Get Adobe Flash player
АУ УР "Ӟечбур!"

«Больница зын анаелэн ЙӦЛЫНЫЗ пыӵамын»

Перевозчиков П.А.П.А. Перевозчиков

♦ Вордӥськемын но будэмын Ижкарын. 35 арес. Тодмо удмурт син йӧнатӥсьлэн А.П. Перевозчиковалэн пиез.

♦ 29 арес дыръяз эмтодосъя кандидат луиз.

♦ Та вакытэ доктор диссертацизэ дася.

♦ «Офтальмология» специальностья I категориен эмъясь.

♦ Элькунысьтымы офтальмологияя клинической больницаын операциос лэсьтонъя ёзэн кивалтэ.

♦ 70 пала тодос статьяослэн авторзы.

♦ Кузпалыз М.А. Перевозчикова но Ижкарысь одӥгаз поликлиникаын окулист луыса ужа. 

   Туала вакыт азьло аръёслэсь тужгес но висъяське выль технологиослэн азинскеменызы. Нырысетӥ интыын сылэ компьютер, пичиез но, бадӟымез но соин «висе». Компьютерен ужаны, «вотэсысь» кулэзэ шедьтыны, висъяны быгатон – со котькин понна азьлане бадӟым вамыш. Туннэ нокин но солэсь уз куштӥськы ни, угось мар сярысь тодэмед потӥз, ваньзэ отысь шедьтыны быгатод.
    Но, жаляса верано луэ, нылпилы тодон-валан люканы юрттэм сяна, компьютер солэн тазалыкезлы изъян но вае: со сьӧрын мултэс кема пукон пиналъёслэсь синадӟонзэс уродмытэ. Очкиен ветлӥсьёслэн лыдзы будэмъя но сое валаны луэ. Кызьы ке утьыны луэ меда синъ-ёсты лябӟемзылэсь? Тупатыны, эмъяны луэ-а, син уродме ке? Та юанъёс монэ кемаласьгес сюлэмшугъяськыто, малы ке шуоно котькуд кыкетӥ семьяын, аслам эшъёсы, сузэр-вынъёсы но, тросэз пияла синэн ветло. Ижкарын офтальмологияя элькун больница вань. Юанъёсыным отчы вазиськи.

 

    П. А. Перевозчиков пӧртэм син висёнъёсты, кылсярысь, катарактаез, глаукомаез, близорукостез но синмен герӟаськем мукет висёнъёсты эмъя, синъёслы операциос лэсьтэ. «Больница, татысь ӝук зын мон борды анаелэн йӧлыныз ик пыӵамын, шуыны луэ, – вера Пётр Арсентьевич. – Пичи дыръям анае сьӧры ӵем ветлылӥ. Валай, врачлэн ужез туж кулэ, анае трос адямиослы шумпотон кузьма шуыса. Ваньзэ тае лыдэ басьтыса, эмъясь луыны малпай. Начальной школаез йылпумъяса, дышетсконме 30-тӥ номеро школаын азьланьтӥ, отын химиялы но биологиялы бадӟым саклык висъяське. Экзаменъёсме умой сётыса, медакадемие пыри. Отын дышетскытозям, уж ласянь малпанъёсы одӥг пол гинэ ӧз воштӥське: нырысь огъя хирургие интыяськыны малпасько вал, собере сэръёсъя (сосудистой) хирургия тунсыкогес потӥз. Та быръёнэ шоры дышетӥсьёсы туж ик мыло-кыдо ӧз учке, малы ке шуоно со удысъя уж шедьтон ласянь карын соку секыт вал. Ижын кык стационар гинэ ужаз, котькудаз быдэн ньыль эмъясь тыршиз. Соин ик, сэзь синмын учкыса, син эмъясь луыны малпай.
    Мар верасал будӥсь пиналъёслы: синъёсты утьыны луоно. Кылсярысь, компьютер басьтыку, солэсь развёрстказэ (тужгес умоез – 1280x1024 Пикс.), кӧня пол кырмышъямзэ (100 Гц-лэсь ӧжыт медаз луы) лыдэ басьтоно. Зарядка лэсьтоно. 30 минут ужам бере, 10 минут ял каронӧ кыдёке – матэ, паллянэ – буре, улӥе – вылӥе учконо. Таӵе огшоры упражнениос туж юртто. Синме «Систейн» выллем эмъюм тырыса но умой луоз.
    Пичиослэн синъёссы ваньмыз сьӧры вуттӥськыны уг быгато. Быдэ вуон вакыт тужгес кышкыт луэ. Нылъёслэн со 9–12 арескын кутске, нош пиослэн 14–15-аресысен. Сыӵе вакытэ тросэзлэн нылпиослэн синъёссы лябӟо. Соин, эшшо но алама медаз луы шуыса, склеропластической операция лэсьтӥськом. Нырысьсэ со 1978-тӥ арын Н.В.Зайковаен, быдэс улонзэ офтальмологилы сӥзем эмчиен, лэсьтэмын вал. Нош бӧрысь мылкыд карисьёс синадӟонэз умоятӥсь операция лэсьтыны быгато».

 


Люба МИХАЙЛОВА,
УдГУ-ын дышетскись.

bord

Пинал даур (Мувыр, 2012)
Пинал даур (Мувыр, 2012)

Ми контактын