Get Adobe Flash player
АУ УР "Ӟечбур!"

Кытчы гондыр ышылӥз?

 Шундыё сӥзьыл нунал. Гондыр пӧйшуръёсты кенеше люкаӟ кин кызьы толъёз, ма сиёз. Нырысь ик вераськонэ пыриськиз Коньы:
 – Мон губи куасьтӥ, пушмульы дасяй.
 Коньы бӧрсьы Кеч вазиськиӟ
 – Мыным туж трос кулэ ӧвӧл, писпу модосъёсты йырйи ке, кӧты тыроз.
 Ӵушъял песьтэраз улмо, губи октэм но шуэ:
– Мыным тулысозь окмоз.
 Кенешемзы бере тодмо луиз, одӥг Гондыр гинэ толлы дасяськымтэ на. Пӧйшуръёс кыз улэ кылизы, нош Гондыр нюлэскы сиён утчаны кошкиз. Кема ветлӥз со кызъёс вискытӥ, нош возь вылэ потэмез бере муш чуркаосты адӟиз.
– Ох, сиён луоз, – ымдурзэ нюлыштӥз кырыж кук.
 Кӧтыз оглань луытозь чечы сииз. Но шумпотонэз кема ӧз кыстӥськы, олокытысь-марысь вуыса, йыртэмасез мушъёс леказы. Гондыр кык-куинь иськеме, сике, бызьыса кошкиз, жадеменыз шокамез но уг луы ни. Кыз улэ пуксиз но, паймыса пуке. Собере син азяз горд-горд эмезь адӟиськиз. Кӧтыз пульдытозь сииз сое. Ӧз но вала, кызьы жадеменыз гуэ питыраз, отчы ик умме усиз. Сӥзьыл сое куаръёсын шобыртӥз, тол – лымы шобретэн. Озьы Гондыр, уйвӧт адӟыса, тулысозь гуаз кӧлӥз. Тулыс шунды сиосыныз укнояз йыгаськиз но шуэ:
 – Гондыр, султы, тулыс вуиз.
 – Эн люкеты уйвӧтме адӟыны, – мукет пал урдэс вылаз берыктӥськыса шуиз Гондыр.
 – Гондыр, султы ини, лымы шуназ, – нош ик шуэ Тулыс.
 Гондыр амалтэк султӥз, кыре потӥз. Сое адӟыса, пӧйшуръёс паймизы: кытчы со озьы сиён утчаны мынӥз но быдэс толлы ышиз? Гондыр чечы но эмезь сиемез, жадеменыз гуэ питырамез но умме усемез сярысь мадиз. Пӧйшуръёс кема серекъязы сое.

Настя МАРКОВА,
2-тӥ класс.
Пороз школа.
Шаркан ёрос.

Кузебай Герд нимо гимназиысь выжыкылъёс

Кузебай Герд нимо гимназиысь быдэс ӝутэт выжыкылъёс вуттӥзы. Ваньзы соос нимысьтыз книга выллем лэсьтэмын, суредамын, чебермамын. Озьы тыршиллям 2-тӥ классын дышетскисьёс. Тодмо ӟуч калык выжыкылысь геройёсты соос ас сяменызы усьтӥллям. Тӥледлы но, лыдӟись эшъёсмы, выль авторъёсмылэн выль сямен малпам выжыкылъёсынызы тодматскыны дэмласьком.

Выль город

Одӥг городын улэм Куинь йыро кый. Со туж ӟеч сямо вылэм, городэз утись луыса ужам. Городлэн тужгес но бадӟым тушмонэз вылэм артысь нюлэскын улӥсь Обыда. Со пеймыт нюлэс ялан пӧртмаськылэм. Одӥг пол Обыдалэн городэз киултэмез потэм. Тани со быдэс армия вукузёосты, вунылъёсты, лобась шыръёсты люкам. Городын улӥсьёс кышкаса пегӟоно луиллям. Куинь йыро кый сӧсырмыны шедем. Город тём-тём пеймыт луэм. Улӥсьёсыз нюлэсъёсы кошкиллям, коркаос каллен-каллен пуктылыны кутскиллям. Озьы кылдэм выль город. Куинь йыро кыез но бурмытӥллям. Обыда дорын улӥсьёс выль городлы вожъяськыны кутскиллям. Ваньзы соос оген-кыкен выль городэ выжиллям. Обыда чылкак огназ кылем. Кышкаменыз куинь музъем сьӧры лобӟыса кошкем.

