Get Adobe Flash player
АУ УР "Ӟечбур!"

«Мон тӥляд кураторды луо»

3 10065Та туспуктэм вылын УдГУ-ысь филология факультетысь 2-тӥ курсын дышетскисьёс 45 ар талэсь азьло.
1971-тӥ арын Удмурт пединститутэ дышетскыны пыремъёс доры егит дышетӥсь йыгаськиз но шуиӟ «Ӟечбуресь! Мон тӥляд кураторды луо». Тодмотэм кыл, но ятвылтӥм: классноймы, иське.
Валентин Кельмакович Татариысь Кукмор ёросысь вылэм. Вераське дыртыса, но кылъёссэ чот-чот, висъяса кадь вера. Со милемыз нуналысь нуналэ кыл дуннеетӥ валтыны кутскиз.
Огаз параын, доска вылэ ик гожъяса, Вершинин Коляен «спектакль» возьматӥзы.
– Зӧк — со ми сямен бадӟым. Зӧк адями – со бадӟым адями. Нош зӧк мае ке шуозы кыз... Паймоно кадь: зӧк пи, кыз ныл… Глаз палъёс сямен озьы вылэм, Коля ӵапак отысь. Дышетӥсен эчешыса-споръяськыса кадь выриз...
Нуналысь нуналэ удмурт кыллэн пӧртэм вераськетъёсаз пыдлогес пырим. Валентин Кельмакович йырвизьмес ӝог бергатыны дышетӥз. Дыг малпаськисьёслы пӧсь йӧтылӥз.
Кулэ дыръяз эш но луылӥз. Сое ми 2-тӥ курс бере, диалектологияя экспедицие Кизнер ёросысь Безменшур палъёсы потакумы, ӟеч валам. Люкам кырӟанъёсмес уже кутыса, концерт но пуктыны вуим. УдГУ-ын ортчем фольклор ӝытын кырӟам, собере ӝыт пуконэз телевидениын возьматӥм. «Пислэг но пислэг пуксёнтэм, нинь пуппы кадь мугоръёсы вал...» кырӟанэз ӵаж-ӵаж ик кырӟаллязы пиос, соосын ӵош – Валентин Кельмаков но. Та но «Марлы тӥяй...», «Ышиз мынам зундэсэ но...» калык кырӟанъёс «Италмас» ансамбльлэн репертуараз пыризы.
Вераса быдтод-а, мар но ӧй вал яратоно дышетӥсенымы герӟаськемез...
Табере Валентин Кельмаков – нимо-дано профессор, кылтодосъя доктор, литература кыллэсь жагъёссэ «кокчась», туж уно научной ужъёслэн, пособиослэн, кыллюкамъёслэн авторзы. УдГУ-ысь огъя но фин-угор кылтодонъя кафедраосын кивалтэ на. Группамы но огшоры вылымтэ. Валентина Черыгова, Галина Зиновьева, Рита Хайдаршина, Римма Зайцева, Владимир Тополев, Василий Андреев, Раиса Куликова, Илья Байметов, Олег Четкарёв, Людмила Кутянова... Та нимъёсыз тросэз тодӧ дано дышетӥсьёс, журналистъёс, редакторъёс, писательёс луизы соос. Туж жаль, куд-огез эшъёсмы пӧламы ӧвӧл ни.
Кылем гудырикошконэ, огаз пӧсь нуналэ, ас университетамы ик группаенымы пумиськон радъямы. Мӧзмем мылкыдъёсмес кисьтӥм, котькудӥз ас сярысьтыз вераз. Кырӟанъёсмес тодамы вайим но выльысен паймим: Валентин Кельмакович пумтэм-йылтэм кырӟан тодэ!
Толшоре Валентин Кельмаковичлы 75 арес тырмиз.
Нош соку... 30 арес но ӧй вал на.
Озьы ке но...
Со ми понна егит,
Пельпумъёсыз
паськыт,
Пислэг но пуксёнтэм...

Татьяна Чернова

ВАНЬ УЛОН СО - МАДИСЬКОН, яке Кызьы удмурт писатель США-лэн президентэз луиз?

