Get Adobe Flash player
АУ УР "Ӟечбур!"

Малы кызьпулэн мугорыз тӧдьы?

 

Одӥг бадӟым но сяськаясь чебер садын сьӧд-сьӧд кызьпу будӥз. Со садэ ву кисьтаны Коньы вуиз. Лейказэ кутыса ву кисьтакуз, Коньылэн йыраз туж чебер рифма кылдӥз. Тае одно ик гожтоно, малпаз Коньы, нош бумагаез ӧвӧл. Вань сэрегъёсысь утчаськиз — номыр ӧз шедьты. Соку солэн тодаз лыктӥз песятаезлэн бумагалэн кылдэмез сярысь мадемез. Коньы кызьпулэсь сулзэ кесиз но кылбур чуръёссэ гожтӥз. Кӧня ке улыса йыраз выль кылбур вордскиз. Сое но Коньы кызьпу сул вылэ гожтӥз. Озьы кызьпулэн мугорыз тӧдьыен куӵо луиз.

Маша БЕСПАЛОВА.
***
Возь вылын кык кызьпуос будӥзы. Кыкназы но сьӧд-сьӧдэсь вал. Мукет писпуос азьын соос сьӧд мугорзылэсь возьдаськизы. Асьсэлы асьсэос кырсесь кадь потылӥзы. Кызь ар малпаськемзы бере, одӥгезлэн йыраз шуккиз, кызьы со сьӧд буёлэз быдтоно. Соос тӧдьы мел шедьтӥзы, вайёсынызы сое небӟытӥзы но ог-огзэс буязы. Киоссы ӧвӧл бере, кызьпуос воксё тӧдьы буяськыны ӧз быгатэ, интыен-интыен сьӧд виштыоссы но кыльылӥзы. Буяськон секретсы сярысь кызьпуос мукет эшъёссылы но веразы. Сыӵе амалэн дунне вылысь вань кызьпуос буяськизы. Куд-огез али но буясько на.

Ксюша ТАТАУРОВА.
2-тӥ «б» класс.
Кузебай Герд нимо гимназия.
Ижкар.

Кубо но Буко

Одӥг пол пумиськиллям
Кубо но Буко.
Огкыл ӧвӧл шедьтӥллям,
Сыло, керето.
Буколы Кубо шуэ:
– Кинлы тон кулэ,
Валъёстэ но ни туэ
Машина воштэ.
Бен соин ик тон, Буко,
Ужатэк пуккод.
– Ой, эн тэтча тон, Кубо,
Ужаськод, оло?
Кыллиськод ук музейын –
Куно кадь татын.
Ыжгон ӧвӧл черсэмын,
Ӧвӧл ни етӥн.
Черсэдлэн но ужезлы
Уг чабы нокин.
Олокытысь Черс вуиӟ
– Дуно эшъёсы,
Асьмеос одӥг вайысь
Оло, лэсьтэмын.
Асьмелэн пуштросъёсмы
Туж герӟаськемын.
Тазьы ке керетӥмы,
Тылын сутскомы.
Кызьы соку Ваняос,
Аняос, Аринаос…
Тодозы ма со Буко,
Ма со Черс но ма — Кубо.
Ивановоысь тани
Бертэмын, шуо, Мани.
Черсыны но быгатэ,
Киосыз купырмымтэ.
Валъёсты уте Валя.
Юалляськиз вал валлян.
Оло, пыроз буколы…
Яралом али ужлы.

Г.Л. Широбокова.
Ижкар.

Кык пересьёс (К.Гердлэн "Кык гондыръёс" выжыкылэзъя)

Кыдёкын ӧвӧл, татын –
Туж пичи черкогуртын –
Улӥзы кык пересьёс,
Улӥзы умой соос.

Корказы йыг-йыг сылэ,
Коргидзы кырыжамтэ.
Вань соослэн пунызы,
Азбар тыр курегъёссы,
Горд скалзы но атассы.

Ог ӵукна песяй султӥз,
Пу понна тэле кошкиз.
Беризез отысь шедьтӥз,
Кораны сое кутскиз.

Шуак кин ке «ой!» кеськиз –
Пересед туж куалектӥз.
Учкыса азьзэ-берзэ,
Нош азьланьтӥз коранзэ.

Кӧня ке улса шӧдӥӟ
Беризь озьы мур лулскиз.
Бӧрдыса кадь тэльмыриӟ
– Эн кора монэ, пересь.
Мон сёто тыныд азвесь.
Со сяна, мае курод,
Дорад бертыса шедьтод.

