Синмын — адӟыны, киын — кутылыны

Ёросмылэн но шаермылэн историенызы мон 5-тӥ классысен тунсыкъяськисько. Тодонлык шыкысам пӧртэм ужъёс-эскеронъёс вань ни. Пӧлысьтызы котькудӥз тунсыко потэ. Ёрос но элькун ужрадъёсын соосты пӧртэм грамотаосын но дипломъёсын пусйылӥзы. Классысьтым эшъёсме но ужъёсыным тодматӥ.
«Домашний музей» ужме мон Римма Александровна Владимировалы сӥзи. Монэ со 5-тӥ классысен историен дышетэ, со ик ёросмылэн но шаермылэн историеныз тунсыкъяськыны бурдъяз. Дышетӥсь сяна, со мынам пересь анае (бабушкае) луэ. Ас дораз солэн быдэс музей кылдытэмын. Ӵемысь со доры пӧртэм интыосысь куноос вуыло. Пиналъёс отын пӧртэм мастер-классъёсы пыриськыны быгато: вӧй шукко, пушнерез араса корало, кеньыр но пызь изо, ухватэн чугунъёсты ӝуткало, карнанэн ву нулло… Та ужмы бере Римма Александровна монэ доразы музей кылдытэм ёросчиосмес утчаны-шедьтыны бурдъяз. Озьы ми Баграш-Биграысь Николай Павлович Соколовлэн киужъёсыныз но люкам вашкала арбериосыныз тодматским.
Гожнялась Зоя Петровна Вахрушева азбарысьтыз пичи коркаяз атаезлы-фронтовиклы но кибашлы анаезлы сӥзем музей усьтэм. Нош та гуртысь ик Юлия Владимировна Федюниналэн быдэс азбарез музейлы укша: вашкала кеносэз, колодчаез (колодец), муш умортоосты но мукет вашкала тӥрлыкъёсты адӟод отысь.
Эшшо но золгес паймимы, куке Пичи Пурга черкогуртысь Валентин Яковлевич Дедовлэн улон юртаз вуимы. Зэмос музейысь но, оло, сыӵезэ уд шедьты, 1945-тӥ арын вордскем воргорон семьяезлэсь но СССР вакытысь пӧртэм арбериосты бичаны быгатэм. Вымпелъёс, бюстъёс, книжкаос, телефонъёс, магнитолаос – ваньзэ вераса но уд быдты. Римма Александровна шуэ: 20-тӥ даурлэн синмын адӟыны, киын кутылыны луись историез. Огнам мынысал ке, ваньзэ, оло, валаса но ӧй вуттысал. Быдэс семьямы шумпотыса учкиз со арбериосты.
Курег гуртысь Татьяна Михайловна Черновалэн быдэс коркаез мунёосын тырмытэмын. Соос ваньзы пӧртэм калыкъёслэн дӥсьёсынызы пӧръямын. Пыдкутчанъёссы но вань. Яркытэсь буёлъёс, пӧртэм амалъёсын чеберъям но вурем дӥськутъёс синэз мальдыто, пиналъёсты гинэ уг, бадӟымъёсты но куное ӧтё. Татьяна Михайловна мунёослы дӥсь вуре ке, мукетыз Татьяна, Никитична, кудӥз Москвина, – бадӟымъёсты чебер дэремъёсын шумпоттэ. Солэн пичигес сэрегысьтыз пӧртэм пумо удмурт дэремъёсты адӟыны, дӥсяны но басьтыны луэ.
Вашкалазэ утисьёс, сое мукетъёсызлы возьматыны сюлмаськисьёс, шаермес яратыны дышетӥсь соин данъяськон мылкыд пыӵатӥсь – тани таӵе тунсыко адямиос уло мынам ёросам.
Тӥледыз но ӧтисько та музейёсы вуылыны. Кызьы шуо, сю пол кылытозь, одӥг пол адӟод.

Мария ПОКОЕВА.
Гожтэмын 9-тӥ классын дышетскыкуз.
Пичи Пурга гимназия.

Добавить комментарий

Ваш e-mail не будет опубликован. Обязательные поля помечены *