Get Adobe Flash player
АУ УР "Ӟечбур!"

Тӥледлы, пиос, конкурс!

umorto   Шумпотто ни шундыё но няськыт тулыс нуналъёс. Ӝоген шуныт палъёсысь берытскозы бурдо эшъёсмы. Кыӵе шумпото, дыр, соос дор пала вуонзылы! Ярам, сьӧдкуакаос писпуос йылэ каръёс лэсьтозы. Нош шырчикъёс? Ойдолэ дасяськом соосты пумитаны. Мукет кунъёсын соослы быдэс «дворецъёс», «коттеджъёс» пуктыло. Асьмеос но шырчикъёслы мылкыдзыя кельшымон улон инты лэсьтыны тыршомы. Таин валче ялӥськомы КОНКУРС! Кин тужгес но ассэ кибашлы возьматоз но выль, чебер, ямлы (уютный, комфортный) «аппартаментъёс» дасялоз соослы? 

   Дэмласьком шырчик кар лэсьтон одӥгзэ амалэз (быдӟалаез миллиметрен сётэмын). Возьматос (образец) борды асьтэлэсь малпанъёстэс но быгатонлыкъёстэс уже кутыса, «дворец» пӧрмытоды.
   Быдэстэм умортоосыныды туспуктэмъёстэс возьмаломы 20-тӥ оштолэзёзь Этот адрес электронной почты защищен от спам-ботов. У вас должен быть включен JavaScript для просмотра. электрон почтаямы. Туж умой луысал, уморто бордын тыршемды сярысь лыдӟисьёсмылы но гожтысалды ке. Уж борды, эшъёс! Тужгес кибашлыоссэ возьмало ӟеч кузьымъёс.

bord

 

Конкурсъёслы йылпумъянъёс

Конкурсъёсы пыриськем пиналъёс чидатэк витё ни, луоз, «Ӟечбур!»-лэсь котькуд выль номерзэ. Ма, кинлэн-о тодэмез уз поты сояз яке таяз вормемез сярысь?! Мар бен, дыр вуиз кӧняезлы ке йылпумъян лэсьтыны.

 Укноосты ӟырт кезьытэн но мед пальышалозы

       «…Корказы дортӥ ортчыкузы, гуртоос, солэн чеберезлы паймеменызы, сылыса ик учкылӥзы…», – лыдӟиськом Люба Михайловалэсь (Агрыз ёрос, Варклед-Бодья школа) конкурсэ вуэм ужысьтыз чуръёссэ. Али УдГУ-ын дышетскись нылаш гуртысьтызы кибашлы воргорон сярысь яркыт гожтэм. Очерклы матын луись улонысь учырез понна, Любаез дипломен но книга кузьымъёсын пусйиськом.

Суредъёсынызы шумпоттӥзы Алнаш ёросысь Чем.-Куюк школаысь Карина Кочанова, Ульяна Антонова но Ижкарысь 11 номеро школаысь Катя Романова. Нылъёс асьсэлэсь корказэс суредаллям. Шумпотоно соос понна: шулдыр, шуныт коркан уло. Нош сяськаоссы укно дуразы кӧня! Та нылъёс но куиньназы ик дипломен но книга кузьымъёсын пусъемын.

Бӧрысьгес чибориё кагазъёсты лякылыса, суредаса лэсьтэм аппликациоссы вуизы Завьял ёросысь Шор Постол школаысь 3-тӥ классысь пиналъёслэн. Вадим но Денис Кабановъёслы, Настя Шитовалы, Кирилл Корепановлы, Костя Казанцевлы, Кристина Рогожниковалы, Юра Соколовлы сертификат сётӥськом.

 Малы мон гожтӥськи «Ӟечбур!»-лы

Та конкурсэ мыло-кыдо пыриськем пиналъёслы кузьымъёсын Тол бабайлы юрттӥз «Панорама» ООО. Озьыен, чебересь, турлы-турлы йырси тэчонъёсын (нылъёс), 3Д постеръёсын, брелокъёсын (пиос) пусъемын:

Алнаш ёросысь Чем.-Куюк школаысь Карина Кочанова, Дима Казаков, Вылӥ Котныр гуртысь Аня Монашева; Завьял ёросысь Шор Постол школаысь Влад Кабанов, Маша Андреева, Кирилл Баталов; Пичи Пурга ёросысь Бобья-Уча школаысь Лариса Гаврилова, Марина Григорьева, Диана Павлова; Пичи Пурга ёросысь Максим Демьянов, Ульяна Тёмкина, Александра Иванова, Аня Чернова, Аня Арзамасова; Ижкарысь 17-тӥ школаысь Наташа Печерских.

