Get Adobe Flash player
АУ УР "Ӟечбур!"

Дышетскон армы быриз! Маин со вунонтэм кылиз?

* * *
Биологиен дышетӥсенымы Фаина Васильевна Алашееваен ми быдэс классэн гурт вӧзысьтымы нюлэскы утялтӥськыны ветлӥм. Нюлэскы пырем берамы воксё паймим вал. Кытысь отчы сыӵе трос жаг люкаськем? Кин сое куям меда? Нюлэс дурын но, пушказ но сомында жуг-жаг костаське: бумага, клеёнка, бутылка, банка... Ми ваньзэ сое мешокъёсы тырим. Нюлэс чылкыт луиз, каньылак шокчиз кадь. Куанӥзы, дыр, нюлэскын улӥсьёс нӧ нымы-кибыос, пӧйшуръёс, тылобурдоос но будосъёс. Ми асьмеос но шумпотӥмы таӵе ӟеч уж лэсьтэммылы. Милям ваньмызлы вазиськеммы потэ: эн жагтӥське, утялтэ бервылдэс. Утелэ инкуазез!

Илья Егоров.

* * *
Анай кыллы сӥзем празднике, Туймыйыл школае, ёросысьтымы вань школаосысь пиналъёс люкаськизы: визьзэс сыназы, киужъёс лэсьтӥзы, кырӟазы, веразы. Тужгес но шулдыр вал эктон станциын. Туймыйыл школаысь пиналъёс паймытӥзы шаплыесь, мыло-кыдоесь, задоресь луэменызы. Пӧртэм удмурт эктонъёсты дышетӥмы та станциын.
Мукетаз станциын удмурт диктант гожтӥм. Мон одӥг гинэ янгыш кельтыса, кыкетӥ инты басьтӥ.
Праздник пумын котькуд школа кыӵе ке но художественной номер возьматӥз. Тужгес но паймымон кузьым вал кино. Туймыйылъёс ужрадэз ӵукнаысен ик снимать кариллям но утыр тунсыко кино пӧрмытӥллям. Ми сое ваньмы серекъяса учким. Бертон дыр вуиз но, чик уг поты на вал люкиськем. Кӧт ӧз тыры шуод-а, мар-а. Фойеазы ӵош люкаськыса, эктонъёс мед луысал на кадь потэ. Ачим ик, эсьмаса, арганэн шудысал. Серп кемысь арган ӝутъяса нуллӥ угось.

Алёша Константинов.

* * *
Вераммы потэ тунсыко адямиосын пумиськонъёс сярысь. Таяз арын школаямы азьвыл выпускникъёсмы вуылӥзы. Сергей Шарыпов ӝог амалэн бызьылонъя мастер луэ. Со пыртэмын Россилэн сборной командаяз, Олимпийской резерве. Олокытчы но вуылэмын, пӧртэм ӵошатсконъёсын вормемын ни. Милемлы тужгес но кельшиз Кореяе ветлэмез сярысь верамез. Музъемзы пичиен, отын коркаоссы туж ӝужытэсь, пе.
— Азьвыл, мукет интыосы вуисько ке, куазьлы кема дышыны курадӟисько вал, — вераз Сергей. — Со результатъёс вылын но шӧдӥськылӥз. Али мон пӧртэм интыосын асме умой шӧдӥсько, ас кужымелы оскисько.
Бадӟым сумкаяз кубокъёссэ но медальёссэ ваем. Сомында соос: зарниез но азвесез, пичиез но бадӟымез… Со, пе, ваньмыз ӧвӧл ай. Сергей ачиз но лыдзэ умой вераны ӧз тоды, ма, школаысен ик солэн трос медальёсыз вылэм ини.
Нош Костя Смирнов али Казаньысь консерваториын дышетске. Чебер, паймымон куараезлы луыса сое Европаысь крезьгуро бадӟым фестивале бырйиллям. «Отчы мынонме тодыса, юри аслым дуно фотоаппарат басьтӥ, – вера Костя. – Солы коньдон Казаньысь огаз черкын кырӟаса люкай».
Адӟемез сярысь Костя туж трос вераз но возьматъяз. Тужгес но солэсь сюлэмзэ Италия но Германия вырӟытӥллям. «Школаын луонлык вань дыръя эн азьтэмъяське, дышетэ англи кылэз. Кин тодэ, мар возьма тӥледыз азьланяз. Тодэмды ноку мултэс уз луы», – шуиз Костя.
Школамес ик йылпумъямын Анна Шарыпова но, УдГУ-ысь студентка. Дорамы толалтэ Венгриысь бертэмез бере вуылӥз. Солы Будапештысь купальняос тужгес но кельшиллям. Город шорын ик, пе, термальной вуосын тазалыклы пайдаё луись туж трос пыласькон интыос вань. Аня та шаере эшъёсыныз венгер студентъёсты асьме удмурт культураен тодматыны ветлӥллям.

Настя но Лиза Карпушинаос.

* * *
«Зарница» шудон-ӵошатсконэ вуылэмме малпаса али сереме потэ, отын бӧрдӥ уго. Куинь этапез – ориентированиез, гурезе гозы кузя тубонэз, тылскем ӝуатон-кысонэз – туж умой ортчи, нош ньылетӥяз, шур вамен пул вылтӥ потыкум, оло волегӟи, оло пул со порма вал – кезьыт вуэ йыринуллань уси, сач-сач котми. Шудонэн йырин ӧй вал ни – лагере келязы, тылскем дурын пуки, дӥсьме куасьтӥ. Таняпай повармы но эшъёсы маин быгатӥзы юрттӥзы. Али ке но кӧты ӝож, мыным луыса командамы бере кылиз.

