Get Adobe Flash player
АУ УР "Ӟечбур!"

Пичи Пурга ёросысь Баграш-Бигра школаысь выжыкылъёс

Нюлэс кузё но Никита

 

Одӥг шулдыр нуналэ Коля, Ваня но Никита губияны мынӥзы. Коля шонер сюрес кузя кошкиз, Ваня паллян пала кожиз, нош Никита – бур пала. Никита писпулы укшась тунсыко губи шедьтӥз. Сиыны ярась ӧвӧл шуыса, сое лёгыны турттэ вал, но губи адями кылын вазиӟ
– Эн лёга монэ. Мон – Нюлэс кузё.
– Нош марлы губилы пӧрмытскид?
– Татысен мон туж умой адӟисько, мар луэ нюлэскын, кинъёс татчы ветло.
– Вождэ эн вайы. Мон янгыш. Табере одӥг губиез но вӧсь уг кары, уг ӵыжа ни. Ӟеч лу!
Никита кошкиз, нош кудыез шоры учкыса мылкыдыз куашказ. Бертыны кулэ ини - нош губиез воксё ӧвӧл на. Нырыз ошиськиз.
– Эх, мар мон табере шуо анаелы но атаелы.
– Эн сюлмаськы, мон тынэсьтыд кудыдэ губиосын тырмыто, – шуиз Нюлэс кузё. – Губиосты уд ни ӵыжа шуыса тон кылдэ сётӥд ук. Пияш шумпотӥз. Быдэс куды губи гуртаз вайиз. Анаез но атаез сое ушъязы.

Катя ИВАНОВА,
5-тӥ класс.


Тыбыр вылазы выдӥзы но…

Одӥг пол Мишаен Коля шур дуре мынӥзы. Пыласькизы, шудӥзы но жадизы. Шутэтскыны малпаса, пиос вож турын вылэ выдӥзы. Кыллё соос тыбыр вылазы но, инбаме учкыса, оломар сярысь но малпасько.
– Учкы ай тӥни со пилем шоры, писпулы кельше. Со али татын ке будысал, вужераз асьмеос шундылэсь пегӟысалмы, – шуиз Миша.
Озьы вераса гинэ вуиз – пилем доразы матэктӥз но, музъем вылэ васькыса, зэмос писпулы пӧрмиз. Пиос паймизы.
– Нош таиз тани ӟазеглы кельше, – веранзэ азьланьтӥз Миша. – Вот со вылын лобӟысалмы ке – дуннеез адӟысалмы.
Пилем, ӟазег кариськыса, доразы лобӟиз. Пиос куалетӥзы.
– Эн кышкалэ, мон тӥледыз уг чепыльты, мон тӥляд эшты луо, – шуиз пилем-ӟазег.
Туж умой ортчиз нуналзы пияшъёслэн. Кӧттырмоназы ӟазег-пилем вылын лобазы но писпу-пилем улын шутэтскизы. Ӝытазе люкиськон дырзы вуиз.
– Татчы лыктыкуды, тӥ котьку ми сярысь малпалэ, соку ми нош ик тӥ доры вуом, – шуиз ӟазег-пилем.
Со дырысен пиосты ӵемысь шур дурысь, писпулэн саюлысьтыз, адӟылӥзы. Вӧзазы пукылӥз ӟазег.

Юля ПЕТРОВА,
5 класс.

 

Вить кыктоос

Улӥллям-вылӥллям дас чиньыос – вить кыктоос. Туж тупаса улӥллям. Нимъёссы вылымтэ на бере, ог-огзылы ним сётыны малпаллям. Одӥгъёсыз кыктоос туж зӧкесь вылӥллям, соин ик соосты «бадӟым» нималлям, кыкетӥосыз котьмае возьматъяны яратылӥллям но «возьматӥсьёс» луиллям, куинетӥосыз, котьку но вить чиньыослэн шоразы сылӥсьёс, «шор» чиньыос луиллям. Вылӥллям на соослэн пичильтокъёссы, соослы «чӧльы» ним понӥллям. Нош одӥгъёсызлы нокыӵе но ним тупамтэ, соин ик соосты «нимтэм» шуиллям. Та нимъёссы пыраклы бордазы лякиськиллям.

