Get Adobe Flash player
АУ УР "Ӟечбур!"

Экто но бызьыло, киужен выро

49 5081
49 5084Комак школаысь 6-тӥ классын дышетскись эшъёс Валя Александрова но Аделина Максимова спортэз туж ярато. Куасэн но, пыдын но бызьыло. Валя ёрос ӵошатсконъёсы пыриськылэ, Ижкаре но вуылӥз ни. «Югдон» спорт лагерьын шутэтскемез но кемалы тодаз кылиз. Валя котыр ласянь адӟем карымон нылаш. Дневниказ «4»–«5»-ёс чеберъясько. Школаын радъяськылӥсь ужрадъёсы но шумпотыса пыриське, кружокъёсы ветлэ. Усточиослэн ёрос конкурсазы аспӧртэм киуж лэсьтӥз. Табере солы йылпумъян лэсьтэмзэс чидатэк возьма. 2-тӥ четвертез «куиньёстэк», тросгес «витьёс» басьтыса йылпумъямез потэ.

Нош Аделиналэн быдэс семьяез ёрос конкурсъёсы пыриськылэ. Кырӟаны-вераны туж мыло-кыдоесь соос. Атайзы Анатолий Михайлович семьязэ ужрадъёсы кыске, со усто арганчи. «Александров» КФХ-лэн юрттӥсез луыса ужан висказ котькытчы вуттӥське. Аделина но киужъёсъя кружокъёсы ветлэ. Туж чебересь пӧрмо быдэстэм ужъёсыз.
Та нылъёс кыкназы ик «Вишенки» ансамбле ветлэмын, туж чебер экто. «Девичий переполох» эктонэн «Хрустальный башмачок» ёрос конкурсын 1-тӥ инты басьтӥзы.
Тани таӵе усточи нылъёсын-спорт-сменъёсын тодматӥз милемыз школаязы радъям пумиськон дыръя удмурт кылъя но литературая дышетӥсьсы Т.С. Александрова.

Сюрногуртысь азьветлӥсьёс

IMG 0290Дышетскон арлэн нырысетӥ четвертез гинэ йылпумъяськиз ай ке но, Дэбес ёросысь Сюрногурт школаысь 11-тӥ классын дышетскись Глеб Афанасьевез ИжГТУ-ын витё ни.
Арлы быдэ отын ортчылӥсь «Звезда» олимпиадае пыриськыса, Сюрногурт школаез зарни медален быдтэм Аня Урсегова но кылем арын та вакытэ ик ИжГТУ-лэн студенткаез луиз вал ни. Туэ тани

IMG 0303Глеблы сыӵе шуд усиз. Олимпиадаын со 3-тӥ инты басьтӥз. Пияш туж яратэ информатикаез, ӵем пыриське конкурсъ-ёсы. Школалэн директорез Н.П. Максимова верамъя, пияш туж ӟеч вала та предметэз, роботъёсын тунсыкъяське, пичиысен кружокъёсы ветлэ. «Анти-Марафон-1» конкурсын вормисе потӥмы но, милемлы лего-робот сётӥзы, – вера Надежда Петровна. – Ми данъяськиськом та пиналэн. Кылем арын со пичиосын каратэя кружок нуиз. Аслаз курень поясэз вань, Дэбесын «Карат» клубе ветлыса басьтӥз. Глеб ик гуртысьтымы тросэзлы мӧйыослы РПГУ-е регистрироваться кариськыны юрттӥз».

***
Ушъямон, сюрногурт пиналъёс мӧйыослы юрттыны басьтӥсько шуыса. Школаязы волонтёръёслэн отрядзы но ужа, «Сюрприз» нимаське. Отчы ветлӥсьёс пӧлысь одӥгез – 11-тӥ классысь ик Ксюша Карачёва. Таиз нылаш ӟуч литератураез туж яратэ, журналист луыны мылкыд каре. Та удысъя быгатонлыксэ волятон понна, школаязы потӥсь газетазы гожъяське. Со сяна, Ксюша туж яратэ эшъёссэ валтыны, пӧртэм тунсыко ужъёсы бурдъяны. Со – лидер, бадӟым классъёсын дышетскисьёслэн «Бадӟым кенешсылэн» кивалтӥсез.
– Ми толэзьлы быдэ люкаськылӥськом: план кутӥськом, быдэстэм ужъёсмы сярысь вераськиськом. Нош ужаськом нуналлы быдэ. Тунсыкъяськонъёсмес лыдэ басьтыса, котькудмы кыӵе ке но удыс понна кыл кутӥськом. Кин, шуом, умой суредаське, со бордгазетъёс понна кыл кутэ, кин спортэн выре, со тазалыкез кыдатӥсь ужрадъёс сярысь сюлмаське… Кенешамы асьмеос ик туж кулэ луись пуктэтъёс (решениос) кутыны быгатӥськом. Мыным туж кельше, дышетӥсьёс но монэн кенешо шуыса, – мылкыдзэ усьтэ Ксюша.
– Та быдӟа ныпъетэз валтӥськод бере, маин ке мукетыныз вырыны дырыд кыле на-а? – юасько.
– Кыле. Волонтёр отрядысь эшъёсыным социально-реабилитационной центрын улӥсь мӧйыос доры ветлӥськом, концерт возьматъяськом. Котькуд тулыс, 9-тӥ Май азьын, гурт урамъёсмес чылкытатӥськом, писпу мерттӥськом. Мукет ужъёс но шедё…
Ксюша школаязы азьветлӥсь бере, оскон вань, солэсь котькытчы вутскыны, выль иворъёсты лыдӟисьёс доры дыраз вуттыны быгатӥсь журналист пӧрмоз.

