Get Adobe Flash player
АУ УР "Ӟечбур!"

"Дыды басьтом-а, пичие?"

Азьланьлы чакланъёс

Анай. Кыӵе ке но вакытэ нылъёс малпаськыны кутско, куке но соос анай луозы шуыса. Мынам но сыӵе дыры вал. Анай луон сярысь нырысетӥ малпанъёсы мон доры лыктӥзы школаын дышетскыкум. Ми мамаен тятямылэн ньыль кузя. Оло, соин но вуоно семьяме самой ӧжытсэ куинь нылпиёен адӟисько вал. Таӵе малпанъёсме студент вакытам В.Е. Владыкинлэн верамъёсыз юнматъязы. «Одӥг пинал – со пинал ӧвӧл. Кыкетӥ пинал – со ӝыны пинал. Куинетӥ пинал – зэмос пинал. Одӥг нылпи – со эксперимент гинэ. Кык нылпи – экспериментлэн азьланьтонэз. Куинь нылпи – результат», – шуылӥз со. Школаын дышетскем аръёсы кемалась ортчизы ни. Семьяе но вань. Азьпал улонэлы аслам чаклам программаысьтым «нылпиос» пункт самой ӧжытэзлы быдэстэмын.

Добрыня но Зарина

Югыт дунне вылэ вордӥськыны гинэ ӧжыт: весь улытозяд малы ке но дышетсконо. Анай луэме но тани дышетэ. Нылпиез нуллэм сяна, солы быгатыса но валаса ним сётоно. Нимтэк адями улыны уг быгаты. Нимыз кузёзэ мед утёз, улон сюрес кузя капчи вамышъяны мед юрттоз. Пие вордӥськоз шуыса тодэме бере, ним бырйыны кема выри. Сузэрелэн Дашаез вал ини, апаелэн – Денисэз. «Тынадэзлэн но нимыз «Д» букваен мед кутскоз», – вераллязы мыным. Добрыня нимаме туж потэ вал. Нимыз кадь ӟеч, фольклорысь батыр кадь кужмо мед луоз, малпалляй. Но, выжыкылысь ним шедьтэмед шуыса, будэм бераз уз куареты-а? Али шораз учкисько но, Добрыня ним туж тупано вылэм: лякыт сюлэмо, спортэн эшъяське. Ярам ини, Даниил шуыса вазиськемез уг курла.
Кыкетӥезлы но пиналылы ним кема утчай. Чебер ним бырйи кадь вал – Зарина, но картэ «скал ним» шуиз. Гуртамы, пе, сыӵе нимо скалмы вал, ми сое Зорька шуылӥм.
– Ма, кызьы-озьы пиналлы скал ним сётом? – пумит луиз со.
Ай нылыным ветлыкум, пиелэсь юаськӧ
– Пие, кагонька басьтомы-а?
– Ум, луӵӵе машинка басьтом!
Мон, конечно, мукет веранзэ возьмасько вал. Нылпие мукет сюлмаськонъёсын улэ шуыса, шӧдытэк кыли. Пичимы ӝоген вордӥськоз шуыса, пие каллен дышиз, возьманы но кутскиз.

Кагонькадэ возьматы

Нуны ваён юрт доры но вуылэмез вань. Пие анае дорын соку улӥз, нош нуны ваён юрт кыдёкын ик ӧй вал. Анае сое ыштэм, азбарын но, капка азьын но, пе, ӧвӧл. Али гинэ татын шудэ, пе, вал.
– Ну, тӥнь та роддоме мынӥз, дыр, – малпам. Озьы ик вань. Укноос улын сылэ: «Ма-а-ма, кагонькадэ возьматы!» – сюлворе. Кесяськемзэ мон ӧй кылылы. Укное мычкаськыкум, писпу дорысь ӟазегез синйылтӥ вал.
– Со Даниллэн шудонэз ук. Кызьы со татчы вуиз? – малпай соку. Мукет нуналаз дорам ветлыкуз, анае вераз ини нунокезлэсь пегамзэ.

Киыз но вань

Нылы вордӥськем бере, пие сое кутэтэн биням мае ке адӟылӥз. Нылылы толэзь тырмемын ни вал. Кутэтсэ воштыкум вӧзам тупаз.
– Мама, учкы ай, солэн киыз но вань! – паймытскиз со. – Ой, солэн пыдыз но вань!
Собере ӵектӥӟ
– Мама, лэзь ук сое, мед ветлоз.
Солэн но сиемез потэ

Пичи сузэрез ассэ чаляк мед сутоз шуыса но кыӵе сюлмаськиз. Пӧраськыкум огполаз дась пирожкиез кутыса кошкиз. Бератаз йырам чилектӥз, та куать толэзьем мае ке сюдыны ӧз бызьы мед-а? Озьы ик вылэм.
– Ну, ме ук си! – шуыса, ымаз донге пӧрамез.
Нылы понна куалектӥ, чаляк киям кутӥ. Номыр ӧз луы.
– Солэн но сиемез потэ ук, – валэктэ ни мыным пие, тышкаськеме бере.

Мар ке но вералэ

Покчиеныз ветлыкум, кыкназы но нылпиосы туж возьмазы сузэрзэс. Ним но бырйылӥзы, ныл яке пи вордӥськоз шуыса споръяськылӥзы. Дорам лыктыса кӧтме исало вал.
– Мар ке но вералэ, – шуисько.
– А мар-о вералом?
– Садикын ма кариды, кызьы шудӥды вералэ.
Нылы уката яратылӥз вераськыны. Куддыр оло кизэ, оло пыдзэ «кутыны» удалтылӥз солы. Выре но, шудэ но шуыса паймылӥзы. Ачим но сыӵе ик паймись вал, но будэмъя сое вунэтоно.

Лобӟыны бурдъёс

– Будӥды ке, бурдъёсты вордӥськозы но, ваньды ик лобӟоды, –шуылоз вал анаймы. Пичиез сузэрмы эктыны ик кутске вал.
– Татын-а бурдъёсмы будозы? – тыбырзэ возьматыса юалляз. – И ми ваньмы лобӟомы?
– Ваньды ик, ваньды лобӟоды. Возьыны но уз луы.
Будӥмы. Лобӟимы. Табере аслам пиналъёсы будо. Пиналъёсы вӧзын чидасьгес но луи ни, улон шоры но мукетгес учкыны кутски. Пиналъёсылы луыса ик будэм но потэ. Нылпиосы вӧзын, семьяе пушкын асме кыӵе шудоен шӧдӥсько.

Эльвира Симакова.