Настя БОТНИКОВА,
8-тӥ класс.
Пичи Пурга ёрос.

Зангари

Улӥллям-вылӥллям песянаен песятай. Нылпиоссы соослэн вылӥллямтэ. Одӥг пол соос пудо сиён дасяны возь вылэ мынӥллям. Турна ни, пе, песятай турынэз, жадемзэ валатэк тырше. Ужан сяменыз чебер зангари сяськаез шуак адӟем. Песянаез ӧтем но шуэм:
– Учкы ай, кыӵе чебер. Ойдо сое дорамы нуом.
Песянай паймем но, соглаш луэмзэ возьматыса, йырыныз мыкыръям.
Пересьёс зангариез доразы нуиллям, посудае мерттӥллям. Ӵуказеяз ӵукна султыса адӟиллям: кин ке но табань пыжем, ӝӧк вылэ пуктылӥськем… Висъет сьӧрысь нош чебер ныл потэм. Йырсиез, пе, зарниен кисьтаське, киосыз пичиесь, нош синъёсыз зангари тусоесь. Пересьёслы та ныл кельшем, сое доразы улыны кельтӥллям. Нималлям сое Зангари.
Аръёс ортчемъя, Зангари будэм но уката чеберскем. Гуртысь вань егитъёсын со эшъяськем, песянай-песятаезлы юрттон сярысь но вунэтымтэ.
Ваньмыз умой луысал, дыр, но… Зангари сярысь одӥг кышномурт тодэм. Ассэ со самой чебер кожа вылэм, нош татын Зангари потэм: лыз инбам кадь синмо, зарниен кисьтаськись баблес йырсиё… Урод уж малпам кышномурт. Зангари дораз огназ дыръя, вань укноосты но ӧсъёсты усьям. Тодэм угось, сяськаос кезьытэз уг ярато шуыса. Зангари кынмем, шуяны кутскем…
Песянаен песятай бертӥллям но корка дорысьтызы зангари сяськаез адӟиллям. Валаллям соос, Зангаризы быриз шуыса. Нош сяська адями куараен вазем:
– Эн бӧрдэ, дуноосы. Мон котьку луо тӥледын!
Со дырысен песянай-песятайлэн корказы дорын зангари сяська будэ, бер сӥзьылозь чебереныз шумпоттэ.

Юлия АРХИПОВА,
8-тӥ класс.
Муважи школа, Алнаш ёрос.

