал гожъясьёсты слётэ люкамы. Отчы ветлэмзы пиослы но нылъёслы азьпал улоназы сюрес возьматӥсь, кулэ мылкыд сётӥсь, сюлэмазы тылӝу аратӥсь но, оло, луиз.
 Редакциын соку ужамъёс уноез улонысь кошкизы ни. Но пумиськыкумы та кутсконмы котьку но тодамы лыктэ вал. Газетмес яратыса, лыдӟисьёсмес, гожъясьёсмес гажаса ужамы угось.

Елена Кондратьевна Глебова,
1968–1986-тӥ аръёсы
«Дась лу!»-ын ужам журналист.

Тау, тыныд школамы!

Кӧня ке ӝож но луэ

Берпуметӥ нуналъёссэ-арняоссэ ветлӥськомы дуно Юсь школаямы. Таиз дышетскон ар туж чаляк ортчиз кадь. Тани-тани экзаменъёс кутскозы, школаын басьтэм вань тодон-валанмес отын возьматомы. Мон нош ялан малпаськисько ай: кытчы мыноно дышетскыны, кин луоно?
Школаын дышетскем аръёсме ноку уг вунэты, со вань улытозям пыраклы сюлэмам, йырвизям кылёз. Нош ортчем аръёс ӵоже маиз гинэ ӧй вал! Но котьку ӵош, тупаса улӥмы. Со сярысь малпаськод ке, кӧня ке ӝож но луэ, угось ортчемзэ уд берыкты.
Тау кареме потэ нырысетӥ дышетӥселы С.Т. Итешиналы, классэн кивалтӥсьмылы Г.П.Пушиналы, вань ды-шетӥсьёслы! Али гинэ валаськод, кудбыдӟа сюлэм, чидан, нылпиосты но дышетоно предметтэ яратэм кулэ, номыр валантэмез медаз кыльы шуыса.

Света БАЙСАРОВА.

 

Пумиськонъёс луозы на

Уз вуны со нунал, ку ми нырысьсэ школае лыктӥм, отын гожъяськыны но лыдӟиськыны дышим. Нырысетӥ школамы поплэн азьвыл юртаз интыяськемын вал. Нимысьтыз сиськоннимы отын ӧй вал бере, колхоз столовое ветлоно луылӥм. Тоняпайлэн ческыт пӧрамез али но нырез бичатэ, тодэ ваёнъёсы выйытэ.
Тужгес вунонтэм кылиз Кунгуре ветлэммы. Туж чебер пещераосы пырам, историысь пӧртэм учыръёсты веразы милемлы отын.
Гужем вуыса, арлы быдэ ӧсъёссэ усьтылӥз шутэтсконъя «Лучик» лагерьмы. Поваръёсмы ческыт сюдыны сюлмаськылӥзы, воспитательёсмы котькуд нуналэз вунонтэм карылӥзы.
Секыт луоз люкиськыны школаен, дышетӥсьёсын. Малпасько, котькуд адями та пыр потэ. Школаеныз данъяськон мылкыдыз нош вань улытозязлы кыле. Тау тыныд, Школае! Ӟыгыртыны луонтэм бадӟым сяська керттэт кузьмасько! «Ӟеч лу!» шуыны ум дыртӥське, малы ке шуоно шунытэсь пумиськонъёс азьпалан одно луозы на!

Лена ЗАГРЕБИНА.
Юськи школа.
Завьял ёрос.