Get Adobe Flash player
АУ УР "Ӟечбур!"

Школа лагерьын шутэтскись пиналъёс но сое радъясьёс!

Тӥ понна ялӥськом
«Куноын – «Ӟечбур!» конкурс-шудон 

    Конкурсэ пыриськыны луоз таӵе номинациосъя:
   1. БОРДГАЗЕТ (лагерь улонлы сӥзем бордгазетлэсь одӥг номерзэ «Ӟечбур!»-ен герӟано. Поттоно сое удмурт кылын).
  2. «ӞЕЧБУР!» ГАЗЕТЛЫ РЕКЛАМ ЛИСТ. Быдӟалаез А3-лэсь пичи медаз луы. Пуштросэз – котыр гуртъёсысь мӧйыослы, пиналъёслы нылпи газетлы гожтӥськонлэн кулэлыкез сярысь веран (сое басьтӥсьёслэн мадемзы пыр). Одно ик пусъёно газетлэсь индексъёссэ: ӝыны арлы – 54403, быдэс арлы – 12729, ватсано: газетлэсь дунзэ, кӧня толэзьлы гожтӥськемдэс чакласа, вералозы почтаын. Листовкады гуртысьтыды клуб, магазин, школа азе ошыны ярамон луыны кулэ.
Кыкезъя ик номинациосъя лэсьтэм газетъёстэс (компьютерен ке – электрон почта пыр, киын ке – туспуктыса) ыстоно «Ӟечбур!»-лэн редакцияз, кин ке сьӧры но келяны луоз. Лагерь улон, гужем сярысь усто чуръёсты ӝегатскытэк «Ӟечбур!»-ын поттылыны мед быгатомы.
   3. СЦЕНКА-ШУДОН. Вожатойёсын ӵош газетлы гожтӥськонэз радъянлы сӥзем сценка малпано, собере сое анай-атайёс азьын возьматоно.
    Ӵектӥськом таӵегес амал.

Действие ортче школа азбарын.
Шудӥсьёс: валтӥсь редактор, кылкутӥсь секретарь, корреспондентъёс, дизайнер, художник, туспуктылӥсь, лыдӟисьёс – анай-атайёс, песянай-песятайёс… (рольёс вань пиналъёслы тырмыны кулэ).
   Ӵукна. «Анай-атайёс» «юртъер» котыразы бергало. (Куазь шулдыр ке, сценкаез школа азбарын но возьматыны луоз). «Юртъерзы», валамон ини, ас манерзыя пуктэмын. Отын писэй, пуны, нылпиос (шудонъёс, мунёос но) улыны быгато.
(Тужгес устозэ шудон коркаез воспитательёс нимысьтыз дунъяло, кузьымъёс сёто).
Со дыре ик «валтӥсь редактор» вань ужасьёссэ «кабинетаз» люка но веранзэ кутске:
   – Асьмелы газетлы гожтӥськонэн герӟаськем нимысьтыз номер поттоно. Урамын – гужем, анай-атайёслэн ужзы трос, почтае ветлыны дырзы ӧвӧл. Соин ик тиражлэсь лыдзэ будэтон пумысен нимысьтыз сюлмаськоно луоз. Туннэ гуртэтӥ ветлом. Тани тӥледлы квитанциос (киын лэсьтыны луоз). Куиньзэ «корреспондентъёсты» арлы быдэ «Ӟечбур!»-лы гожтӥськисез шедьтыны но солэсь интервью басьтыны курисько. (Удмурт кылъя но литературая дышетӥсьлэсь юалляськыны луоз, яке со ачиз кинэн ке вераськыны мед ӵектоз).
   – Мынам дэмланэ вань: библиотекаысьтымы тужгес вашкалазэ газетэз шедьтоно,– ӵектэ «кылкутӥсь секретарь». – «Дизайнерен» ми отчы ветлом. Вуж газетъёслэсь макетсэс (материалъёслэсь кызьы интыяськемзэс) но ӵош учкылом.
  – Ми нош школа азбарысьтымы сяськаосты, писпуосты суредалом – «Ӟечбур!»-лы сӥзем газетмы чебер мед пӧрмоз, – шуо «суредасьёс».
– Ми «корреспондентъёсын» ӵош ветлом но туспуктэмъёс лэсьтылом, – фотоаппаратсэс (видеокамераен телефонъёссэс) дасяло «туспуктылӥсьёс».
   Ваньмызлы уж люкылэмез бере, «валтӥсь редактор» ачиз но «сюрес» вылэ потэ. «Анай-атайёс, «песянай-песятайёс» «газетын ужасьёсты» кин кызьы, котькудзы ас сяменызы, пумитало, газетлы гожтӥськемзылэсь яке гожтӥськымтэзылэсь мугзэ верало.       Ваньмыз тунсыко, улонын кадь ортчыны кулэ. Со учыръёсты сценкаын шудӥсьёс асьсэос малпало, кин кызьы син азяз пуктэ. Соин ик шудонэз кызьы ортчытон сярысь азьвылгес малпаськоно, дӥсь, шудон тӥрлык, фотоаппарат, плеер (кагазлэсь но пӧрмытыны луоз) но дасяно.
   «Редакцие» вуыса, «корреспондентъёс» калыкен пумиськылэмзы сярысь кенешыны «валтӥсь редакторлэн» «кабинетаз» люкаськыло на.
   Та сценкаез бӧрысь газетэ келяно, отын тужгес усто шудэм артистъёс сярысь заметка гожтоно. Туспуктэмъёс но луизы ке – эшшо умой.
   Я, кудӥз лагерь «Ӟечбур!»-лы сӥзем нуналэз тужгес тунсыко ортчытоз?
   Конкурс кыстӥськоз 15-тӥ гудырикошконозь. Вормисьёс Данъян грамотаосын, синпель кузьымъёсын пусъемын луозы.
   Юанъёсты кылдӥзы ке, вазиське редакцие 51-37-20, 8-950-839-21-16 (Алевтина Айманова) телефон номеръёсъя. bord

IMG_1136
IMG_1136

Ми контактын