Get Adobe Flash player
АУ УР "Ӟечбур!"

Вуоно физик кылчи луиз

366-2Вотэс бамын «уякум», удмурт дӥсен пилэсь туспуктэмзэ синйылтӥ. Вильнюсын ортчем конференциын со Удмурт шаермы сярысь доклад лыдӟем. Симонас Норейкис шаермылэн палэназ улэ ке но, Удмуртие вуылэмез вань. Удмурт дэрем солы элькунысьтымы Декоративно-прикладной искусствоосъя центрын вуриллям. «Мон Литваын вордӥськемын, ӝыныё – литовец, ӝыныё – поляк, соин ик вордскем кылы – кык. Пичи дыръям анай-атаеным Скандинавие ӵем ветлӥм. Отысен ик фин кылэн тунсыкъяськонэ кылдӥз», – ачиз сярысь гожтэ Симонас. Польшаысь Познань университетын фин филологияя тодон-валан люкакуз, ИФУСКО-лэн Тартуын ортчем конференцияз пыриськем, отын удмуртъёсын тодматскем. «Мынам удмурт эшъёсы пумен тросгес но тросгес луизы. Соос ик удмурт кылэз дышетыны дэмлазы. Ӟуч кылэз умой тодӥсько бере, нырысь мылкыды ӧз кылды вал, нош берло малпай: нош малы дышетонтэмез?» – веранзэ азьланьтэ Симонас. Удмурт кылэз со нырысь скайп пыр дышетэм, нош гужем, тодон-валанзэ муромытон понна, Ижкаре вуылэм.
«Литва, поляк, ӟуч, финн, англи но удмурт кылъёсты мон туж умой тодӥсько, кӧня ке – эстон но латыш кылъёсты. Али мон Хельсинкиысь университетын фин-угор кылтодонъя магистратураын тодон-валан люкасько, Литваысь фин-угор гидронимъёсты эскерисько. Сӥзьыл ӝыны арлы Тартуэ мыно. Отын коми кылэз дышетыны мылкыды вань. Азьланяз аспирантурае йыгаськеме потэ на», – мылкыдзэ усьтэ Симонас.
– Симонас, кылъёсын тунсыкъяськонды пичи дыръяды ик кылдӥз-а, яке бергес?
– Пичи дыръям, вань пияшъёс сямен ик, машинаосын, легоен шудӥ, дыр… Эшшо – паяльникен. Мынам ӵужатае – профессор, соин физикая экспериментъёс ортчытъямы. Кин луон пумысен пӧртэм малпанъёсы вал: лэсьтӥськись, ботаник, химик, инженер. Кылъёсын тунсыкъяськыны кутски дас вить арескам. Со мылкыды ик вормиз.
– Шаркан ёросын ортчем «Быг-быг» фестивале но вуылэмды вань. Асьтэлэсь нырысьсэ сиён дасямдэс тодады вайиськоды на-а?
– Али туж ӵем пӧраськисько. Сӥльын картошка дасяны кельше. Выль рецептъёс интернетысь шедьтӥсько. Эшъёсме шаньгиен утялтэме вань. Ческыт шуизы. Туж яратӥсько удмурт сиёнъёсты, губиен перепеч но табань пыжисько. Литваын картошкаен табань, цеппелины пӧрало. Таиз — гырезь но пӧзьтэм картошкаослэсь лэсьтэм но сӥльын яке кузятэмен тырмытэм нугылиос. Нош нырысьсэ плита дуре лыктэмелэн емышъёсыз луизы пыжем курегпузъёс но пӧсь бутербродъёс.
Озьы тӥни, ӝыныё литва, ӝыныё поляк пи пӧраськыкуз но, мукет калыкъёслэн сиён-юонъёсынызы тодматскыкуз но кылъёсын тунсыкъяськонзэ уг ышты. Дыр шедьтэ кар ульчаостӥ поръяны, чебересь интыосты туспуктэм вылэ уськытыны, велосипедэн ворттылыны.