Ваньдылы-ваньдылы, конкурсэ пыриськемды понна, Тол бабай бадӟым тау каре. Макем шумпотӥз со котькуддылэн удмурт нылпи газетэз дунъямдылы! Кӧня ке гожтэтъёсысь чуръёсты лыдӟе 4-тӥ бамысь. Нош кылемъёсызлэсь тунсыко ивортонъёссэс луэмезъя азьланяз уже кутомы. Тӥляд оскон пыӵатӥсь кылъёсты мукет пиналъёслэсь но сюлэмзэс мед вырӟытозы.   Таулэ пиналъёс, конкурсъёсы мыло-кыдо пыриськемды понна. Азьланяз но тазьы ик чырмыт ужалэ.

 * * *

«Кылзӥськись чиньыосыз» нош дышетскон ар бырытозь азьланьтоно кариськимы, «Почтальон тазьы малпа» конкурсмес – толшор пумозь. Нырысетӥяз конкурсэ пыриськыны ӧтиськом сӧсыр нылпиосты. Кыӵе ке муген соос асьсэос гожтыны уг быгато ке, мед гожтозы матысь адямиоссы.

           Кыкетӥез конкурс, почтальонъёс, тӥ понна. Газетэз вӧлмытонэн герӟаськем учыръёсты сярысь гожтэ. Эн вунэтэ, куинезлэн тужгес усто ужъёслэн авторъёссы 1000 манетэн пусъемын луозы. Нош кылем ар понна вормисьмылэн нимыз тодмо ни: со — Ольга Лесникова (Вавож ёрос, Брызгалово гурт). Коньдон тӥледыз редакциын возьма. 46-тӥ номерын потэм «Куинетӥез кытын?» ужез понна. Туж возьмаськом лыктэмдэс, пумиськеммы потэ.

Кылем арын ортчем конкурсъёсын ( ма, лотереяен шудонын но) вормисе потэм куд-ог лыдӟисьёсмы нош али ке но ӧз басьтэ на кузьымъёссэс. Соин ик туж куриськом: Ижкаре вуылыкуды, редакцие пыралэ, тодмоостэс кузьымдэс басьтыны косыкуды, кыӵе конкурсын вормисе потэмды сярысь соослы пыр-поч вералэ.

 bord

«Почтальон тазьы малпа»

Почтальон    Кинъёстэк улыны уг быгаты «Ӟечбур!» газет? Шонер, нырысь ик – лыдӟисьёстэк. Озьы ик улыны уг быгаты сое нуись-ваисьёстэк – почтальонъёстэк. Почтальонлэсь ужзэ быдэсъяло тросэз милям лыдӟисьёсмы но: редакция пыр гожтӥськемъёслы «Ӟечбур!»-ез нулло удмурт кылъя дышетӥсьёс но куд-ог анай-атайёс, гуртъёсысь Ижкаре ужаны ветлӥсьёс но студентъёс… Ма, ми асьмеос но почтальонлэсь ужзэ котькудмы ӧжытак ас выламы шӧмъямын ини. Озьы бере, таиз конкурсмы ваньмызлы соослы, кинъёс газетэз нылпиос доры вуттон сярысь сюлмасько (почтаын ужасьёслы но!). «Почтальон тазьы малпа» нимаськись конкурсэз нуо мон, газетлэн кылкутӥсь секретарез Надежда Шкляева. Конверт вылады озьы ик пусъе мыным шуыса, юанъёс сётъялэ 89508242402 яке 51-39-10 номеро телефонъёсъя.
    Гожъяны луоз таӵе темаосъя:
1. Газетэз нуон-ваёнэн герӟаськем учыр (тунсыко, оло нош шугъяськытӥсь).
2. Гуртысьтымы аспӧртэм почта ящик (оло, кин ке но кыӵе ке вуж арбериез, забор вискез... почта ящик чот возе) но солэн кузёез.
3. «Почтальон тазьы малпа» (гажано почтальонъёс, гуртады газет-журналъёслы гожтӥськонлэн мынэмез пумысен мылкыддэс усьтэмдэс витиськом таяз конкурсамы. Малпамдыя, малы тросэз мумы-бубыос асьсэлы газет яке журнал басьто ик, нош нылпиоссы сярысь вунэто? Кин отын янгыш? Оло, асьсэос пиналъёс лыдӟиськыны уггес ярато? Тӥляд пӧртэм ӟуч изданиосты учкылыны-лыдӟыны луонлыкты вань. Озьы бере, ӵошатон лэсьтэ но, чик кепыратэк, милесьтым тырмымтэосмес шараялэ. Кудды-огды, оло, ушъяса но гожтыны мылкыд кароды. Газетмес яратӥсьёс но вань ук, уноез пиналъёс сое гурысь поттэм пӧсь табанез кадь витё.
    Конкурсмы ар пумозь кыстӥськоз. Но одӥг куронмы вань: почтаяды газет-журналъёслы гожтӥськыны лыктэмъёслы «Ӟечбур!» сярысь веракуды пусъе: со удмурт нылпиос понна чаклам одӥгез кемалась потӥсь издание. Куд-ог мумы-бубыос уго милесьтым «Ӟечбур!» потэ на-а, мар-а?» шуыса но юалляло.
    Конкурсын вормисе потэм куинь почтальонъёсты пусъёмы быдэн 1000 манет коньдонэн, Данъян грамотаен. Одӥгез кулэез куронмы: кӧня муртэ газетмылы гожтӥськытыны быгатэмды сярысь но верано.

