Get Adobe Flash player
АУ УР "Ӟечбур!"

Ӧжыт гинэ ӧз выйы

 

   Одӥг пӧсь гужем нуналэ Митёк лудкеч шур дуре мынӥз. Ярдуре вуиз но адӟиӟ кык пурысь ӵӧжъёс вуын уяло. Лудкеч соослы вазиськиӟ «Монэ но уятэ, ӵӧж апайёс». Ӵӧжъёс ог-огзы шоры учкизы но шуизы: «Нырысь гозы ваёно луоз». Митёк ӝогак гинэ бызьыса кошкиз но гозыен берытскиз. Ӵӧжъёс гозы пумъёсты кутӥзы, нош лудкеч шораз кырмиськиз. Озьы куинь кузя уяны кутскизы. Шӧдтэк шорысь тӧдьы вусяська улысь кык вож бакаос уяса потӥзы. Ӵӧжъёс, гозызэс вунэтыса ик, бакаос сьӧры уйиськизы. Лудкеч нош ву вылэ огназ кылиз. Ярдуре кызьы но озьы потыны быгатӥз ик. Но тазьы уямез вань улытозязлы тырмиз, визьмаськиз но бӧрысь нокыӵе амалэн вуэ ӧз пыра ни.

 

Даша ВОРОНЧИХИНА.
Парзи черкогурт.
Глаз ёрос.

bord

Кызьы кылдӥз шоколад?

1. Яратон синкылиос сураськизы

Улӥз-вылӥз лякыт сямо, йӧл кадь ик тӧдьы куо нылаш. Со кофе кадь ик сьӧд куо пияшлы синмаськиз. Но пияш нылаш шоры ӧз ик учкылы. Нылаш бӧрдылӥз, ӝожомылӥз.
Одӥгаз балын соос артэ тупазы. Сьӧд куо пияш тӧдьы нылашез синйылтытэк ӧз кельты – татын со самой чеберез вал. Соос, бубылиос кадь, ӵошен эктӥзы.
Уйшоре нош нылашлэн чеберез сылмиз-тӧлӟиз. Пияш куректӥз-куректӥз но югыт дуннеен люкиськиз. Яратонэзтэк кылем нылашлэн но синъёсыз даурлы ӵоктаськизы. Соослэн лулъёссы синкылиосын сураськизы но курень макелы пӧрмизы. Куанер мурт нош сое шедьтӥз но сииз.

Полина ВОСТРИКОВА.

 

2. Вунэтӥз но…

Улӥз-вылӥз Артур нимо король. Солэн Мерлин нимо ляльчиез вал. Огпол Мерлин Артурлы сиён дасяны мынӥз. Пересьмеменыз-а, мар-а, рецептъёсын книгазэ кытчы понэмзэ вунэтӥз но ачизъя лэсьтӥӟ йӧлэз вуэн сураз, сакыр но какао ватсаз. Пӧрмоссэ Артурлы сётӥз. Корольлы со туж кельшиз, азьланяз но сыӵе сиён дасялляны косӥз.


Ксюша СЕЛЕЗНЁВА.
Шор Постол школа, Завьял ёрос.