Куинь курон

Та учырез мон песянаелэсь тодӥ, со – аслаз песянаезлэсь. Нош кинлэсь кылэм соиз песянаймы – тодмо ӧвӧл.
Одӥг гуртын, Шупудо урамысь пичи укноё, бекрано кадь вуж пу коркан, улӥз-вылӥз Эвика. Та пичи но ужась нылашлы яратӥсь анай но кужмо атай вӧзын улыны ӧз кылды, улонын уго олома но луэ. Вож дырысеныз сое вордосэ басьтӥз нылпитэм кышномурт. Солэн кузпалыз, нюлэс коракуз, писпу улэ шедем. Соин ик бӧрдыса но курадӟыса улӥз та палкышно. Тӥни ӵапак соку пичи Эвика сирота кылиз шуыса ивор кылӥськиз. Кема малпаськытэк, кышномурт та ныллы анай кариськиз но дораз улыны выжиз, но нылашез сюлмысьтыз яратыны ӧз быгаты. Котьма понна кыл сюрылӥз та мусо пичи дыдылы, трос ужамез бере но тышкаськылӥз сюранаез.
Котькуд ӵукна, шундыен ӵош султыса, Эвика мусо скалэз доры потылӥз, сое сюдӥз, люктаз, нош Куӵоез ӝытазе сое шукыяськись йӧлын шумпоттылӥз. Нунал куспын Эвика пӧртэм ужъёсты быдэсъялляӟ уриськиз, ву кисьтаз, сиён пӧраз, киуж ужаз. Куӵозэ пумитан азяз гинэ эшъёсыныз шудыны пичияк дыр шедьтылӥз. Капчи мылкыдо но пӧсь сюлэмо нылашез эшъёсыз туж яратӥзы. Нош Эвика ваньмынызлэсь золгес эшъяськиз Зояен. Вань кӧтӝожъёссэ, сюлэмшугъяськонъёссэ, шумпотонъёссэ вералляз со та эшезлы. Зоя анаеныз но песянаеныз улӥз. Атаед тынад ноку ӧй вал, шуылӥз солы анаез, но Зоя ӧз оскылы. «Будӥ ке, одно ик шедьто атайме. Мон сое вӧсь карись кылъёсын уг тышка. Ӟыгырто, чупало но мусоесь синъёсаз учко», – лушкем малпалляз со ас понназ.
Эшъёс кык гурезъёс вискысь пограм писпу дорын пумиськылӥзы. Сое лек сильтӧл погыртэм. Нылъёс солэсь вань вайёссэ октӥзы, мугорзэ кельтӥзы но – пукон инты пӧрмиз. Пукон интызы котырын векчи но ческыт зыно пыштурын будӥз. Сое эшъёс ӧз ишкалэ: мед будоз но пумиськон интыязы ческыт зынзэ вӧлдоз.
Гурезьёс бадӟымесь ӧй вал ке но, эшъёслы, асьсэос пичиесь на вал бере, соос бадӟымесь но кужмоесь потылӥзы.
Одӥг нуналэ Эвика отчы бызьыса вуиз. Ачиз мур шока, жадем.
– Эвика, мар-о сыӵе кема? Возьмаса жади ини, – пумитаз сое Зоя.
– Кошкыны гинэ дасяськи но, сюранай уж сётӥз. Мын пе, емыш бича. Мон шаплы бичай но татчы лыктӥ. Ойдо шудом.
– Эвика, адӟы ай, кыӵе чебер мунё лэсьтӥз мыным песянае.
– Зэм но чебер, синмаськымон…
– Кельше ке, басьты – кузьмасько.
– Ма, тыныд сое лэсьтӥзы ук.
– Песянае выльзэ, эшшо но чеберзэгес, лэсьтоз. Басьты.
Эвика туж шумпотыса басьтӥз мунёез, солэн уго таӵе чебер шудонэз ноку ӧй вал на. Собере кема пукиз мунёезлэн синъёсаз учкыса но ас понназ малпаськыса: кызьы меда шумпоттысал сое аслаз анаез? Собере мукет малпан йыраз лыктэ: «Анае вӧзам луысал ке, нокыӵе мунё но мыным кулэ ӧй луысал. Мон сое чупаса но ӟыгыръяса гинэ во-зьысал».
Мунёен шудэмзы бере Куӵоез пумитаны дыр вуиз. Нылъёс пудоос пумитэ бызьыса мынӥзы. Тани бертэ ни Эвика аслаз Куӵоеныз, пал кияз – мунёез.
Азбаре пыремзы бере, мунёзэ нылаш ас лэсьтэм кӧкыяз понӥз но скалзэ люктаны вамыштӥз.
Со вие кияз ведра-карнанэн сюранаез корказе потӥз – ошмес вулы мыноно кариськем. Кӧкые понэм мунёез адӟыса, йыркурез пӧсьтӥӟ
