Get Adobe Flash player
АУ УР "Ӟечбур!"

ВАНЬ УЛОН СО - МАДИСЬКОН, яке Кызьы удмурт писатель США-лэн президентэз луиз?

DSCN0248«Одно мыноно»

«Кызьы уд мыны Писэйгуртэ? Отын Герман Ходыревез данъяло, туала нылпиосты творчество удысэ кыскыто. Туж бадӟым ужез соос лэсьто. Валасьёс, дунъясьёс вань шуыса тодӥськод ке, эшшо тросгес лэсьтэм потэ ук», – ортчоно ужрад пумысен мылкыдзэ тазьы усьтӥз «Кизили» журналлэн редакторез У.Ш. Бадретдинов.
Пусъем нунал вуон азьын тодмо луиз, Ульфат Шайхудтинович Башкириын на, пе. Отын кык нунал ӵоже удмуртлыклы сӥзем пумиськонъёс ортчизы. Бер ӝыт сюрес вылысь вуэм адями вазь ӵукна Алнаш кеме сюрес вылэ уз поты ни, дыр, малпай. Нош Ульфат Шайхутдинович, одӥг сюреслэсь жадемзэ веськатыса вуттӥз-а, ӧз-а – мукет сюрес вылтӥ рульзэ бергатэ ни. «Верам кылыз вылын сылэ вылэм», – малпай мон. Ачиз Удмуртиын будэмын ӧвӧл ке но, татысь котькыӵе гуртысь калыкез тодэ, гурт пумысен маке тунсыкозэ вераны быгатэ. Писэйгуртэ нуись куинь сюресэз тодэ. Удмуртъёслэн «котыр сюрес – вӧй сюрес» шуэмзыя, Туймыйылтӥ кожоно кариськиз. Удмурт кун университетын ӵош дышетскем эшез, пе, татын улэ.

 


Нош бертыны Кватчи сюресэтӥ потӥз. Татын но тодмоез вань вылэм. Можга педучилищеын ӵош дышетскиллям. «Мон кивалтӥсь луыны малпасько, калыкез валан понна, педагогикаез тодыны кулэ», – шуылоз вылэм ог дас вить аресъем пияш. Верамезъя ик лэсьтэм, ас гуртысьтызы эштосэнызы кивалтэ та вакытэ.
Мукетыз сюрес Пуйкагурт вӧзтӥ ортчыны быгатэ вал. Татысь но Ульфат Шайхутдинович калыкез тодэ. Угось педучилищеын дышетскон аръёсазы ӵапак та гуртын картофка октӥллям.
Ог ньыльдон ар ӵоже гожъяськон удысын ужатозяз журналистлэн но прозаиклэн вуылымтэ, ветлымтэ гуртъёсыз ӧз ик кыле ни, дыр.
У.Ш. Бадретдинов сярысь гожтонме юнме шорысь сюресэн ӧй герӟа. Туэ потэм выль книгаез но «Астэ утчан сюрес» нимаське. Сюреслэн образэз читыр-чутыр нуись гож кадь быдэс книга пыр пӧлэстӥське. Нош мургес учконо ке, сюрес сярысь валан татын паськытгес сётэмын. Ачиз автор но шуэ: «Тужгес секыт но кузь сюрес – астэ ачид утчан сюрес. Со адямилэн йырвизьмысьтыз сюлэмаз кыстӥське».

 

Толсурысен толшорозь

– Нош кытысен но кызьы сюрес лёгиз меда та улонэ У.Ш. Бадретдинов?
– Вордӥськи мон Башкортостанысь Бурай ёросысь Алтау гуртын 7-тӥ толсуре 1956-тӥ арын. Вордскем сярысь кагазам 21-тӥ толшоре 1957-тӥ арын шуыса гожтӥллям. Соин валче мон 44 нуналлы егитгес улӥсько, толсурысен толшорозь вордскем нуналме пусйисько. (Серекъя.)
– Нимды но тӥляд тунсыко.
– Гуртамы мынам кадь нимъёс ӧвӧл. Мон вордскон аре юртамы тыл кыскытыны Бирскысь электрик вуылэм. Атае мынам плотник, ӵошен ужазы, ма но со юрттӥськиз, дыр, вӧзаз. Нимыз но кельшем, лэся, та адямилэн. Мыным, нырысетӥ пиналызлы, солэсь нимзэ понэм.
– Пырак вераса, нимдэс тыл сётӥсь но шуыны луэ, озьыен. Нош араб кылысь берыктыса, Ульфат, пе, эшъяськон, яратон, ог-огдэ валаса улон шуэмлэсь пуштроссэ возьматэ. Улонады та кылъёс валтӥсез луо шуыны быгатӥськоды-а?
– Та кылъёс котькуд адямилэн улоназ валтӥсез луыны кулэ, дыр. Семьяысен ик ог-огдэ валан, яратон, эшъяськон сям пыӵатэмын. Выныным но кык сузэръёсыным туж тупаса улӥмы. Со-осты утись-чаклась но мон вал. Анай-атай котьку ужын. Милям ваньмылэн эшъёсмы ми доры люкаськылӥзы. Туж шулдыр будӥм.
– Будэм сюресты ӟеч возьматэмын «Шордин» повестьын, сое быдэсак автобиографической шуыны луэ, дыр.
– Озьы. Улонысь тужгес но яркыт суредъёс пичи вакытэн герӟаськемын. Дыр ортчыса, мӧйымыса, куд-ог учыръёс выльысен ву вылэ сямен лӧпто.