Соня ФЁДОРОВА.

 

Дауръёс вискытӥ юмшан

 

Одӥг городын Иван нимо пияш улэм. Трамвае пуксьыса школае мынэ вылэм со одӥг ӵукна. Вӧзаз кыӵе ке пересь интыяськем. «Яг песяйлы кельше ук та», – малпам Иван. Нош песянай, пе, шуэ: «Азьвыл мон, зэмзэ но, Баба-Яга вал. Озьы малпамед понна мон тонэ 70 ар талэсь азьвыл вакытэ келяло». Иван 1945-тӥ аре вуэм.
«Кыӵе умой!» – малпам Иван, урокъёсты но дасяно ӧвӧл. Солэн шуак сиемез потэм. Нош кытчы мыноно? Иван кышкаса но вуттэм вылэм ини. Син азяз шатёр шедем. Нош со шатёрын ӟуч солдатъёс пуко. Соос Иванлы шуӧ «Лык ми доры, пичи партизан!» Иванэз солдатъёс ас пизэс кадь пумиталлям, сюдӥллям но. Пияшлэн кӧтыз тырем но турын вылэ изьыны выдэм. Солдатъёс уйин разведкае кошкиллям. Иван ӵукна кынмыса сайкам. Ожтӥрлык кутэм но ожмаськыны кошкем. Нош отын Куинь йыро кый ракетаосын сялаське. Иван вадьсын ик туж зол гудыртэм:
«Бах! Бах! Бах!»
Иван сайкам. Трамвайын умме усем вылэм со, вӧзаз песянай но ӧвӧл ни.

Степан СКВОРЦОВ.

 

Кызьы лобаз осьминожка

 

Одӥг зарезьын улэм-вылэм Сара нимо осьминожка. Туж яратэ вылэм со тулкымъёс вылын лэйканы. Одӥг пол Сара зарезьысь потэм но пӧртмаськись коркаез адӟем. Зарезь вадьсытӥ шаръёс вылын лобӟе вылэм со. Саралэн но озьы лобамез потыны кутскем. «Мынам но лобаме потэ!» – кеськем со. Корка шуак уллане васькем но, осьминоглэн отчы кечырскемез луэм. Корка пушкын уло вылэм фокус возьматъясьёс, быдэс дуннеетӥ соос озьы ветло вылэм. Осьминог соосын ӵош быдэс дуннеез котыръям. Сомында фокусъёс лэсьтыны дышем со соосын ӵош. Выльысен ас зарезяз бертыса, фокусъёссэ возьматъям. Ваньмыз шумпотӥллям. Со вылэм туж бадӟым праздник!

Влада ТРИНЕЕВА.


Мили коӵышпи но Софи тылобурдо
Та учыр луиз дунне вылысь тужгес ӝужыт Олимпия гурезь йылын. Отын вордскиз Мили нимо коӵышпи. Мукет пӧйшуръёс татын ӧй вал. Ваньзы соос гурезь улланьын улӥзы. Милилэн но потэ вал соос доры васькемез но йыромоз шуыса кышкалляз. Одӥг пол гурезь йылэ номырлэсь кышкасьтэм Софи нимо тылобурдо вуиз. Софилэн Милилы юрттэмез потэм. Коӵышпиез тыбыраз пуктыса лобӟыны ӧдъя вал Софи. Ас кужымзэ ӧзгес вала. Кыкназы ик уллане бекмылязы. Васькизы соос озьы уй но нунал. Собере эшшо одӥг уй но ӝыны нунал. Ӝыт пал гинэ, кымесъёсынызы мынэсьтым ӧсъёсме усьтыса, дорам вуизы. Мон соосты сюдӥ, сектай но кӧлыны выдтӥ. Со дырысен коӵышпи мыным шыр кутылыны юрттэ, нош Софи ӵукъёсы чебер кырӟанъёсын сайкатэ.