– Кинлэсь меда мунёзэ ваем ини та кылзӥськисьтэм нылаш! Нылызлы мунё но басьтыны уг быгаты, шуозы ни адямиос. Тани дышето мон тонэ, уд басья ни муртлэсь шудонъёссэ!
Мунёез кияз кутӥз но ошмес дуре вамыштӥз. Нырысь урам пыр потӥз, собере пичи шур дуре кожиз.
– Вуэ кушто, мед выёз!
Пичи но жалятэк, мунёез вуэ зӥртӥз. Шур пождаськиз, бугыртӥськиз но азьлань бызиз.
Эвика нош кырӟаса-кырӟаса нуны-мунёез доры мынэ.
– Султы, султы,
нуные,
Вуиз тынад анаед.
Усьты ини чимыдэ,
Вайи ческыт лёлёдэ.
Кӧкые учкиз но – со буш. Лапырскыса кӧкы улысь но учкиз, отын но мунёез ӧй вал.
– Кытын тон? Пегӟид-а мар-а?
Утчаськыса ветлон дыръяз капка устӥськиз но, сюранаез пыриз.
– Мунёдэ-а утчаськод?
– О-о-о, адӟылӥд шат?
– Адӟылэм гинэ ӧвӧл, кутылӥ но – шуре зӥртӥ. Муртлэсь шудонзэ татчы эн нуллы!
Эвикалэн небыт бамъёсыз кузя синвуос быльыразы.
– Сюранай, малы тон монэн озьы? Сое мыным Зоя кузьмаз. Со мыным сыӵе кельше вал… Кытын со табере?
– Кытысь мон тодом, шур кытчы ке нуиз, вылды. Бӧрдыса эн улы. Мын, маке ужа!
Нылаш берытскиз но бакча пала вамыштӥз. Нош аслаз пушкысьтыз кыӵе ке валантэм куара потэ кадь. Сюлмыз мунёез понна бӧрдэ. Синъёсыз синвуосын пачылмемын. Бакчае потӥз но сяськаосызлы вазиськиӟ
– Мусоосы, чеберъёсы, малы со озьы дауртӥз? Шат сыӵе адӟонтэм каре монэ? Вӧсь гинэ каремез потэ. Кытчы ке солэсь пегӟысал, ватскысал.
Озьы веракуз, тодаз лыктӥз корка сиг.
– Тубо ай сиге, медаз шедьты монэ.
Сигын кузёясько вылэм чонариос. Сое быдэсак вотэсаллям. Липет висъёстӥ нош шунды пиштэ, солэн тылсиосыз пӧлын чиляса эктэ тузон. Эвика котырскиз но, куштэм кудыез шедьтыса, сое берыктӥз но вылаз интыяськиз. Пуке, анайзэ син азяз пуктыны тыршыса.
– Кыӵе меда тон, анае? Чилясь сьӧд йырсиё, зангари синмо, векчи гинэ ымдуро, дыр, киосыд небытэсь… Эх, кыӵе мед ӟыгыръясалзы но мед маяллясалзы соос монэ…
Озьы малпаськыса пуконъяз, солэсь йырзэ кин ке но зэмзэ маялляны ӧдъяз. Нылаш шугектӥз, куды вылысьтыз усиз. Собере шаплы султӥз но мышсэ учкиз. Нош отын… тузонлэсь пӧрмем адями вужер сылэ, пальыша, киыныз шона. Тусыныз али гинэ син шораз пуктыны тыршем анаезлы укша.
– Кин тон, чебер апай?
– Мон трос пол кылылӥ ни тынэсьтыд бӧрдэмдэ, адӟи курадӟемдэ, соин ик ӧй чида, тузон пырыослэсь но шундылэн тылсиосызлэсь адямилы пӧрмытскыса, азяд потӥ. Мон – тынад анаед.
– Анай!
Нылашлэн синвуосыз паймонэн воштӥськизы, нош ачиз оло кышкаса, оло шумпотыса куалекъяны ӧдъяз.
– Нылы, отын, сэрегын, шыкыс сылэ, со тынад песянаедлэн. Отын пужыятэм удмурт дэрем вань. Со тыныд али тупалоз ни. Мон чидатэк возьмай тынэсьтыд будэмдэ. Со дэремез дӥся но песянайдэ син азяд пукты, соку та дэрем куиньзэ туж кулэ куронъёстэ быдэстоз…
Тузон каллен пуксьыны ӧдъяз, тылсиос нош кытчы ке ватскизы кадь. Берпуметӥ кылъёссэ вераса, анаез ышиз.
Эвика шуш куараен кеськиӟ
– Анай, кытчы тон? Эн ышы, та дунне вылэ монэ огнаме эн кельты!