bord

Выль ар кырӟан но губиос

  Одӥг пол Тол бабай туж трос коркаосы пыраз но кузьым нуллыса жадиз. Кыралэ пуксёно кариськиз. Кыӵе ке муген кисыяз бугыръяськонъяз, отысь кидыслы кельшись мае ке поттӥз но валаса но ӧз вутты, кызьы сое лымые уськытӥз. Ачиз, кӧня ке шутэтскыса, азьлань кошкиз. Дыртоно, сое пиналъёс возьмало ук! 
  Нуналъёс нош азьлань но азьлань бызё, куазь пумен шунытгес но шунытгес кариськыны кутскиз. Бератаз лымы воксё шунаса быриз но, музъем небыт ожоен шобырскиз. Тол бабайлэн шутэтскыса пукем интыяз нош ненег пичи кыз ӝужаз. Со чагыр инбам пала кыстӥськыны ӧдъяз. Син куспын, оло, ява, бадӟым луиз. Чебер вож кыз котырын мӧйыос пӧсь шунды сиослэсь пегњыса шутэтскыны ярато, пичиос котырысьтыз кисьмам узы бичало, пудоос ческыт турынэз ишко. Ыркыт тӧл, шуныт зор, небыт лымы но кызэз ӧз вунэтылэ.   Кыретӥ-буретӥ поръяны яратӥсь тӧл одӥг пол кыз выжые губиослэсь кидысъёссэс вуттӥз, кыз котырын, пе, мед будозы но солы эш луозы. 
Кӧня ке дыр ортчыса, кыз котыре зэмзэ но турлы пумо губиос будӥзы. Нош кытын губиос – отын ини коньы. Со пырак та кызэ каръяськиз. 
  Ог куинь аръёс ортчыса, Тол бабай нош ик та интые вуиз но нош ик шутэтскыны дасяськиз. Та инты солы тодмо но, тодмотэм но кадь потӥз. Аслыз ачиз оскытэк, кыз котыртӥ куинь пол котырскиз. «Ой, кыӵе чебер кыз мерттӥллям татчы!», — бӧрысь валатскиз со. Кыз йылын пукись коньы сое кылӥз но пельпум вылаз тэтчиз, кемалась луэм учырез тодаз вайытӥз. Та сярысь со оломае но тодӥсь Тӧллэсь кылӥз вал угось. Тол бабай шумпотӥз но кыз котыртӥ кырӟаса берганы кутскиз:
 Тэльын вордскиз пичи вож кыз, 
 Тэльын ик со будӥз…
Коньы та кырӟанэз туж сак кылзӥз. Нош гужем вуыса, сое губиослы кырњаз. Тунсыко кырњан ваньзылы кельшиз. Шуныт зор бере инме вуюись љужаку, табере соос котьку ваче ки кутӥсько но пичи вож кыз сярысь кырњало. Соослэн но угось Выль аре сямен шулдыръяськемзы потэ. Губиос янгыш шат, тол куазез уг адњыло шуыса?
Вож кыз али ке но со интыын сылэ, адямиосыз, пудо-животъёсыз, нымы-кибыосыз шумпоттэ. Табере со эшъяськон юрт выллем – вань мылкыд карисьёсты котыраз люка.

 

Игорь ЕЛИЗАРОВ.
Гожня школа.
Пичи Пурга ёрос.

Редакцилэсь. Молодец, Игорь! Галина Ивановалэн суредэзъя («Ӟечбур!», 51-тћ номер, 2013 ар) туж тунсыко выжыкыл малпамед. Со понна тыныд кузьым – выжыкылъёсын книга!

bord

Монэ но ярато, ГУЖЕМ!

   Куинь толэзь ӵоже кузёяськиз ини Гужем. Шуныт шунды улын, ненег куаръёс но сяськаос пӧлын шумпотыса улӥз со. Малы шум уз поты? Сое быдэс дунне яратэ ук! 
   Огпол со доры чибориё Сӥзьыл вуиз но шуиз: «Малы ке но чебересь ӧвӧл тынад писпуосыд, ваньзы одӥг тусъемесь. Соосты чебереныз, чибориеныз воштыны дыр вуиз ини». Та кылъёсты кылыса, Гужем куаляк луиз, вожзэ поттӥз: «Кошкы татысь, Сӥзьыл! Адӟиськод-а, кыӵе шумпотыса пиналъёс нюлэскы ветло? Гужемез соос ярато! Мон кузёяськыку соос шутэтско, дышетскон сярысь но сюлмаськоно уг луо».
   Та ченгешисьёсты пиналъёс адӟизы но кеськизы: «Учке али, асьме доры Сӥзьыл вуэм! Кыӵе умой, табере нюлэсмы пӧртэм буёло луоз, пӧртэм емышъёсын куноялоз, школае но дышетскыны мыномы!» 
   «Адӟид-а, Гужем, – шуиз Сӥзьыл, – мыным но пиналъёс шумпото». «Яралоз, ачид сямен кар», – шуиз но, нырзэ ошыса, Гужем кошкиз. 
   Со дырысен музъем вылын Сӥзьыл кузёяськыны, ваньзэ ас сяменыз чеберъяны кутскиз.