Аэлита НАЗМУТДИНОВА.


Кый но Анира
Улэм-вылэм Анира нимо нылаш. Со туж яратэ вылэм пӧйшуръёсты. Одӥг пол нылаш шудыны потэм но пичи пилэсь кыез жугемзэ адӟем. Анира кый пала дурбасьтэм. Пияшлэсь бодыоссэ талам но кыез эрике лэзем.
Одӥг пол кайгу вуиз. Аниралэн Оля нимо эшез ышиз. Анира соку ик эшсэ утчаны кошкиз. Кема утчаз со эшсэ но ӧз шедьты. Тани куакъёс пӧлысь кый шӧдтэк шорысь потӥз но ас сьӧраз ӧтиз кадь. Соку Анира тодмаз утем кыйзэ. Нылаш кый сьӧры мынӥз но бадӟым гу доры вуиз. Бӧрдэм куара кылӥськиз. Гу пыдсын Оля викышъяса улэ вылэм. Солэн отысь потэмез уг луы. Анира эшезлы юрттӥз. Кык эшъёс шумпотыса доразы бертӥзы. Озьы кый тау кариз нылашлы юрттэмез понна.

Соня ЗОРИНА.


Иванлэн оскымон эшез
Одӥг гуртын улӥз Иван нимо егит пи. Жучка пуныез солы оскымон эш интыын вал. Тани гуртэ урод ивор вӧлмиз. Кин ке, пе, гуртэз киултыны малпа. Оло Кощей Бессмертный, оло Куинь йыро кый, оло нош Обыда? Кудзы-о меда? Тани гурт калык кенеше люкаськиз. Кема малпаськизы ма карыны. Ваньзы Иванлы оскизы. Со угось етӥз но кужмо. Сиён но палаш кутыса, Иван сюрес вылэ дасяськиз. Жучка эшез но сьӧрысьтыз ӧз кыльы, шудон тупсэ но кутӥз.
Кема соос ветлӥзы. Нош гурт вылэ нокин омырскись ӧз луы. Жучкалэн угось тупез синпӧртмась вал. Со сьӧры уйиськонъязы, Обыда но, Куинь йыро кый но, Кощей Бессмертный но йыромизы, гуртэ сюресэз ыштӥзы. Со дырысен гурт калык нокинлэсь кышкатэк улэ.

Ксения ТАТАУРОВА.

Кузебай Герд нимо гимназия.

Ижкар.

Ӵыжин

Пужым йылысь ӵыжин усем. Тӧл сое кыдёке зӥртэм.
 Питыраса-питыраса Ӵыжин кузьыли кар доры вуэм. Возьмаськись Кузьыли солы шуэм:
 Ӵыжин, тон чурыт но бадӟым. Питыра татчы, нош мон вылад тубо но кыдёке-кыдёке учко!
 – Уг, – шуэм но азьлань питрам Ӵыжин.
 Питырам, питырам но Кайсыпи доры вуэм. Тылобурдо туж шумпотэм: кидысъёссэ, пе, сиё. Со вискын Тӧл потэм, кӧс Ӵыжинэз кыдёке сэрпалтэм.
Питырам, питырам Ӵыжин нюлэскытӥ, пумитаз Коньы потэм.
– О, макем бадӟым Ӵыжин! Таидлэн кидысэз но тыраз, дыр. Али ик сиёно!
 Кидысъёссэ утчаса, Коньы Ӵыжинэз куртчем, нош со, пе, тырттэм! Номыр шедьтымтэ.
 Удалтэм ӵыжинлэн кидысъёсыз оштолэзе ик юж вылтӥ тӧлъя лобӟо-быро уго.

Ксения ПОНОМАРЁВА.
Парзи школа, Глаз ёрос.