Кылӥз на меда анаез та кылъёссэ, Эвика уг тоды. Но кема малпаськытэк, шыкыс доры мынӥз. Со туж вуж вылэм ини, тузонэн шобырскемын, вотэсъёсын бинялскемын. Ворсэтсэ киыныз ӵушалтӥз но шыкысэз нылаш усьтӥз. Чебер пужыё куэм дэрем вылаз ик понэмын вылэм. Нылаш сое кутӥз но, кӧня ке сэзъяса, бордаз карыса мертаз.
– Зэмзэ но та мыным тупа. Тани али ик дӥсяло но мунёме берыкто.
Эвика шаплы гинэ дӥсяськиз но, куды вылэ пуксьыса, синъёссэ кыниз, песянайзэ син азяз пуктӥз. Нош ас понназ шыпыртэ:
– Мон доры мунёе мед беры … Дугды али, мунё мунёен, нош кинлы ке, оло, золгес кулэ мынам юрттэтэ. Тани Зоялы ик. Кӧня возьма ни со атайзэ. Кыӵе яратэ сое. Мунёзэ но мыным кузьмаз, ӧз жаля.
Синзэ выльысь кыниз но песянайзэ син азяз пуктыса шуиӟ
– Зоя доры атаез мед берытскоз!
Эшшо кык куронэз вераны луонлык вань на. Мар меда малпалом? Анайме берыктысал, но та куронэ дэремлы но быдэстонтэм. Нош вӧзамы тани вить аресъем Коли улэ. Эшъёсыныз ӵош шудыны-бызьылыны уг быгаты, пыдыз, висе.
Эвика синзэ кыниз но вераӟ
– Пичи Колилэн пыдыз мед бурмоз но бызьылыны мед быгатоз!
Я, эшшо одӥгез кылиз, берпуметӥез… Вань курадӟись адямиослы мон юрттысал, но уг быгатӥськы. Иське, куинетӥез куронэ сюранаелы мед юрттоз, чурыт сюлэмын дунне вылын улыны туж секыт, дыр. Небыт но капчи сямо адями доры калык но кыстӥське.
Сюранае лякыт сямо, небыт сюлэмо но капчи мылкыдо мед луоз! – таӵе куинетӥез куронэ.
Эвика вылысьтыз дэремзэ куштӥз но, ӝикыт бинялтыса, шыкысэ понӥз. Ачиз тубат пала вамыштӥз.
Кыре-буре потэмез бере, солы быдэс дунне воштӥськем кадь потыны ӧдъяз. Зорись куазь но, бездытгес пиштӥсь шунды но мылкыдзэ ӧз сӥятэ. Кӧня ке дыр ортчыса, сюранаез коркась потӥз. Эвикаез адӟиз но небыт куараен вазиськиӟ
– Нылы, мунёдэ куштӥ шуыса, туж жалясько. Вождэ эн поты, мон тыныд сыӵе ик мунё вуро. Нош али чае быректӥз, турын куарен пари. Ойдо ӵош юом, оген сыӵе шимес но мӧзмыт.
– Ярам, – сюранаез сьӧры шумпотыса вамыштӥз Эвика.
Нош ӝыт пал капка усьтӥськиз но, отӥ мур шокась Зоя пыриз. Сыӵе зол бызьыса лыктэм Эвика доры, вераськемез но уг луы ни.
– Мар-о луиз, Зоя? – чалякгес тодэмез потӥз Эвикалэн.
– Туннэ атае ми доры лыктӥз. Туж йӧно но чебер. Мынэсьтым, пе, мӧзми. Ӵуказе ми соин городэз адӟыны мыныны ӧдъяськом. Нош тодӥськод-а, Колимы ветлыны ӧдъям. Пыдыз бурмем, врачъёс но, пе, паймо.
– Коли понна но, тон понна но, Зои, мон туж шумпотӥсько. Тынад но Колилэн малпанъёсты быдэсмизы.
– Эвика, дорад бызьыса лыктыкум, выж вылтӥ потыкум, шур дурын кыллись мунёез синйылтӥ. Матэгес лыктӥ но – тынад мунёед. Малы куштӥд, ӧз кельшы шат?
– Туж кельшиз. Шудонъям ыштӥськем.
– Мон шедьтӥ. Ме тани. Я, мон дыртӥсько, шумпотон иворме гинэ вераны ветлӥ дорад.
Зоя дораз бызьыса кошкиз. Эвика сое ӧз ӝегаты, ма, атаез вуэм бере, солы шудонэн йырин-а, ма, на. Нош Эвика мунёзэ юнгес бордаз ӟыгыртӥз но шумпотыса малпаӟ
– Дэрем ке дэрем! Вакчи дыр куспын вань куронъёсме быдэстӥз!
Со дырысен Эвикалэн улонэз капчи но шулдыр луиз. Сюранаез сое гажаны но яратыны быгатӥз.