Надежда Шкляева.

Мультфильм ӧтиз, суредаськон бурдъяз

Туэ гужем Эстониын ортчем фин-угор киноосъя куинетӥ фестивальын быдэс дуннеысь мылкыд карисьёслэсь ужъёссэс адœыны, соослы дунъет сётыны луиз. «Д. Корнилов, А. Добряков, А. Першин, Сидоров кузпалъёс – ваньзы вормисе потӥзы. Маша Корепановаез но кызь вить егит эстон крезьгурчиосты кылзыса, «Соперницы» киноез учким. Денис но Анатолий киноосынызы калыкез бӧрдытӥзы, Андрей туж мур исаз, нош Сидоровъёс мультикенызы серекъятӥзы», – фестиваль бере кылдэм мылкыдзэ шараяз Петр Палган.
Мультфильм – со яркыт но бордаз кыскись улон. Экран вылын улœем улонлэсь радъяськемзэ, геройёслэсь сямъёссэс пичи мурт суредъёс пыр адœе. Удмурт кылзэс тодӥсь яке дышетыны мылкыд карись пиналъёс табере анай кылынызы пуктэм мультфильмъёс учкыны быгато. Соос пӧлысь одӥгез – «Кечпи но кион». «Зэмос удмурт веме» огазеяськонлэн юрттэмез улсын, сое кылдытон бордын тыршиз Сергей Сидоров. 28-тӥ коньывуонэ 2014-тӥ арын аслаз вотэсбамаз Сергей тазьы гожтэм:
«Туннэ анимацилэн калыккуспо нуналэз. Со 2002-тӥ арын юнматэмын, анимаци амалэн нырысьсэ кино возьматэм дырысен 110 ар тырмонлы сӥзьыса. Суредъёсты нырысьсэ «улӟытӥзы» 1892-тӥ арын. Со ик мультфильмлэн вордӥськемез луиз. Удмурт мультипликацияя ужъёс трос ӧвӧл на ке но, ӧр азинске».
Солы но Настя кузпалэзлы мон кӧня ке юанъёсын вазиськылӥ.123-33
– Сергей, кызьы но малы мультфильмъёс кылдытъян борды басьтӥськид?
– Мультфильмъёсты пичи дыръяз котькин яратэ. Мынам пичи дырысеным вакчиесь анимациос кылдытъяме потылӥз. Нош университетын дышетскыкум анимацияя программаосын тодматскыны кутски. Нырысетӥез мультипликационной уже 8-тӥ Южтолэзьлы сӥземын. Сое «Мынам Удмуртие» телеканалын возьматъязы. Анимация удысэ сюресэ со бордысен лёгиськиз. Кузпалэным Эстоние мультфильм кылдытонъя мастер-классэ ветлӥмы, отын ӵошен «Крестьян но вумурт» удмурт калык выжыкылъя пластилинлэсь мультфильм пӧрмытӥм.
«Мурӝол Underground хип-хоп» проект улсын Сергей Богдан Анфиногеновлэн кырœанэзлы анимаци амалэн нырысетӥзэ удмурт клип кылдытӥз.
– Кӧня асме тодӥсько, пыр суредаськись луэме потэ вал. 8-тӥ классысен художественной школае ветлӥ. Озьы УдГУ-ысь художественной факультетэ капчиен пыри, – веранзэ азьланьтэ Сергей. – Мон асме художник гинэ яке аниматор гинэ шуыны уг быгатӥськы. Мыным соос кыкез но туж матын. Шаржъёс но портретъёс лэсьтон – со хоббие, озьы ик пичияк коньдон поттыны луонлык. Шумпотӥсько, лэсьтэм уже адямиослы кельше, сое вылӥ дунъяло ке. Мылкыд соку бурдъ-яське.
Сергеен Настя Эстониын уло. Удмурт кылзэс палэнын но уг вунэто, солэсь данзэ эшшо но будэтыны сюлмасько. Сое Ирина Зангариклэн вераменыз но юнматыны луоӟ «Удмурт луэммес тодӥсь эшъёсмы милемлы удмурт йӧскалык ӝыт ортчытыны ӵектӥзы. Патриот мылкыдъёсмы улсын ми Настяен соку ик соглаш луим… Нош кызьы ужрадэз быдэсак англи кылын нуоно?! Ми быдэстӥм, Сидоров кузпалъёслы но œуч-испан-эстон эшъёсмылы луыса».