Арбери медаз бекмыльты

– «Велосипед» веросты туж мур пуштросо, нокинлэсь сюлэмзэ вырӟытытэк уз кельты, дыр, со. Таиз но асэныды герӟаськемын-а?
– Ачим сярысь ӧвӧл таиз, нош велосипедзэ ыштэм пияш сярысь суред пичи дыръям вал. Верам потӥӟ арбери понна сӧсыртыны кулэ ӧвӧл адямиез, арбери со арбери. Нош адямилэн улонэз номырин воштонтэм. Лултэм арбери понна улэп лул-сюлэмез сӧсыртыны уг яра. Анай-атайёслы но, пиналъёслы но та учыр алон выллем мед луоз. Котькин ас дыраз анай-атай луоз ук.
– Нош асьтэлэн великен герӟаськем учыръёсты вань-а?
– Нырысьсэ велике пуксеме малы ке сыӵе яркыт тодэ ваёнэн герӟаськемын ӧвӧл. Нош Алнашысь кылбурчилэсь Иосиф Ивановлэсь Ангелина нылзэ мон, пе, ворттылыны дышетӥськем. Тодӥсько, доразы вуылыкумы, велике пуксись нылашез мыш ласянь кӧня ке кутыса воземме, собере со ас понназ кошкиз. Мон уг тодӥськы вал, со озьы ас кожаз ворттылымтэ на вылэм шуыса. Ангелина малпам, мон сьӧраз мынӥсько. Со ик дышемез луэм. Одӥг учыр ик кинлэн ке йырвизьмаз яркыт плёнка кадь кылемын, нош мукетызлэн – бездытгес.
— Нош гожъяськон сюрес вылэ султыны юрттӥсьты тӥляд вал-а? Та удысэ сюрес кызьы лёгиды?
– «Дась лу!» («Ӟечбур!») газет монэ журналистозь но писателёзь будэтӥз. Тазьы шуыны быгатозы мукетъёсыз гожъяськисьёс но. Зэмзэ но, со озьы ик вань. Нырысетӥ вамыштэк кыкетӥез уз луы. «Дась лу!» газет милемлы, удмурт пиналъёслы, гожъяськон удысэ нырысетӥ вамышъёс лэсьтыны юрттӥз. Нырысетӥ выжыкылэ та газетын 1969-тӥ арын печатласькиз. Со вал чеберлыко литературалэн ӧсаз йыгаськон. Нош пушказ гожъясь луыса пырыны кема выри на. Али но пырисько.
– Гожъяськон удысэ нуись сюреслэн йылыз-пумыз ӧвӧл шуыны луэ, дыр, та верамдыя?
– Озьы.
– Рифкат экедылы сӥзем «Бертон» нимо веросады тӥ асьтэлэсь нимдэс уд ке но поттылӥське, абзи сярысь вераськон мыныку, валаны луэ, тӥ сярысь гожтэм чуръёс та шуыса. Пичи сузэрдэс школаын дышетӥськоды, солэн чакламезъя, одӥг урокын 34 пол «значит» кылэз кутӥллямды. Нош асьтэлы школаын ужам аръёсты кыӵе чакланъёс, мылкыдъёс кельтӥзы?
– Покчи классъёсты дышетыкум, мон огдыре ик крезьгуръя, физкультурая, ужанъя, суреданъя дышетӥсь вал. Баян кысканы дышетскеме но кулэ луиз. Шуггес потылӥз кык классъёсты огдыре дышетыны. Малы ке шуоно покчиос гожъяськыны уг быгато на, нош 3-тӥ классъёслы тросгес тодон-валан сётыса вуттэм потэ. Ваньмаз сямен школаосын озьы ужазы, но нимысьтыз методика ӧй вал.
«Бертон» веросэ гожтэмын вынылы сӥзьыса. Зэмзэ вераса, со сярысь. Веросме гожтӥ выны кулэм бере. Нимзэ юнме шорысь озьы ӧй кары. Армиысь бертон сярысь гинэ отын вераськон уг мыны. Вынылэн сайкыт тусбуезлэн та улонэ бертэмез но возьматэмын, шуыны луэ.
– Юрий Фоминлы сӥзем веросады драмаез зол, сапег образ сое эшшо но кужмогес каре. Быдэс произведение сапеген герӟаськемын, нимыз но солэн озьы ик. Адямиез сапегез сямен сюрес урдсы кушто… Художественной произведениын зэмос адямилэсь нимзэ-тулзэ воштытэк сётонлэн аслаз секталаез вань. Татын авторлы зэмлык бордысь кожыны уг яра шуыса мон малпасько.
– Зэмлыкез пӧртэм сямен возьматыны луэ. Чеберлыко произведение зэмос адямиослэсь нимъёссэс пыртыса, писатель лыдӟисьёслы уката матын кариське, ачиз но со геройёсыныз артэ но ӵош вамышъя кадь, котькудзы понна кыл кутыны дась.