Наташа Петухова.

* * *
Мастерское кружоклэн занятияз ветлыса ми самолётъёс но корабльёс лэсьтылӥм. Со ужъёсынымы эшъёсыным авиамодельной но судомодельной ёрос ӵошатсконъёсы пыриськимы но 2-тӥ инты басьтыса бертӥмы. Мон кыкетӥзэ таӵе ӵошатсконъёсы ветлӥ ни. Туэ корабле понна 3-тӥ инты сётӥзы, грамота но медаль кузьмазы на.

Никита Трудолюбов.

* * *
Мон походъёсы, экскурсиосы ветлыны яратӥсько. Историен дышетӥсенымы Алангасар гурезе вуылэммес ноку уг вунэты ни. Азьло, пе, та интыын алангасаръёс улӥллям. Сьӧрамы ми лопата но нуим, гудӥським. Пӧртэм лыос, посуда пырыос, ваза шедьтӥм. Собере со гурезь выжыын, Петягайлэн тымет дураз, шутэтским. Бертон азямы чорыген шыд сиим, чай юим.

Никита Петров.


* * *
Кык арлы огпол школаямы «Театральная весна» ёрос конкурс ортче. Мон сцена вылын шудыны яратӥсько, соин та ужрад мыным туж кельше. Таяз аре дасяськыны бер ке но кутским, ми 2-тӥ инты басьтӥм. Мыным «Лучшая актриса» номинациын вормеме понна нимысьтыз диплом сётӥзы на. Ми «Кыдёкын оло матын» сценкаез пуктӥмы. Ужрад инкуазез утёнлы сӥземын вал. Мыным тужгес но варзи-ятчиослэн, сям-каксяослэн, туймылъёслэн сценкаоссы кельшизы. Мур пуштросъемесь, малпаськытӥсесь вал ужъёссы. Пиналъёс но быгатыса шудо.

Алина Пчельникова.

* * *
Мон понна самой вунонтэмез вал «Ӟечбур!» газетлэн кузьымез – удмурт театре дунтэк ветлэммы. Ас синмынымы адӟим удмурт артистъёсты, соос-лэсь быгатыса шудэмзэс. Соос милемыз 18-тӥ дауре вуттӥзы кадь. Ми тодӥм, мар со сыӵе Мултан уж, кытын но ку со ортчиз, кин но малы малпаз вал со ужез, кызьы улӥзы, кызьы дӥсяськизы со вакытэ удмуртъёс.

Софья Конькина.

* * *
Вунонтэм кылёз классамы анай-атайёсын ӵош «Папа, мама, я – спортивная семья» шудон-ӵошатскон ортчытэммы. Мар но ӧй вал татын: серемес ужъёс, визь сынанъёс. Кылсярысь, атайёс нылъёссылы бантик думизы, синъёссэс кыньыса киоссыя гинэ анайёсты тодмазы но мукет.

Лена Мурина.

* * *
Мон туэ нырысетӥзэ асьме ёрос понна Ижкаре волейболэн шудыны ветлӥ. Командаямы ми 8 кузя вал, Вуж но Выль Утчан школаосысь нылъёс. 11 команда пӧлысь ми 7-тӥ гинэ луимы ке но, возьыт но, ӝож но ӧвӧл, малы ке шуоно ми нырысьсэ пыриським ай таӵе шудонэ.

Марина Яковлева.

* * *
Шахматэн но шашкиен шудонъя кружоке ветлӥськом бере, та арын ёрос ӵошатсконъёсы пыриським но ӧм ворме. «Зелёная планета» кружоке ветлӥсьёс писпуос мерттӥм, ошмес дуре ветлӥм, турын-куаръёсын тодматским. Нош одӥг пол экскурсие потӥм но, туж зол зорыны кутскиз. Гурт пумысь коркалэн лапас улаз зорлэсь пегӟыса кема улӥм, номыр выльзэ тодытэк, адӟытэк, зор ултӥ ик бертоно луим. Школае дышетскыны гинэ ум ветлӥське. Кылсярысь, 9-тӥ Май дыръя ми войнае ветлэмъёслэсь туспуктэмъёссэс кутыса Вунонтэм полкен синпелет доры мынӥськом, сяськаос понӥськом.
Вунонтэм кылёз Удмурт театре ветлэммы но Калашниковлэн музеяз пыраммы. Татын милемлы тирез кельшиз, ми отын ыбылӥським.

Юра Морозов,
Саша Охотников,
Кирилл Дружинин, Валера Султанов.

* * *
Ми, куинь нылъёс, дышетскон ар ӵоже кӧня пол меда сцена вылэ потамы? Куно-а пумитано, анай-атайёс азьын-а кырӟано, смотрлы-а дасяськоно –милемлы вазисько. «Ум» ум шуиське, потӥськом но кырӟаськом.

Анюта Чернова, Лариса Дружинина, Марина Конникова.

* * *
Мыным Писэйгурт школаын ортчем пинал усточиослэн конкурссы туж кельшиз. Ёросысьтымы мукет школаосы потаме ӧй вал на, соин ик туж синмаськи школазылы, отысь музейзылы. Туж умой пумитазы но ческыт сюдӥзы. Тунсыкоез вал азьпалан. Милемыз пӧртэм секциослы люкизы но ваньмес нимысьтыз кылзӥзы. Мон пинал веросчиос пӧлын пуки. Лыдӟи «Котмем курег. Чучумбей» веросме. Туж куалекъяй, возьдаськи. Собере ачим ик пайми куинетӥ инты басьтэмелы. Ассэ Ульфат Бадретдиновез но адӟи! Трос тодӥ Герман Ходырев сярысь но…

Марина Конникова.
Алнаш ёрос.