DSCN0248«Одно мыноно»

«Кызьы уд мыны Писэйгуртэ? Отын Герман Ходыревез данъяло, туала нылпиосты творчество удысэ кыскыто. Туж бадӟым ужез соос лэсьто. Валасьёс, дунъясьёс вань шуыса тодӥськод ке, эшшо тросгес лэсьтэм потэ ук», – ортчоно ужрад пумысен мылкыдзэ тазьы усьтӥз «Кизили» журналлэн редакторез У.Ш. Бадретдинов.
Пусъем нунал вуон азьын тодмо луиз, Ульфат Шайхудтинович Башкириын на, пе. Отын кык нунал ӵоже удмуртлыклы сӥзем пумиськонъёс ортчизы. Бер ӝыт сюрес вылысь вуэм адями вазь ӵукна Алнаш кеме сюрес вылэ уз поты ни, дыр, малпай. Нош Ульфат Шайхутдинович, одӥг сюреслэсь жадемзэ веськатыса вуттӥз-а, ӧз-а – мукет сюрес вылтӥ рульзэ бергатэ ни. «Верам кылыз вылын сылэ вылэм», – малпай мон. Ачиз Удмуртиын будэмын ӧвӧл ке но, татысь котькыӵе гуртысь калыкез тодэ, гурт пумысен маке тунсыкозэ вераны быгатэ. Писэйгуртэ нуись куинь сюресэз тодэ. Удмуртъёслэн «котыр сюрес – вӧй сюрес» шуэмзыя, Туймыйылтӥ кожоно кариськиз. Удмурт кун университетын ӵош дышетскем эшез, пе, татын улэ.

 

Быдэс текст

Газет - син азям, крезьгур - пель сьӧрам...

2 0248

Анастасия Гребинаез мон пичи дыръям ик тодӥсько ни вал, фамилиез угось «Дась лу!»-ын ӵем пумиськылӥз. Нош нырысьсэ адӟи 10-тӥ классын дышетскыкум. Соку милемыз удмурт кылъя но литературая дышетӥсьмы Ю.А. Фомин УдГУ-э филологияя факультетэн тодматскыны нуллӥз. Ӝыт пумысь мынӥмы бере, каникулэ кошкем студентъёслэн комнатаосазы кӧлыны интыяськимы. Ми кӧня ке кузя ӵапак Анастасия Гребиналэн комнатаяз учыраськеммы. Со сярысь тодӥмы, «Дась лу!»-ын практиказэ ортчись нылмурт ужысь вуэм бере. Редакциын ужасьёслэсь Норья школаямы ветлылэмзэс со вакытэ малы ке уг тодӥськы, соин ик яратоно газетам ужась муртэ адӟемелы мон пумтэм шумпотӥ.
Анастасия Михайловнаен выльысен пумиськи ни студент дыръям: со сямен ик, практикаме ортчи нылпи газетын. Кык толэзь куспын трос умоезлы дышетӥзы милемыз журналистъёс. Нош практикамы пумын ваньмылы кызьы ужаммес возьматӥсь бумага гожтӥзы. «Дась лу!»-лэн со вакытэ редакторезлэн А.М. Гребиналэн кинюртэменыз характеристикаме мон али ке но лач возисько но азьланяз та удысын ужаны быгато шуыса оскон сётэмезлы тау карисько.
Нош Удмурт Элькунысь сӥё-дано журналист кызьы меда ачиз вуэм журналистика удысэ? Та но трос мукетыз сярысь ми тодӥмы, соин асэныз пумиськылыса.
Надежда Шкляева.