"Эстонъёс удмуртъёс кадь сабырес"

366Удмурт нылкышно ог ньыльдон ар пала улэ ини Эстониын. Ас шаередлэсь, калыкедлэсь кема аръёс ӵоже палэнын улыса, луэ меда анай кылдэ утьыны? Капчи-а мукет калыклэн сям-йылолъёсызлы дышыны? Та юанъёсты сэрттон-пертчон вылысь вазиськи мон Любовь Архангельскаялы. Ассэ со Любапай гинэ шуытэ.
– Вордӥськи мон Татарстанысь Менделеевск ёросысь Тэремшур гуртын. Татын кема ик ӧй улы ке но, вордскем гуртме вань сюлмысьтым яратӥсько, нимыз ик туж мусо потэ. Мыным 3 арес дыръя ӟуч гуртэ улыны выжимы. Отын анае гинэ монэн удмурт кылын вераськылӥз. Куддыръя возьдаськисько но вал, нош табере ӟеч кылын гинэ тодам вайисько, туж тау карисько солы. Кыӵе нодлыко нылкышно вылэм со. Уг ке но вераськиськы вал мон соин удмурт кылын, верамъёссэ валалляй. Дас куать аресэ тырмыса, удмурт кырӟанъёсты дышетон мылкыды пуромиз. Соин ик Тэремшуре ӵемгес берталляны ӧдъяй. Дадаелэн кышноез монэ кырӟаны дышетӥз. Мон сое Женианай шуисько вал (соослэн Женя пизыя). Кузпалы ӟуч ке но (Москваысь), монъя озьы ик удмурт кылын вазиськылӥз.

Быдэс текст

"Музъемелы йыбырттэме потэ"

36 9961Кылбурчи но филолог, Россиысь писательёслэн огазеяськонзылэн ёзчиез, Удмурт Элькунысь сӥё-дано тодосчи, кылтодосъя доктор, 20-лэсь трос книгаослэн авторзы В.М. Ванюшев котькуд дышетскон ар кутскыку Кизнер ёросысь дышетскисьёсын пумиськылэ. Туэ Василий Михайлович ас дышетскем школаяз, Ӟуч Кусое, вуылӥз. Соин ӵош ми но кузь сюрес вылэ потамы.
Ческыт перепечен, кутэмнянен, Василий Михайловичлэн кылъёсызъя гожтэм «Кизнер палъёс» кырӟанэн пумитазы кусоос кунооссэс. Пиналъёс но дышетӥсьёс, мылкыд карисьёс дуно кунозэс, рос-прос дасяськыса, школа библиотекаын витё ни вылэм. Василий Михайловичлэсь кылбуръёссэ лыдӟизы, кырӟанъёссэ быдэстӥзы.
Улысь Кусо-Каксяын вордскем но Ӟуч Кусоын тодон-валан басьтэм аспалзы трос тунсыкозэ мадиз.
— Куке но та палъёсын вордӥськем чуръёсме кылыса, мон туж шумпотӥсько. Озьыен, соос уло, чузъясько. 1-тӥ куарусёнэ ёросысьтымы школаосы потан мон понна ӟеч сямлы пӧрмиз ни, малы ке шуоно та ёросын улӥсьёс мон понна – матысь адямиос. Соос мыным тодон-валан, быгатонлык сётӥзы, нош мынам табере соосты тӥледын шори люкеме, ваньмыз понна ас музъемелы но школаелы йыбырттэме потэ. Школалэн юртэз выль ке но (азьло со воксё мукет интыын сылӥз), со – мынам дышетскем школае, – мылкыдъёссэ усьтыса шуиз Василий Михайлович. Собере кылбуръёсызлэн кызьы вордӥськемзы сярысь мадиз, кӧнязэ ке лыдӟиз, юанъёс сётъяз.
– Та пумиськонмы, мон оскисько, тӥледлы кыӵе ке но мылкыд сётоз, маке но умойзэ, кулэзэ лэсьтыны, тодон-валандэс будэтон сярысь сюлмаськыны бурдъялоз, – веранзэ йылпумъяса шуиз Василий Михайлович. Собере кылбур лыдӟем пиналъёслы но библиотекалы аслэсьтыз книгаоссэ кузьмаз.
Пумиськон пиналъёс понна праздниклы пӧрмиз. Та нуналэ уго соослы «Ӟечбур!» газетэн но тодматскыны шуд усиз, нош ми соосты газетамы туспуктылӥм.

