Get Adobe Flash player
АУ УР "Ӟечбур!"

Пичи Пурга ёросысь Баграш-Бигра школаысь заметкаос

Чебер ныл но «йӧл»

Атае Германиын служить карем. Одӥг учырзэ уг вунэты. Германиысь институтын дышетскыкуз, немец кылъя экзамен сётыны дыр вуэм. Дышетсконние эшеныз пырыкузы, чебер нылэз пумиталлям. Студентка кожаллям но соин тодматскыны мылкыд кариллям. «Тӥ кинэ возьмаськоды?» – со но та сярысь вераськемзы бере юаллям нылашлэсь. «Студентъёслэсь экзамензэс кутыны лыктӥ», – шуэм нылмурт.
Атае но эшез кылзэс ньылӥллям кадь. Нылашен, дышетӥсенызы, ӵош классэ пыриллям. Атае билетысь юанлы валэктон сётыны доска доры потэм но дыр-р куалекъя, пе. Юанэз таӵе вылэм: «Мар кариськод тон ӵукна?». Атае «йӧл юисько» шуыны турттэ вылэм, но «йӧлэз» немец сямен кызьы вераны шуак вунэтэм. Нош эшъёсыз исаны малпаллям: «шнапс», пе, шу. Атае та учырысь потыны быгатэм, экзамензэ «4»-лы сётэм.

Алёна ЛОЖКИНА.


Самолётэз лэзиллямтэ

Атае Павел Петрович Курил шормуӵъёсын служить карем, эшъёсыныз ӵош Атыкай музъеммылэсь ингожзэ утем. Со вакытэ Америкаысь разведчикъёс ӵем лобало вылэм.
Одӥг ӝыт казармаязы тревога ялӥллям. Туж вакчи дыр куспын вань радиолокационной станциосысь операторъёс асьсэ станциосазы вуиллям. Соослэн зоназы доры американ самолёт-разведчик матэктэ вылэм. Быдэс расчётэнызы дасяськиллям сое пумитаны… Ас ужзэс ӟеч быдэстэмзы понна, валтӥсь операторзылы гуртаз бертыны отпуск сётъяллям.

Аня БАГРАШОВА.


Пегӟем эшсы берытскем

Атае Николай Анатольевич Челябинск улосвылысь Снежок городын туж кулэ объектъёсты утиз. Огпол одӥг солдатсы автоматэныз ик постысьтыз пегӟем. Солдатъёс сое кӧня ке нунал утчаллям. Янгышсэ валаса, эшсы ачиз частяз берытскем.

Настя БОТНИКОВА.


Корказэ келяз… гожтэтэн

Двоюродной агае, Андрей, али армиын. Тямыс толэзь куспын со милемлы но анаезлы уно гожтэтъёс ыстӥз ини. Нуналлы быдэ жингыртыны быгатӥськом ке но, ми туж возьмаськом соосты. Гожтэтъёсыз эшшо но мусогес пото. Мӧзмыса одӥгаз корказэ, капказэ суредам. Сад кенерзылэсь, капказылэсь пичиесь шекъёссэс но, ява, суреданы вунэтымтэ, ваньзэ рос-прос тодаз ваем. Ӝоген Андреймы бертоз ини, соку мон ӟеч-ӟеч юаллясько, мар со сыӵе армия.

Настя ГОРОДИЛОВА,
«Пурга кизилиос» нылпи творчествоя юртын ужась «Удмуртъёс дорын куноын» факультативе ветлӥсьёс.
Баграш-Бигра школа.
Пичи Пурга ёрос.

Завьял ёросысь Шор Постол школаысь заметкаос

Немецез турнаны дышетэм

Песятае Пётр Георгиевич Кузнецов службазэ Германиын ракетной войскоосын ортчытэм. Одӥг пол вунонтэм учыр луэм. Песятае эшеныз эхолокаторъёс котырысь турынэз турнаны мынэм. Гуртын будэм пияш та ужез ӟеч пӧрмытэ вылэм. Матэ интыяськем гуртысь пиосмурт кусоен шонаськемзэ адӟем но дышетыны курем. Песятае кусоез возьматэм, кызьы турнаны но кусоез шерыны кулэ валэктэм. Воргорон туж шумпотэм но кытысьсэ юам. Удмуртиысь шуыса тодэмез бере, эшшо но паймем. Элькунмы но калык сярысь трос юалляськем, удмурт кылын кӧня ке предложение но вераны курем. Доразы кыльыны но ӵектэ вылэм. Песятае малпаськем но шуэм: «Мынам вань доре, анае. Мон соосты номырин уг вошты».
Тӥни кыӵе учыръёс но луыло улонын.