Быдэс текст

Кин пыс-пыс изе, кин гурезетӥ тубе

2 6986Ньылетӥ классысен мон спортъя секцие ветлыны кутски. Спортэз гажан мылкыд пыӵатӥз тренере В.В. Жуйков. Пӧртэм ӵошатсконъёсы пыриськылӥ, но бадӟым вормонъёс ӧй басьтылы. Озьы ке но кужымме кыдатэмысь ӧй дугды. Тыршеме юнме ӧз луы. Куатетӥ классысен вормонъёс асьсэос лыктыны кутскизы. Нырысетӥ вормонэ син азям на: гужем полиатлонын 1-тӥ инты басьтӥ. Кыӵе шумпотӥзы эшъёсы, семьяе. Одӥг пол вормиськод ке, со вормон азьлань кыске, бурдъя вылэм. Мон бызьылӥсько стайерской но спринт дистанциосын. Тужгес но кельшо вакчи дистанциос.
Шуркынмонэ Глазовын ортчем ӵошатсконъёсы ветлӥмы. Кык нунал нюръяськимы. Нырысетӥ нуналаз, 60 метрез ортчыса, ньылетӥ инты басьтӥ… Аслам но, Валерий Витальевичлэн но мылкыдмы быриз. Но ӝоген эшъёсы монэ бурдъязы. Влад Иванов 1500 метръем дистанциын вормиз. Молодец! Лена Корепанова но нырысетӥ луиз! Кыкетӥ нуналаз яратоно дистанцие вал: 100 метрез мон капчиен ортчисько.
Тани мон стартын. Вӧзам зэмос спортсменъёс. Сюлэмы тэтча. Нош йырам кылӥське: «Туннэ тон вормыны кулэ. Одно ик!» Старт! Мон азьлань лоби. Финиш. Ура! Ворми! Быгатӥ! Эх, тодысалды ке, кыӵе ӟеч луиз мылкыды! Эшъёсы но, тренеръёс но – ваньмыз ӟечкылазы. Собере пиос 3000 метре кошкизы. Ми ваньмы Влад понна «висимы». Куинь пиос соку ик азьпала потӥзы, нош берпуметӥ кругын Владмы, эшъёссэ кыдёке кельтыса, финише нырысетӥ вуиз. Нош ик вормон!
Милям Влад Ивановмы – спортъя зэмос кизили. Медальёсыз, грамотаосыз, кубокъёсыз кӧня! Туэ со басьтэм вормонъёсыз понна зарезь доры шутэтскыны вуылӥз. Ми ваньмы со понна шумпотӥм но, вожъяським но.
Вормонъёс пияшлы озьы гинэ уг лыкто.
Гужем. Каникул нуналъёс. Тросэз нылпиос пыс-пыс изё на, нош Влад Ягошур гурезетӥ тубе ни. Котькуд нунал, котькыӵе куазен трос иськемъёсты ортче.
Кытысь солэн сомында чиданэз?! Эшенымы ми данъяськиськом. Мынам но со кадь ик луэме потэ. Улон сюресме одно ик герӟало спортэн.

Роксана КНЯЗЕВА.
Ушур школа.
Балезино ёрос.

Бертон сямен кожимы но...

49 519849 5173Тылое Комакысь но Можгалась школаосын чаклам пумиськонъёсты ортчытыса бертон сяменымы гинэ кожимы. Пиналъёслэн берпуметӥ урокъёссы мыно ни вал. Лыктэммылы туж шумпотӥзы. Удмурт кылъя но литературая дышетӥсьсы Любовь Васильевна Соловьёва нылпиосты соку ик кабинетаз люказ. Туж сак кылзӥзы пиналъёс милемыз. Собере йырвизьзэс бергатытӥсь юанъёслы валэктонъёс сётъязы, шаплыосыз синпель кузьымъёс утӥзы. Нош ми ужъёссэс сьӧрамы кутӥмы.
Доразы мед возьматозы шуыса, нылпиослы ми «Ӟечбур!»-лэсь туэ потэм номеръёссэ кузьмамы. Ваньзылэн сямен анай-атайёссы угось «Дась лу!»-эз лыдӟыса будэмын. Оскиськом, газетэз чидатэк витён дыръёссэс син азязы пуктыса, Выль арлы соос нылпиоссылы но шумпотон кузьманы мылкыд карозы.
Тӥ но, лыдӟись эшъёсмы, та нуналъёсы ик почтае ветлэ яке почтальонэныды пумиське но «Ӟечбур!»-лы гожтӥське. Газетлэн быдэс арлы дуныз – 494 манет но 53 копейка. Индексэз – 12729. Ӝыны арлы – 244 манет но 20 копейка. Индексэз – 54403.

Надежда Шкляева.
Можга ёрос.