Надежда Шкляева.
Кизнер ёрос.

Анайлэн тылгизьыез усьтэ паськыт дуннеез

 344Быдэс семьяен газетэ гожъяськисьёс шергес пумиськыло, соин но, лэся, газетлэн историяз соос бадӟым пытьы кельто. Берло ог кызё аръёсты басьтоно ке, пусйытэк кельтыны уг луы Татарстанысь Кукмор ёросысь Лельвиж гуртысь Мурзинъёсты. Соослэн семьяязы вить пиналъёс будӥзы. Ваньзы сямен соос газетэ гожъяськизы. Анайзы Антонида Васильевна кема аръёс ӵоже удмурт кылъя но литературая дышетӥсь луыса ужаз, ачиз но мылысь-кыдысь гожъяськылӥз, пиналъёсызлэсь но мылкыдзэс ӝутылӥз. Антонида Мурзиналэн «Шырчик» кылбурезъя крезьгурчи Пантелей Кузнецов кырӟан гожтӥз, со кырӟанъёсын «Чибори» бичетэ пыртэмын. 8-тӥ куарусёнэ Антонида Васильевна 60 арес тырмон юбилейзэ пусъёз. Таин валче газетмылэсь матысь эшсэ вань сюлмысьтымы ӟечкыласькомы, удмуртлыкез гажась нылпиос будэтэмез понна тау кариськомы. Та вакытэ соос ваньзы улонын ас ӧрзэс шедьтӥзы ни, нош вордскем кылзэс яратон мылкыдзы ноку сӥясьтэм яркыт тылси выллем югдытэ улон сюрессэс. Сыӵе ик ӟырдыт сямо луыны, шуг-секытъёслы сётскытэк улыны мылкыд каро соос анайзылы. Ӟечкыланъёс вӧзы итӥське кузпалыз Николай Максимович но.
Одӥгез пизы та вакытэ Эстониын улэ. Анатолий Мурзинэз тросэз тодо, дыр, Интернет вотэсысь «Кызьы удмурт сямен луоз?» огинъя.

 

Быдэс текст

Утялтӥськод ке, котьма удалтэ, яке Ма муген удмурт нылкышно йыркышетсэ куштэ

Пичи Пурга ёросысь Вуж Монья гуртысь Ольга Николаевна Михайловалэн палэнын улӥсь пиналъёсыз вань бере, машина куараосты кылэ ке, сюлмыз нёркак луэ. Оло, кудзы ке берто-а шуыса малпа, вылды. Тани али но, редакцилэсь машиназэ адӟыса, пумитамы потӥз. Со ик тодматскеммы но луиз.
– Кузпалыным Семён Куприяновичен куать нылпи вордӥмы, – вера Ольга Николаевна. – Ваньзэс пыд йылазы султытыса ӵош ӧм вуттэ, вазь кошкиз улонысь. Кайгуме кырӟаса-вераса буйгатылӥ. Пиналъёс медаз шӧдэ шуыса, кыре потӥсько вал. Шаймы татын гинэ но, шай пала учкыса бӧрдӥсько-верасько… Ай соку кыкез дышетско вал, автобусэ билетлы но коньдон ӧз тырмылы куддыр, бус-кельёс доры пунэмаськыны ветлылӥ…

Быдэс текст