Наташа ЛЮБОВА.
Нырья школа, Кукмор ёрос, Татарстан.

Дуннеез котыръясь лымыпыры,

    Мӧзмыса кыллисько музъем вылын. Сыӵе потэ ини дуннеез адӟеме. Музъем вылэ васькыкум изиськем уго. Нош тӧл весь ӧвӧл…
    Но тани мон омыре ӝутӥськи. Ура! Тӧл потӥз! 
    Нырысь ик тӧл монэ гурезьёс йылтӥ нуллӥз. Отын нылпи садысь пичиос шудо вал. Огез нискылтэ — усе, нош мукетыз султыса тубе ини. Ваньзылэн чыртыоссы шарфикъёсын думылэмын. 
   Табере монэ «автобусэ» мукет «дугдылонние» — тӧдь-тӧдь бусые – вуттӥз. Татын одӥг лул но ӧвӧл. Пужмертэм писпу гинэ тачыртыса сылэ. Со мыным жаль потӥз. Солэн но, мынам сямен ик, дуннеез адӟемез потэ, дыр, но уг быгаты. Писпулэн выжыосыз уго музъеме муре пыремын. Пыремын ке но ӧй луысалзы, тӧл сое ӝутыны ӧй вормысалыз. Мӧзмыт бусы мынам туж трос вынъёсыным но сузэръёсыным шобыртэмын. Соос синэз мальдытыса ворекъяло. Пыдэстэм инбамысь кизилиос усиллям, кожалод.
   Кузьымгурт школалэн азбараз вуылӥ на. Отын физкультура уроксы мынэ вылэм. Шок-пуль поттыса, школа котыртӥ пиналъёс куасъёсын бызьыло вал. Мон шумприч пияшлэн изьы вылаз лэзиськи но, тӧлэн ӵошатскыса, кӧня ке «нискылай». 
Трос интыосы вуылӥ мон со нуналэ. Туж кельшиз дуннеез котыръяны.

Карина КОЧАНОВА.
Кузьымгурт.

* * * мотик * * *

    Агаелэн мотикез вань. Со туж чебер. Но монэ соин ворттылыны уг лэзё ай, усё шуыса кышкало.
   Одӥг шундыё нуналэ мотикмы доры потӥ. Учкисько но – со ас понназ ужа, кытчы ке мыныны дасяське. Мон кышкай, нош мотикмы мыным адями кылын вазиз:
   — Мынам дуннеез адӟеме потэ, кӧня ке ас поннам ворттыло ай. 
   — Ойдо соку агайлы вералом, медаз паймы, тон ышид шуыса. Ато тонэ лушказы кожалоз.
   — Мын соку ӧть сое, нош мон возьмало.
   Мон бызьыса мынӥ агаез ӧтьыны. Верамелы со ӧз оскы. Соку мон сое китӥз кутӥ но мотикмы доры кыскыса нуи. 
   — Эн сюлмаськы мон понна. Мон дуннеез адӟо но берто, — агайме буйгатӥз мотикмы. Агае сое ӟыгыртӥз но кузь сюрес вылэ келяз.
   Быдэс толэзь возьмам мотикмес. Вуэм бераз со куаразэ поттӥз, милемыз ураме ӧтьыса. Ми куаныса потӥм, сое ӟыгыртӥм, юалляським. Мотикмы туж трос кылэм-адӟем. Али но мадьылэ ай. Лыктэлэ, тӥ но кылзоды.

Лена НИКОЛАЕВА.
Усо школа, Алнаш ёрос.

bord

Выжыкылысь геройёс Тол Бабай дорын куноын
Выжыкылысь геройёс Тол Бабай дорын куноын

Ми контактын