Сергей Тарту университетын докторантураын этнологлы дышетске. (Этнология калыкъёслэсь улэм-вылэмзэс, фольклорзэс, осконъёссэс, огъя азинскемзэс эскере, нимысьтыз этносъёсты ог-огенызы ӵошатэ. Со этнография но антропология тодосъёслы матын ке но, азяз пуктэм ужпумъёсыныз висъяське). Настя социологияя факультетын тодон-валан люка. Пичи дырысеныз ик дышетӥсь луэмез потэ вылэм. Малпанзэ быдэсмытӥз Удмурт Кун университетысь Педагогикая но психологияя институтын. Со табере – дышетӥсь-логопед.
– Ма тӥледыз паймытэ Эстониын? Асьтэос нош маин паймытыны быгатӥськоды?
– Эстон музъем вылэ лёгиськеммы бере, чылкытлыксы нырысь ик син шоры йӧтӥз. Газонъёссы котькытын ӵышкемын, утялтэмын, одӥг жуг-жагез но уд адœы. Калык туж вазиськись, мае ке ӧд вала ке, пыр-поч валэктозы но возьматозы. Кылымтэ-адœымтэ карыса ноку но уз кельтэ.
Милям но вань маин паймытыны. Тартуын кылдытэм «Юмшан гур» ансамбле котькуд мылкыд карись лыктыны быгатэ. Отын ми эктӥськом, кырœаськом, концертъёс сётъяськом. Эстонъёс но татын улӥсь мукет калыкъёс паймо капчи мылкыдмылы, куно пумитаны быгатэммылы, – юанэлы пыр-поч валэктон сётэ Настя.
– Эстоние сюресты кызьы лёгиськиз, Настя?
– Асьмеос удмуртъёс бере, мукет фин-угор калыкъёслэсь сям-йылолъёссэс, кылзэс тодэммы потӥз. Эстониын трос удмуртъёс уло но дышетско шуыса кылэммы вал ини, соин ик кышкатэк отын дышетскыны малпамы. Вераны быгатӥськӧ удмуртъёсты татын ярато, номыр алама верамзэс кылылэммы ӧвӧл. Эстонъёс удмуртъёс кадь ик лякытэсь но зӥбытэсь.
– Кыкнады но дышетскиськоды, кырœаны-эктыны ветлӥськоды. Сюлэмыд косэмъя эшшо маин ке выриськод на-а?
– Ми кузпалэным кыкнамы но творческой адямиос. Мон ваньмыкум гижыосты чеберъясько. Вотэсысь «КильтроНыл» огазеяськонэз учкыны быгатӥськоды, – шуиз Настя. – Гижы лэсьтонэн нырысетӥ курсын дышетскыкум тодматски. Буяськон арбериос пичи дыръям ик тунсыко потылӥзы. Но соку магазинъёсысь лак басьтыны луонлыкъёс ӧй вал. Анай-атайёс но ӧз кузьмаллялэ. Бадœымгес классъёсысь эшъёсы вужмем-куасьмем лакъёссэс сётъялязы, соослы но мон туж шумпотылӥ. Куинетӥ классын дышетскыкум сузэре ӵыж-ӵыж горд лак кузьмаз. Соку мон вань мунёосылэсь, писэйёсылэсь но пунымылэсь гижыоссэс соин буяй.
– Озьыен, пичи дырысеныд суредаськыны яратӥськод?
– Туж яратӥсько, али но, мылкыды луэ ке, карандаш кутӥсько. Мынам ӵужатае суреданъя дышетӥсь вал. Выжы кыске-а мар-а?
Кузпалъёсын вераськонмы, мультфильмъёс бордысен кутскыса, кыштырак гинэ удмурт кылэз дышетон борды выжиз. Лыдӟисьёсмылы вазиськыса, Настя но Сергей Сидоровъёс шуизы:
– Быдэ вуыса ни валано вылэм, кыӵе мусо но чебер, сюлме пырымон асьмелэн анай кылмы, соин ик вераммы потэ: дышетэ удмурт кылдэс, вераське но данъяське анай кылыныды! Оло, со тӥледлы выль сюресъёс усьтоз, кунгож сьӧры но вуттоз.

Егитъёслы – сюрес!