bord

«ӞЕЧБУР!» – библиотека пыр»

Айманова А.Ф.   Та конкурсэз нуо мон, Алевтина АЙМАНОВА, отделлэн редакторез. Юанъёсын но ӵектонъёсын вазиське редакциысь телефонъёсъя, электрон почтамы пыр, озьы ик жингыртыны быгатӥськоды мыным 8-950-839-21-16 номеръя.

    Библиотека – школалэн одӥгез тужгес шунытэз но пырем потоно кадь интыез. Солэсь ӧссэ одӥг пол усьтӥд ке, паймытӥсь книгаос доры пыдъёсыд асьсэос кыскозы. Со книгаослэн кузёзы но, библиотекарь, дораз лыктэм адямиез котьку капчи мылкыдын пумита угось. Кулэ дыръяз газет-журналъёсты но кудзэ бырйыны со ачиз ик валэктэ. Соин ик 2013-тӥ арлы газетлы гожтӥськонэз туэ библиотекарьёс пыр но радъяны, соосты удмурт кылъя но литературая дышетӥсьёслы матысь юрттӥсьёс карыны малпамы.
   Шаерысьтымы ваньзылы-ваньзылы – школа но гурт библиотекарьёслы – «Ӟечбур!»-лы гожтӥськонъя конкурс ялӥськом. Со «Ӟечбур!» – библиотека пыр» нимаськоз. Валамон ини, газет лыдӟись доры дыраз мед вуоз шуыса, гожтӥськонэз почта пыр ик радъяно.

54403 индексъя ӝыны арлы дуныз – 158 манет но 64 копейка,  

12729 индексъя быдэс арлы – 320 манет но 01 копейка.

    Ижкарлы матын улӥсьёс, нуись-вайись шедьтӥзы ке, редакция пыр но гожтӥськытыны быгатозы. Дуныз азьвыл кадь ик: ӝыны арлы – 125 манет, быдэс арлы – 250 манет.
   Пиналъёсын ӵош «Ӟечбур!»-лэн бамъёстӥз «поръян-а», викторина яке газетлэн азьвыл но туала юнкоръёсыныз пумиськон-а ортчоз – библиотекарь сое ас сяменыз радъялоз. Кӧнялы тросгес пиналъ-ёсты ас котыраз люкалоз, сомындалы ик тросгес луозы газетмылэн лыдӟисьёсыз. Озьы ик библиотекарь, дышетскисьёсты сяна, анай-атайёсты, песянай-песятайёсты но ужрадэ пыриськытыны быгатоз.
    Оскиськом, та мытэм ужмы умой мыноз шуыса. Асьмелы, библиотекарьёс, нимаз ужаны мугез ик ӧвӧл. Министерствомы но одӥг угось. Нош ми мар карыны быгатӥськомы тӥ понна?
   Нырысь ик, конкурсэ тужгес мыло-кыдо пыриськись библиотекалэсь, оло, пичияк книгазэ поттыны. Сыӵе вамышмы вань ини: лыдӟись кие вуттӥм Пичи Пурга ёросысь Гожня школаысь библиотекарьлэсь З.С. Елизаровалэсь «Сюлэм гурлан» бичетсэ.
    Валче ужанъямы, оло, кыкетӥ но, оло куинетӥез но пусъён амал сюроз ай. (Возьмалэ вуоно номеръёсмес). Пумиськомы та сэрегамы ик, «Ӟечбур!» – библиотека пыр» улсын.
    Конкурсмес ялон вакытэ ӵапак жингыртӥзы Пичи Пурга ёросысь Бобья-Уча школаысь гитаристъёс, библиотеказы элькунамы нырысетӥез – модельной — лыдъяське. Валамон, оло, соос бордысен ужаны кутскоз та конкурсмы. Вазиське тӥ но, эшъёс, дорады ӧтьыса.