Кытӥ, мар куспын пересь
Телефонзэ поттӥз ай.
Жингыртӥз кузпалэзлы,
Валэктӥз ваньзэ солы.
Кышноез солы шуиӟ
«Мед сётоз абдран беризь…»

Песянай куриз айфон,
Со вӧзы, пе, – телефон.
Беризь ваньзэ ик сётӥз.
Воргорон дораз бертӥз.
Кышноез лекын вазиӟ
«Вай ӟечгес телефондэ,
Потты мыным айфондэ».

Пересьёс уло-выло,
Интернетэ пырало,
Верасько телефонэн,
Тодматско трос иворен.

Кыкназы та пересьёс
Луизы усточиос
Телефонэз валанъя,
Интернетэ пыранъя.
Но… вужмиз телефонзы,
Уг ни ужа айфонзы.

Пересь воргорон выльысь
Беризез утча сикысь.
Оломар но курысал,
Ваньзэ-ваньзэ выльдысал.

Туж кема пересь поръяз,
Беризьзэ ялан утчаз.
Нош ӝытпал сое шедьтӥз,
Адӟыса туж ӝожомиӟ
Дуно писпуэз куасьмем –
Номыр уз лу ни курем…

Пересьмы дораз бертӥз,
Кышноезлы валэктӥӟ
«Уз лу ни милем гаджет,
Луӵӵе лыдӟомы газет».

Вераме мынам потэ:
Сукъяськын ӧвӧл кулэ!
Инмарлэсь эн куре трос,
Мар сётоно, со тодоз.

Лия АШИХМИНА,
5-тӥ класс.
Александрово школа.
Кез ёрос.

Бусыын сылэ корка...

Нуись.
Кылзэ выль выжыкылмес
Пичиез но мӧйыез!
Ӟеч луыны со юрттоз,
Эшъяськыны дышетоз.
Бусыын сылэ корка,
Паймымон, чебер корка…
(Корка доры бызьыса лыкто кык шырпиос.)
1-тӥ ШЫРПИ.
Учкы али, выль корка!
(Коркаез донгаса утчало.)
2-тӥ ШЫРПИ.
Юн сылэ, уз, дыр, куашка.
1-тӥ ШЫРПИ.
Зор-котъёслэсь пегӟыны,
Кезьыт дыръя шунскыны
Киызлэсь пыдыз ачиз!
2-тӥ ШЫРПИ.
Удалтӥз ке удалтӥз!
НУИСЬ.
Корказы шуныт, югыт,
Нош педлон ини кезьыт.
(Бакапиос тэтчаса лыкто.)
1-тӥ БАКАПИ.
Ква-ква-ква, кыӵе корка!
2-тӥ БАКАПИ.
Ой, пыды кынме, ква-ква!
Туж шуныт, дыр, та корка.
1-тӥ БАКАПИ.
Кин меда улэ отын,
Пыдзэ шунтэ гур дурын?
ШЫРПИОС.
Ми улӥськом – шырпиос.
Асьтэос нош тӥ кинъёс?
БАКАПИОС.
Ми пичи бакапиос,
Ква-кваккетса тэтчасьёс.
Ми но улом тӥледын,
Шулдыр луоз огазьын.
ШЫРПИОС.
Мар карны быгаткоды,
Маин тӥ паймытоды?
БАКАПИОС.
Тэтчаськом, кваккетӥськом,
Шудыны яратӥськом.
(Залэн ӵош шудон ортчыто.)
НУИСЬ.
Шырпиос, бакапиос,
Ӵош уло таре соос.
(Корка доры лыктыса, лудкечпиос йыгасько.)
ЛУДКЕЧПИОС.
Кин но кин улэ татын,
Шуныт, югыт юртъерын?
ШЫРПИОС.
Шырпиос-мудӥськисьёс.
БАКАПИОС.
Ми – пичи бакапиос.
ЛУДКЕЧПИОС.
Ми ке нош лудкечпиос –
Шудыны яратӥсьёс.
(«Лудкечпи, гебыр-гебыр» шудон ортчыто.)
НУИСЬ.
Лэзизы лудкечъёсты,
Ӵош уло ини ваньзы.
(Пото ӟичыпиос.)
ӞИЧЫПИОС.
Ми — кыкто ӟичыпиос,
Бусы кузя ветлӥськом,
Улон инты утчаськом.
(Корка доры лыктыса йыгасько.)
Кин но кин улэ татын,
Шуныт, югыт юртъерын?
ШЫРПИОС.
Шырпиос-мудӥськисьёс,
БАКАПИОС.
Ми – пичи бакапиос.
ЛУДКЕЧПИОС.
Ми ке нош лудкечпиос –
Шудыны яратӥсьёс.
ӞИЧЫПИОС.
Ми нош кыкто сузэръёс –
Кильтыро ӟичыпиос.
Кырӟаны быгатӥськом,
Кырӟаса али лэзём!
(Кырӟан кырӟало.)
НУИСЬ.
Кыӵе шулдыр кырӟазы!
Вань пӧйшуръёс паймизы.
Ӵош кутскыса кырӟало,
Ваньзы ӵош ик тэтчало.
Туж шулдыр таре уло!
(Кионпиос корка доры лыктыса йыгасько.)
Кин но кин улэ татын,
Шуныт, югыт юртъерын?
ШЫРПИОС.
Шырпиос-мудӥськисьёс.
БАКАПИОС.
Ми – пичи бакапиос.
ЛУДКЕЧПИОС.
Ми ке нош лудкечпиос–
Шудыны яратӥсьёс.
ӞИЧЫПИОС.
Ми нош кыкто сузэръёс –
Кильтыро ӟичыпиос.
КИОНПИОС.
Ми – пурысь кионпиос,
Люконтэмесь ӟеч эшъёс.
Чик но ӧвӧл ми лекесь,
Туж лякытэсь ми, ӟечесь.
Лэзелэ вал дорады
Шунскыны гур дурады.
НУИСЬ.
Кионпиос кырӟазы,
Эктыса но лэзизы.
Шумпото таре ваньзы –
Кыӵе бадӟым семьязы!
(Гондырпиос пото.)
ГОНДЫРПИОС.
Чечылы ми пырамы,
Зол ужамы, жадимы.
Мушъёс лобо сьӧрамы,
Кытчы меда ватскомы?
Учкы ай, корка сылэ.
Кин меда татын улэ?
ШЫРПИОС.
Шырпиос-мудӥськисьёс.
БАКАПИОС.
Ми – пичи бакапиос.
ЛУДКЕЧПИОС.
Ми ке нош лудкечпиос –
Шудыны яратӥсьёс.
ӞИЧЫПИОС.
Ми нош кыкто сузэръёс –
Кильтыро ӟичыпиос.
КИОНПИОС.
Ми – пурысь кионпиос,
Люконтэмесь ӟеч эшъёс.
ГОНДЫРПИОС.
Ми – мусо гондырпиос.
Милемын шулдыр луоз.
Эктыса али лэзём,
Ваньдэсты ик паймытом!
НУИСЬ.
Гондыръёс ӟеч эктӥзы,
Тэль пӧйшуръёс лӧптӥзы.
Ваньзы ӵош али уло.
Шырпиос выжзэс ӵужо,
Бакапиос пӧрасько,
Лудкечпиос мисьтасько,
Дӥсь вуро ӟичыпиос,
Пу вандо кионпиос.
Гондырпиос ву нулло,
Туж шулдыр ваньзы уло,
Ог-огзэс туж гажало.