Алёна ДАНИЛОВА.


* * *

Атае Сергей Анатольевич службазэ Воркутаын ортчытӥз. Отын туж кезьыт. Куд-ог эшъёсыз бамъёссэс, чиньыоссэс но кынтылӥллям. Озьы ке но, атаелы отын кельшем. Со ожгар разведкаын вылэм. Отысен ик уйпал сияниез нырысьсэ адӟем. «Ту-уж чебер но паймымон маке», –- шуэ. Гуртаз бертэм сержант луыса. Армия атайме шуг-секытъёсты чиданы, зэмос эш луыны, сюрес вылтӥ йыгмыт вамышъяны дышетэм.

Егор БЕЛЯЕВ.

 

Формазэ лушкем мертай

Агае Смоленскысь военной академиын дышетскиз, офицер луиз. Дышетсконзэ йылпумъякуз, ми быдэс семьяенымы дораз ветлӥм. Чебер формазэ адӟыса, мынам йыры ик поромиз, аслам но ожгарчи луэме потӥз. Формазэ кылемез бере, комнатаяз мынӥ но сое лушкемак мертай. Анае-атае шорам мыняса учкизы но, «луод, пие, агаед кадь ик луод» шуыса, тыбырам топ-топ вешазы. Али агае солдатъёсыз дышетэ. Троссэ лейтенант Петров уг вера, «военная тайна» шуэ. Атыкай музъеммес утисьёслэн ужзы капчи ӧвӧл, малпасько. Агае но тани ялан командировкаосын.
Кусыпмы кыдёкын ке но, со мыным котьку визь-нод сётыны быгатэ. Ми солэсь туж мӧзмиськом, угось агае араз огпол-кык пол сяна гуртэ уг вуылы. Озьы но мон солэсь паськыт, юн пельпумъёссэ котьку вӧзам шӧдӥсько.

Лёва ПЕТРОВ.



Лыз беретэз али но син азям

Та газетын ужась Эльвира Симаковаен пиналъёсын пумиськон ортчем бере, «Кирза сапег» сэрегады мынам но гожтыны мылкыды ӝутскиз.
Агае Арзамасов Виталий Васильевич, Ижкарысь педучилищеын дышетскыкуз, парашютно-десантной школае ветлӥз. Та сярысь тодыса, военкоматын сое ВДВ-е гожтӥллям. Экзаменъёссэ экстерн амалэн сётыса, 1986-тӥ арын со армие кошкиз, Брестысь десантно-штурмовой бригадае шедиз.
Кык ар куспын кызь вить пол тэтчамын, 12—15 иськемез марш-бросок амалэн ортчемын со. Экипировкаен бызьылэмез, нюр интыостӥ ветлэмез сярысь верамъёссэ кылзыны, туспуктэмъёссэ учкылыны туж тунсыко.
Армиын дыръяз ми – анае но сузэръёсы – со доры Белоруссие ветлӥм. Ноку но уг вунэты солэсь формазэ но чебер лыз беретсэ. Брест каретӥ поръяммы али ке но син азям. Соин, дыр, десантникъёсты яратӥсько, соос сярысь кырӟанъёсты кылзӥсько, киноосты учкисько.
2-тӥ гудырикошконэ десантникъёс асьсэлэсь нуналзэс пусъё. Со нуналэ мон арлы быдэ ӟечкыласько агайме.

Т.В. Силина,
Шор Постол школаысь дышетӥсь.
Завьял ёрос.

Льӧль малпанзы вань бере...