Лобан сюрес

– «Лобась Ке, яке Дырез азьпалтон» фэнтезиын повествование нылкышнолэн нимыныз мынэ. Мар со сётэ авторлы? Тазьы капчигес-а ӧвӧлтэмзэ вань карыны? Дырез азьпалтыса лобан мылкыдъёсты вал-а куке, яке али но вань?
– Уйвӧтам лобаме вань. Ой, кыӵе со шумпотон! Кылын но уд вера. Киосме вӧлъяй но вордскем гуртэ вадьсытӥ лобисько…
Пияшлэн нимыныз гожтэм повесте вань – со «Вероника плюс…». Фэнтезиме нылмуртлэн нимыныз гожтоно кариськи. Озьы асме но эскереме потӥз. Кызьы пӧрмиз, лыдӟисьёс дунъет сётозы.
– Кык произведенияды пумиське нылкышно утись-кылчинлэн образэз. Пичи дырысьтыды кылылэмъёс бордысь со потэмын-а? Нош асьтэлэн вань кадь-а утись-кылчинды?
– Тӧдьы дӥськутэн кылчинъёсты адӟисьёс луылӥллям, вылды. Со сярысь гуртын вераськонъёс вал. Мынам но йырам со мадёсъёс кылизы, произведениосам но соосты пыртӥ.
Инмарлы-кылчинлы мон ас поннам вазиськылӥсько, юрттэт но курисько. Оскисько, со монэ кылэ, юрттыны тырше.
– Тӥ веросчи ке но, гожъяськон манердыя кылбурчи, мон шуысал. Одӥгез но произведениды огшоры повествование кадь уг мыны. Собере прозаической текстъёсады но кылбур чуръёс ӵемысь пыртылэмын. Яке геройёсты кылбурало. Кылбурчи луон мылкыдды ӧй вал-а? Ку валады, тӥлесьтыд прозаик пӧрмоз шуыса?
– Можга педучилищеын литературно-творческой кружоке ветлыны кутскеме бере кылбуръёс гожъяны ӧдъяй. Куд-огез газетын но потӥзы. Соос туж зол тупатъямын вал. Валай: кылбурчи мынэсьтым уз пӧрмы. Веросъёс кылдытъян борды басьтӥськи. Писатель Григорий Данилов мыным прозаез валаны туж зол юрттӥз.
Поэзиез мон яратӥсько. Чебер чуръёсты, образъёсты (кылсуредъёсты) лыдӟыса-пумитаса, мылкыд бурдъяське, аслам но кылбур чуръёс гожтэме потэ.
– Тӥ трос мадиськонъёсты тодӥськоды. Ваньмыз ик соос улонысь басьтэмын шуыса шӧдӥське. Пичи дырысьтыды тунсыкъяськон-а со, нылпиосын ужамды бордысь-а? Асьтэлэсь улон-вылон сюрестэс мадиськон пыр верано луысалыз ке, кыӵе мадиськон малпасалды?
– Вань улон – со мадиськон. Отын юанъёсыз трос, ваньмызлы валэктон но уд шедьты. Адями но – со мадиськон. Куддыръя ачиз но уг вала, малы малпаське одӥг ласянь, шара вера мукетсэ, нош уж вылын воксё выльзэ кылдытэ.
Ачим сярысь таӵе мадиськонэ-юанэ вань: «Кызьы мон США-лэн президентэз луи?»
– Ойдолэ та мадиськонэз лыдӟисьёсмылы сётом.
– Умой. Тодӥсь муртлы книгаме кинюртэменым кузьмало.
– 60 аресъем сюрес астэ ачид утчанлы тырмыт-а? Шедьтӥды-а тӥ асьтэдыз та улонын?
– Тау шуисько улонэлы, монэ та аресозям вуттӥз шуыса. Асме утчан сюресэ монэ азьпала мед нуоз, тазалык мед сётоз. Выльзэ утчан сямы медаз быры.
– Тунсыко малпанъ-ёсты лыдӟисьёс доры нош ик выль книгаосын мед вуозы.

Антонида ЕРМОЛИНА.