IMG 0317Дэбес ёросысь Сюрногурт школае таяз арын егит дышетӥсьёслэн вуэмзылы нылпиос но, дышетӥсьёс но туж шумпотӥзы.
«Милям сизьым кузя пенсионеръёс ужало, – вера директорзы Надежда Петровна Максимова. – Кызьы ке но егит кивоштӥсьёсты дасяно ук. Асьме пиналъёс тросэз дышетсконзэс быдто но городэ кылё. Англи кылъя дышетӥсь утчаса, Глаз пединститутэ, УдГУ-э вазиськи. Удмурт филологияя институтысь директор Наталья Владимировна Кондратьева юрттӥз. Со удмурт-англи факультетысь куинетӥ курсысь студентъёсын вераськем. Кӧня ке улыса милемлы А.А. Нечаева жингыртӥз.
«Мон ачим Алнаш ёросысь, – маде Алёна Алексеевна. – Эшъёсы Пермь улосвылэ но кошкылӥзы. Ужазы но, дышетсконзэс но быдтӥзы. Соос шоры учкыса, мон но соглаш луи. Нырысетӥ арзэ дышетӥсько, ваньмыз кельше ай. Улон сэрег – комната – висъязы. Пиналъёс кылзӥсько, 5-тӥ класслэн кивалтӥсез луисько на. Сессия дыръя дышетсконме азьланьтыны Ижкаре ветлӥсько».
«Ирина Николаевна Лыскова та школаез ик быдтӥз, – егит дышетӥсьёсынызы тодматонмес азьланьтӥз Надежда Петровна. – Малпаз вал агроном луыны, Гурт хозяйствоя академиез йылпумъяз. Но ужез сюлэмызъя луымтэ, школае лыктыны мылкыд кариз но Глаз пединститутын тодон-валанзэ будэтӥз на. Туэ ми солы 5-тӥ классын ӟуч кылэз но литератураез нуыны оским. Флористикая но театральной кружокъёс нуэ. Секретарь луыса, документъёсмес но печатла. Вань ужмес тодэ ини».
IMG 0154Алёна Викторовна Карачёва школаын кыкетӥ арзэ ужа.
«Али 2-тӥ классэз дышетӥсько, – шуэ со. – Ужаны яра, пиналъёсы визьмоесь. Мынам кирос мамае дышетӥсь. Солэсь адӟем карыса, Глазкарысь пединститутэ мынӥ. Мон татын продлённой группаын воспитатель луыса ужай ни вал. Собере бызи, пинал вайи. Одӥг ар гуртын пуки но, выльысь школае ӧтизы».
Сюрногуртэ эшшо но трос егит дышетӥсьёс мед вуозы. Соослы татын туж шумпотозы, визь-кенеш но сётозы, йыг-йыг пыд вылазы султыны но юрттозы.

Выль пушъетъёслы мылкыд сётыса...

IMG 9109Нылпи кылбурчи Иосиф Иванов ар ӵоже ӧвӧл ни пӧламы. Дано асмуртсэс буре вайыса, солэн вордскем Улын Котныр гуртысь школаяз буре ваён пул шуккизы. Та ужрадэ вуылӥзы кылбурчилэн матысь эшъёсыз, ӵыжы-выжыосыз, ёрос кивалтӥсьёс, культура удысын ужасьёс.
Тодэ ваён ӝытын тросгес чузъяськиз Оси ним. Гуртоосыз но матысьёсыз угось солы тазьы гинэ вазиськылӥзы. Школаысь пиналъёс пичи Осилэн гожъяськон удысэ нырысь вамышъёс лэсьтэмез сярысь сценка возьматӥзы. Аслаз нунокъёсыз солэсь кылбур чуръёссэ лыдӟизы. Иосиф Зотовичез нылпиосыз но соослэн нылпиоссы кылбураны бурдъяллязы.
Котькин пусйиз солэсь сабыр луэмзэ. Та сямыз ик юрттӥз, луоз, 35 арлэсь ятыр «Алнаш колхозник» газетлэн редакцияз ужаны. Ёросысь егит гожъясь-ёсты со ас котыраз люкаса возьылӥз. Редакцилэн юртаз толэзьлы быдэ «Ошмес син» огазеяськонлэн занятиосыз ортчылӥзы. Татчы вуылӥзы тодмо писательёс но кылбурчиос. Палэнысь нокин лыктыны быгатымтэ дыръя Иосиф Иванов но Иосиф Бобров нылпиослэсь ужъёссэс кыкназы эскерылӥзы.
Кылбурчиез буре вайыса, Улын Котныр школалэн азбараз писпуос мерттӥзы. Оскем потэ: соос будозы, чеберскозы, выль пушъетъёслы мылкыд кузьмалозы.

Антонида ЕРМОЛИНА.
Алнаш ёрос.

Ужрадысь туспуктэмъёсты учкыны быгатоды ВКонтактеысь "Ӟечбур!" группаысь.