 Кристина Орбакайтелэн 16 аресъем пиез, Алла Пугачёвалэн нунокез Дени Байсаров Чечняын егит ожгарчилэн курсъёсыз пыр ортчиз.
 Каникулъёсыз дыръя Дени кадет корпусын зэмос воргорон улонэз веръяз. Ортчем нуналъёсыз сярысь со ӝутскем мылкыдын тодаз вае. Кизилиослэн пияшсылы кык толэзьем программа дасямын вал. Вакчи дыр куспын солы пӧртэм пумо пыӵалъёсын ыбылӥськыны но мукет курсантъёс дорозь ӝутӥськыны кулэ вал. Инструкторез Александр Коровин пусъемъя, Денилы нокыӵе капчиятонъёс ӧз сётӥське.
 Удмурт пиос пӧлын но трос гинэ, дыр, кадетъёслэн школаязы шедьыны мылкыд карисьёс, нош Ӵошкыт школаысь 11-тӥ классын дышетскисьёслэн Вова Волковлэн но Петя Широбоковлэн кадет школае мынэмзы уг поты.Нош армилэсь палэнскыны та пиос огзы но уг малпало.
 – Кызьы малпаськоды, армия уж удыс бырйыны юрттэ-а?
 – Армие мынэме, сое ас вылам шӧдэме-адӟеме потэ. Десантник луысал. Но мынам аритмия… Эшшо акрофобиен курадӟисько – вылӥе ӝутсконлэсь курдасько. Со кышканме вормеме потэ. Парашютэн тэтчан юрттэ, пе…
 Службаез контракт амалэн азьланьтыны луонлык вань. Оло, мон но кылё ай… Монэ ВДВ (воздушно-десантной войскоос) бордаз кыске. Валасько, ожгар удысэн асме герӟай ке, гарнизонъёсты вошъяно, карысь каре выжылоно луоз. Полициын асме уг адӟиськы, — вера Вова.
 Петялэн но ВДВ-е шедемез потэ. Комиссия пыр потыкуз, ӝуждалаез, пе, одӥг сантиметрлы ӧз тырмы. Но со осконзэ уг ышты, дырын-дырын мертаськылэ. Школаез йылпумъяса, Вылӥ ожгар дышетсконние йыгаськыны медэ.
– Спецназэ сюреме потэ. Вань мылкыд карисьёсты отчы уг куто. Льӧль малпанэ – краповой берет. Милемлы удалтӥӟ ОБЖ-ен дышетӥсьмы армие ветлэмын. Урокъёсын милемлы аслаз службаез сярысь трос вералля, пӧртэм учыръёсты тодаз вайылэ,– дышетӥсезлэн сюлмысьтыз потэм веранъёсыз Петялы вунонтэм кылиллям, шӧдске, мылкыдыз лӧптэмын. – «Альфа» группа сярысь трос кылылӥм ни. Отчы сюрем солдатъёс психиказыя туж юнэсь луыны кулэ, собере гинэ кужмо луэмзы лыдэ басьтӥське. Элитной войскоосы сюрем солдатъёс понна нырысетӥ интыын луыны кулэ заложниклэн улонэз, собере – эшедлэн. Ачид сярысь берло малпаськоно. Азьланезлы али ик дасяськисько нӥ спорт секциосы, кружокъёсы ветлӥсько. Ожгар дышетсконние сюрыны ӧз ке удалты, УдГУ-ысь кышкытлыклэсь утиськонъя факультетэ пырыны тыршо. Кабинетын пукон, бумагаосын ужан мыным уг кельшы. Бызьылыны яратӥсько, куаныса сюлэм мед тэтчалоз.
 – Армие мынэмды потэ бере, оло, ожгар лагере но вуылэмды вань?
 – Гужем Пероггуртэ вуылӥм. Быдэс Удмуртиысь пиос отын вал. Лагерь ньыль нунал гинэ кыстӥськиз ке но, асьмелы ми трос выльзэ басьтӥм. Нырысетӥ нуналаз, секытлы дышымтэ макеос, спортъя мастере кандидатъёс но, ваньмы пограм. Вань суй быгытъёс висизы. Монэ отделенимылы командире бырйылӥзы, пӧрмытӥ кадь. Та лагерьын ми выль эшъёс шедьтӥм, выль кусыпъёс тупатӥм, асьмеды эскерим – люкиськем но уг поты вал.
Пиослэн кадетъёс пӧлы сюремзы уг ке но поты, соослэн азьпалазы пуктэм ужпумзы но, льӧль малпанзы но вань. Сыӵе егит адямиосмы вань бере, оскон кылдэ: кунмы кужымзэ уз ышты, азьло сямен ик Быдӟым Держава луоз.

Эльвира СИМАКОВА.
Ӵошкыт школа.
Якшур-Бодья ёрос.