Ирина Баймурзина,
Кузебай Герд нимо нылпи садысь воспитатель.

Хохряки школаысь выжыкылъёс

Кытчы ышылӥз Коки

Улӥз-вылӥз капчи мылкыдъем Зоя нимо нылаш. Солэн Коки маймылэз вал. Соос ӵошен циркын шудылӥзы, калыкез шулдыртылӥзы.
Одӥг пол репетиция дыръя Коки ышиз. Нылаш утчаз сое, кужмо куараен ӧтиз, цирклэн котькуд сэрегаз йырзэ мычкалляз.
Зоялэн вань мылкыдыз куашказ, дораз бертыны дасяськиз. Сумказэ басьтыны дасяськиз ни вал, отысь шуак кин ке тэтчиз. Коки озьы нылашлэн сумкаяз ватскем вылэм. Циркын кезьыт вал, нош сумкаын – шуныт. Маймыл отчы каньсыраса умме усем.

Валерия ЧЕРНЫХ.

 

Жирафез кунояз

Маша нимо маймыл ас улонзэ эктонъёстэк син азяз ик ӧз пуктылы. Сямызъя со возьдаськись вал, соин ик ас понназ гинэ эктылӥз. Нош одӥг пол со таӵе ялонэз синйылтӥӟ «Ӧтиськом эктонъя ӵошатсконэ, вормись 10 кило банан басьтоз!» Маша бананэз яратэ, ӵошатсконэ пыриськоно кариськиз. Сцена вылэ потыса куасалляськыны ӧдъяз, нош кичабонъёс ӧй вал. Кин ке шораз помидор зӥртӥз.
Синвуаськыса кошкиз маймыл. Пумитаз жираф сюриз. «Конкурсын вормемед потэ ке, нырысь рос-прос дасяськыны кулэ», – буйгатыны выриз со маймылэз. Маша кружоке гожтӥськиз, туж потэ вал угось ассэ возьматэмез. Кема ик дыр ӧз ортчы, со луареат луиз. 10 кило банан басьтэмез бере, нырысь ик жирафез кунояз.

Аня КЕССЛЕР.

 

Аслад шедьтэмед ческытгес

Туж кыдёкысь шаерын, паймымон чебер нюлэскын улэм-вылэм пичи маймыл. Анаез сое писпуысь писпуэ тэтчаны, емыш утчаны дышетэм. Нош пичи маймыллэн номыр пӧрмылымтэ. Соин ик эшъёсыз вылӥе ӧтьыку, куатаськыса тыбырыныз берытскылэм.
Кӧтӝожзэ вормытэк, одӥг пол кытчы синмыз адӟе, отчы бызьыса кошкем. Кема со мынэм, уй но вуэм. Маймыллэн сиемез потыны кутскем. «Ана-ай! Мынам сиеме потэ!» – кесяськыны ӧдъям со. Нош анаез кылымтэ. Кема пукем мискинь огназ, собере йырзэ валлань ӝутэм но – отын, пе, ӵуж-ӵужесь бананъёс ошиськемын. Писпу йылэ бызьыса тубе вылэм но — усем. Юрттэт возьманы нокытысь. Кышканзэ вормыса, нош ик писпуэ кечырскем. Озьы емышъёсты ишкалтэм. Собере мукет писпуэ тэтчыны но кышкамтэ ни. «Ох, кыӵе ческыт вылэм аслад шедьтэм бананэд!» – шумпотэмзэ вераны со анаез доры бызьыса бертэм. Со дырысен маймыл аслыз но, анаезлы но сиён утчаны кутскем.

Савелий РОЖИН.

Усьтӥз но…

Маша туж шаплы нылаш, маймыл кадь ик. Одӥг пол праздник азьын классысьтыз эшъёссэ паймытыны малпаз. Кузьымъёссэ, пӧрмытскыны дасям костюмзэ пакетъёсы тыриз но ӧс дорысь пуйые интыяз. Ӵукна сое кутӥз но школаяз дыртӥз. Пуйыез секыт ке но, мылкыдыз капчи. Классаз пырыса сое усьтӥз но — отын шурупъёс, кортӵогъёс… Дыртонъяз атаезлэсь пуйызэ кутыны шедьтэм. Юнме уг шуо вылэм: «Дыртӥсь мурт пуртые усе».