Дасяз Р. В. Першина,
Изгурт нылпи садысь визьнодась.
Завьял ёрос.

Вите, ӝоген вуом!

Выль ар азьын ваньзылэн ужзы трос, Тол бабайлэн – тужгес но. Со нылпиослэн куронъёссы сярысь сюлмаське. «Фабрикаяз» уен-нуналэн тыршись коньыос но лудкечъёс кузьымъёс дасяло. Лымы мунёос тӧдьы валъёсты, дӧдьыосты чеберъяло. Лымы ныл аслыз выль шуба вуре.
– Песятай, ойдо мон ӝуждаладэ мертало! – шуиз со огпол Тол бабайлы.
– Малы? – паймиз пересь.
– Кызьы малы? Выль ар вуэ, оло, тыныд но выль шуба вуроно. Кин тодэ, гужем куспын, оло, тон будӥд яке зӧкомид…
– Мон пересь ук ини, кытчы-о будом на?
– Кыӵе пересь тон? Кулэтэмзэ эн вера!
Песятайлы амалтэк нылызлэсь кылзӥськоно луиз. Ярам, шубаез тупа вылэм ай. Кесиськем интыосыз но ӧвӧл.
Лымы ныл шуба чеберъянзэ азьланьтӥз, нош Тол бабай «фабрикаяз» вамыштӥз.
– Ужъёсмы умой мыно, – вераз солы Коньы апай, – тани берпуметӥ шудонъёсмес дасяськом ни. Вань пиналъёслы соос тырмозы.
Соку Тол бабай лымы мунёос доры мынӥз. Нош лымы мунё отын – огназ.
– Кытын ваньмыз? – паймиз пересь.
– Милям ужмы лэсьтэмын: дӧдьыос – дасесь, валъёс – сюдэмын но чеберъямын.
– Умой ужаллямды, адӟем карымон тыршиллямды! Ӟечокъёс! Нылпиосты Выль ар праздникъёсын ӟечкыланы асьмеос дасесь. Вите милемыз, ӝоген вуом!

Настя ДАВЫДОВА.
Юськи школа, Завьял ёрос.

IMG_1735
IMG_1735

Ми контактын