* * *
Таиз конкурсмы азьланьтӥське

«Быдэс классэн гожтӥськод –
театре мынод!»

   Удмурт театрен ужан проектмы таяз дышетскон арын но ужа. Соин ик, пиналъёс, Удмурт йӧскалык театрын дун тырытэк спектакль учкон луонлыкез синйылтытэк эн кельтэ. Быдэс классэн гожтӥськиды ке, ивортэ милемлы, Ижкаре лыктон нуналдэс ӵош пусъём.

bord

«ЗАРНИ СӤЗЬЫЛ» вуттоз... БОДЬЯЛА

Зарни сӥзьыл

   «Ӟечбур!»-ен мон пичи дырысеным эшъяськисько.  Соин ик Ижкаре вуэме бере, дышетскон вискытӥ дыр шедьтыса, нырысь ик кожи яратоно газетэлэн редакцияз. Азьло юнкорзэс тодмаса, «ӟечбур!»-ёс монэ туж шуныт пумитазы, шумпотонъёссэс но куректонъёссэс веразы. Гожтӥськисьёслэн ичиёмемзы тужгес но сюлэмам йӧтӥз. Мынам тунсыкъяськеме потӥз гуртысьтым, Варклед-Бодьялась, югдурен. Анаелы жингыртыса тодӥ, туэ куать семья гинэ газетлы гожтӥськемын шуыса. Шонерзэ вераса, абдрай… Собыдӟа гуртын сомында мурт гинэ лыдӟе-а? Лыдпус ушъяськымон ӧвӧл. Ма кароно? Мон маин ке быгато-а юрттыны? Малпай: асьме котырысь удмурт гуртъёсын – Варклед-Бодьяын, Сарсак-Омгаын, Варзи-Пельгаын но Варзи-Ятчиын – улӥсьёс пӧлын ӵошатскон ялоно. «ӞЕЧБУР!»-ен – МАТЫСЬ ЭШЪЁС» нимай сое. Мукет гуртъёсысь но школаосысь мылкыд карисьёс шедизы ке, гажаса ӧтисько монэн ӵош ужаны.

   Конкурсэ пыриськыны быгато вань классъёсын – 1-тӥысен  11-тӥозь – дышетскисьёс, озьы ик – анай-атайёс, песянай-песятайёс. Огкылын вераса, пичиос но, мӧйыос но. Ужъёстэс ыстоно «Ӟечбур!»-лэн редакцияз, «Люба Михайловалы» пусйыса, яке Контактысь бамам. 

Таӵе темаосъя гожъямъёстэс возьмасько: 
«ЗАРНИ СӤЗЬЫЛ» (ӵап дырыз уго),  
«ТУННЭ НУНАЛЛЭН БАДӞЫМ СЮЛЭМШУГЪЯСЬКОНЪЁСЫЗ».  
    Ыстыны луэ пӧртэм амалъёсын гожтэм ужъёсты: веросъёс, кылбуръёс, серембуръёс (анекдот), улонысь учыръёс. Озьы ик – йыртӥянъёс, суредъёс, туспуктэмъёс.
   Конкурсэ мыло-кыдо пыриськисьёсты но вормисьёсты возьмало Данъян грамотаос но Бодьямылэн выль клубаз радъям «Ӟечбур!» газетын ужасьёсын пумиськон но тодмо удмурт кырӟасен ӵош позыръяськон (дискотека).
   Ужъёстэс возьмало 4-тӥ шуркынмонозь (ноябрёзь).
   Мыным  туж  тунсыко быгато-а меда гожтӥськисьёслэсь биртыксэс (лыдзэс) йылэтыны, кӧня муртлэсь «нумырзэ» вырӟыто?

 Люба МИХАЙЛОВА,
Герман Ходырев нимо премилэн лауреатэз.

bord

Мукет материалъёс...

  1. Конкурс! Конкурс! Конкурс!
IMG_1232
IMG_1232

Ми контактын