Чорыг ныл но Вася

 

выжыкыл

Улӥз-вылӥз Вася нимо воргорон. Одӥг пол со чорыганы мынӥз. Пукыез кема ӧз вырӟылы. Воргорон вушйылыны кутскиз ни вал. Шӧдтэк шорысь зыгатыны ӧдъяз. Визнанзэ кыскиз но — куриказ йӧспӧртэм чорыг шедем. Паймымон чорыг адями сямен вераськыны кутскиз.
— Эн сиы монэ, Вася, банкаяд пон но дорад ну.
Вася паймиз, ма вераны ик ӟудӥз. Собере посудае ву омыртӥз но чорыгез отчы понӥз. Дораз вайыса сое сюдӥз.
Одӥг пол Вася гуртысьтызы Митреен кин кинэ вормоз шуыса споръяськизы. Митрей кужмогес вал. Вася гуртаз бертыса куректыны кутскиз.
— Ма луиз, Вася? — юаз чорыг.
– Ӵуказе ми Митреен нюръяськом. Кышкасько, со вормоз но собере калык азьын монэ возьытэ вуттоз, — мур лулӟиз пиосмурт.
— Эн куректы, изьыны выд, номыр аламазэ эн малпа.
Вася озьы ик кариз. Ӵукна султыса мисьтӥськиз, сиськиз но Митреен ӵошатскыны мынӥз. Кема ик ӧз нюръяське — Вася вормиз! Дораз куаныса бертӥз, ваньзэ чорыгезлы вераз.
Нунал ортчиз, ӵукна вуиз. Вася нош ик мур малпаськонэ усиӟ «Мыным кызь вить арес ини, нош кышное ӧвӧл на…» Корка пушкытӥз солань-талань ветлӥз но чорыгезлы вазиӟ
— Мон тыныд дыши ини, чорыге. Тусыд чорыглэн ке но, лу мынам кышное.
Верамзэ кылыса, чорыг чиляны кутскиӟ
— Мон чорыг ӧвӧл, мон эксэй ныл, Василиса. Лек песянай монэ чорыглы пӧрмытӥз. Таӵе тусбуен но кин ке яратӥз ке, мон выльысь адямилы пӧрмо, шуиз.
Озьы ик луиз. Чорыг интые Вася азе чебер веськрес нылаш султӥз.
Шулдыр сюанын ӝоген быдэс гурт шулдыръяськиз.

Юля АРХИПОВА.
Усо школа, Алнаш ёрос.

Лудкеч но Кион

Лудкеч но Кион

 Одӥг шулдыр нуналэ лудкечъёс нюлэс куше шудыны потӥллям. Пеймыт луыны кутскем бере гинэ доразы пыриллям. Нош одӥгез Лудкеч бертыса вуттымтэ, азяз Кион потэм. Лудкеч кукыз йӧтылытэк бызьыса кошкем. Нош Кион — сьӧраз.
 — Эн пегӟы! Эн пегӟы, Лудкеч! Мон тонэ одно ик куто.
Кесяськонъяз Кион канжаськыса усем, нош Лудкеч со вискын дораз пырем.
Мукет нуналаз Лудкеч эшъёсызлы шуэм:
 — Ойдолэ Кионэз алдалом. Со ноку но асьмелы гань-гань улыны уз сёты, быдэс улонмес кышкаса улом.
 Лудкечъёс соглаш луиллям.
 Нуназе шорын Лудкеч Кион доры мынэм. Ачиз, пе, дыр-р! куалекъя, но Кионлы уг возьматы.
 — Кион, Кион, туннэ ӝытазе пӧйшурась лыктоз но тонэ ыбоз. Пегӟы ӝоггес!
 — Нош кытчы? — кышкатскем пурысь.
 — Тодӥськод на-а, нюлэс сьӧрын писпу будэ. Со сьӧры пегӟы. Отысь тонэ нокин уз шедьты.
 Кион озьы ик карем.
 Со дырысен нюлэскын улӥсьёс капчи шокчиллям. Кион со писпу сьӧрысь потаны кышка, пе, весь пӧйшурасез возьма.

Валерия СЕМАКИНА.
Гожня школа.
Пичи Пурга ёрос.

Выжыкылысь геройёс Тол Бабай дорын куноын
Выжыкылысь геройёс Тол Бабай дорын куноын

Ми контактын