2-тӥ классын дышетскисьёс.
Завьял ёрос.

Пелё но Шырпи

12 Одӥг нюлэскысь ӝужыт пужым вылын анаеныз ӵош улӥз-вылӥз Сяська нимо пичи пелё. Нуназе со кӧлӥз, нош уйин, вань пелёос сямен ик, сэзьмыт кариськылӥз, ваньзэ чаклалляз. Котькин тодэ, пелёос шырало шуыса, нош Сяськалэн одӥг но шырамез ӧз потылы. Пурысь комокъёс солы туж кельшылӥзы, соосын эшъяськемез потылӥз.
– Анай, уг поты мынам шыр сиеме, емышъёсын, мульыен кӧтме тырыны быгато, – огпол шуиз Сяська.
– Тон пелё, нош пелёослы шыраны кулэ, – пумитаз вазиз анаез.
– Мынам соосын эшъяськеме потэ.
Тӥни озьы ик улӥз пелё, емыш сиыса. Тани вуиз тол. Быдэс улосэз со небыт лымыен шобыртӥз. Толэн ӵош ик вуизы кезьытъёс.
Одӥг ӝытазе, вань пелёос изьыку, вай вылын пукись Сяська бӧрдэм куараез кылӥз. Пичи пелё бадӟым лыз синъёсыныз котыр учкиз. Та тылобурдоос пеймытын туж умой адӟо, соин ик пелё лымы вылын куалекъяса кыллись пурысь шырпиез синйылтӥз. Сяська соку ик дораз лобӟиз.
– Мар тон татын кариськод? – юаз пелё. – Али мукет пелёос сайкалозы но тонэ сиёзы, ӝоггес пегӟы карад.
– Уг быгатӥськы, йыроми, – вераз шырпи. – Вылаз ик туж зол кынми, вырӟылэме но уг луы ни.
– Эх, тон, мискинь, – жаляз сое Сяська. Одӥг бурдыныз со шырпиез шобыртӥз, нош мукетыныз лымы вылысь ӝутӥз.
Озьы Сяська шырпиез быдэс уй шунтыса но мукет пелёослэсь ватыса пукиз. Нош шунды ӝужам бере, шырпи гуртаз нуись сюресэз шедьтӥз. Котьку ог-огзылы юрттыны но куспазы эшъяськыса улыны кыл сётыса люкиськизы шырпиен Сяська.
Сяська выль эшез сярысь вераз но, анаез йырыныз гинэ шоназ. Со нокызьы но валаны ӧз быгаты нылызлэсь шырен эшъяськемзэ.
Ортчиз арня. Нуназе, Сяськаен анаез изён вакытэ, туж зол пискетэм кылӥськиз. Пичи пелё синъёссэ усьтӥз но пужым улысь шыр семьяез адӟиз. Туж зол ӵашетыса, соос пелёосты сайкатыны выризы. Пӧлазы вал Сяськалэн пичи эшез но. Сяська шыръёс доры лобӟиӟ мар меда вераны медо?
– Лобӟе, лобӟе ӝоггес! Татчы пӧйшурасьёс лыкто, пегӟе! – куризы шыръёс.
Тау карыса Сяська анайзэ но мукет пелёосты сайкатыны лобӟиз. Кӧня ке дыр ортчыса, вань пелёос нюлэскысь лобӟизы. Гуртазы соос кышкытлык ортчем бере гинэ берытскизы.
Со дырысен та нюлэскын пелёос шырамысь дугдӥзы. Шыръёс угось соосты утизы. Нош пелё, нокинлэсь ватскытэк, пичи шырпиен эшъяськыны быгатӥз.
Эшъяськонлы номыр уг люкеты, пичи-а тон, бадӟым-а, пелё-а, шыр-а.

В.Л. Макарова,
214 номеро нылпи садын ужась.
Ижкар.

Суредэз Софья МАКАРОВАЛЭН.

IMG_1769
IMG_1769

Ми контактын