Люкиськон синвуэн пыӵам гурезь бам

  1. Ми – шуд пуйыос

…Сылӥсько Дэбес ёросысь Улӥ Шудӟалуд гурт сьӧрысь гурезь йылын. Инмын пиштӥсь шунды мугорме шунтэ, няськыт, ыркыт тӧл тыбырме веша, чылкыт омыр капчи шокатэ, синъёсы инкуазьлэн чеберез шоры синмаськыса учко, палэнысен адӟиськись вордӥськем гуртме синйылто но шумпотонэн пачылмем мылкыдме синкылиос пыр потто. Пыдъёсы турынэн шобырскем музъем вылэ небытак лёгисько, сюлэмы йыг-йыгаське. «Мон улӥсько – мон шудо!» – гадь тыр кеськеме потэ. Но керпотонэ уг лэзьы, мон татын огнам ӧвӧл, мон кадь шудпуйыос котырам трос. Нош 75 ар талэсь азьло та интыын ик милям гуртысьтымы 99 воргоронъёс но 3 кышномурт чутрак мукет мылкыдъёсын сылӥзы. Тросэз вордскем гуртсы шоры берпуметӥзэ мӧзмыт учкизы, сюлэмзы вӧсь луиз, мугорзы куалекъяз, бӧрдонзы курыт синвуосын пӧсьтӥз… Озьы улосчиосмы туннэ шудо-буро улонмы понна фашистэн нюръяськыны кошкылӥзы. Пӧлысьтызы витьтон одӥгез, вирзэс кисьтыса, пыраклы ож лудэ кылизы. Кызьы-о бен соосты вунэтод? Уг, нокызьы уг яра вунэтыны! Буре вайылоно, тодамы возёно, данъяськоно, тау карыса йыбыртъяно.

  1. Уж пӧрмиз — синпелет кылдӥз

Тазьы малпаса ик, гурт калыклэн сюлмаськеменыз, 3-тӥ куарусёнэ та гурезь йылын сӥё-дано усьтэмын вал синпелет из. Таӵе ужез быдэстон сярысь мылкыдзэ нырысь ик шараяз татын вордскем но будэм Р.Г. Первушина. Данёгурт муниципал кылдытэтлэн кивалтӥсез Нэля Леонидовна Коробова войнаез ортчем нылкышнолэсь малпанъёссэ туж ӟечен лыдъяз но, гуртысь калыкен кенешыса-ужаса, сое быдэстыны пӧрмытӥз. Синпелетэз усьтыны дан сётӥзы 89 аресъем Роза Григорьевналы ик. Вой-на кутскыку солы дас арес сяна вылымтэ. Ож аръёсы арлыд шоры ӧз учкылэ, соин ик нокинлы но капчи ӧй вал. Секыт улонэз адӟем нылкышно ужрадын со аръёсты тодаз вайыса синвуаськиз.

  1. «Урод дышетскись – фашистлы юрттӥсь»

– Та гурезь йылын кӧня синву кисьтэмын! 14 гуртъёсысь воргоронъёс та сюрес кузя Тыловайысь военкоматэ кошкылӥзы. Гуртсы пала берытскыса, шудӟалудъёс та гурезь йылын изьыосынызы шонаса сылылӥзы. Егит атайёс пичи нылпиоссэс, егит кышнооссэс юн-юн чупаса, ӟыгыръяса люкиськылӥзы. Гуртэ кылем кышномуртъёс, пересьёс ӵукнаысен ӝытозь ужаллязы, одӥг семья кадь тупаса, ог-огзылы юрттыса улӥзы. Ми, нылпиос, школаын гижысь-пиньысь, туж ӟеч дышетскыны тыршимы. Кин урод дышетске, со фашистъёслы юрттэ, шуылӥзы уго дышетӥсьёсмы. Будӥмы турын-куар сиыса. Вань нянез кыткем валъёсын, уробоосын та гурезь вылтӥ ик фронтэ келяллязы.
7-тӥ классэз йылпумъяме бере, мон леспромхозэ сик кораны мынӥ. Отын ужаме понна 500 грамм нянь сётъяллязы. Сое доре вайисько но ӝӧк вылэ понӥсько вал. Анай сое векчи-векчи шормалоз но турын-куарлэсь пыжем кӧмечъёс вылэ тырыса милемыз сюдоз вал. Ми понна со ческыт сиён интыын вал. Нош школаын Выль арлы дышетӥсьёсмы котькудзы быдэн одӥг стаканэн пызь вайылӥзы но печенья пыжылӥзы. Ма быдӟа шумпотон луылӥз со ми понна!
Фронтысь вуэм гожтэтъёсты нош огинэ люкаськыса, шара лыдӟылӥзы. Оже кошкем врачлэн Ангелина Васильевна Кельдибековалэн гожтэтысьтыз чуръёс мынам али но пель сьӧрам чузъясько: «Мама, мон кык вамышын кулонлэсь…» Нош кыӵе секыт вал, куке вить нылпиё семьяе похоронка вуиз…

  1. Вунонтэм ивор — Вормон Нунал!

Вунонтэм кылиз Вормон Нунал сярысь ивор. Милемыз, пиналъёсты, школаын линейкае люказы но война бырем шуыса веразы. Киямы горд флагъёс сётӥзы но, коркась корка ветлыса, ӟеч иворез шараяны косӥзы. Мон нырысь ик дорам бызи. Корка пыри но, анае сузэреным бӧрдыса пуко. Война быриз ке но, соослэн картъёссы ӧз берытске ини уго. Тӥни озьы Вормон Нуналэз синвуосын пумитамы.

  1. Калык вырӟоз — стелла усьтӥськоз!

Нэля Леонидовналэн верамезъя, гуртысьтымы тросэз калык, со аръёсы сямен ик, огинэ кариськыса улыны быгатэ на. Соин ик синпелет изэз но ӵош кариськыса, одӥг кылэ вуыса, уксё люкаса пуктыны пӧрмытӥзы. Озьы ик кӧня ке коньдон висъямын вал Данёгурт муниципал кылдытэтысь. Улӥ Шудӟалудын вордскем но будэм, нош али мукет интыосын улӥсь адямиослэн но юрттӥськыны мылкыдзы бадӟым вал, но уксё гуртын али улӥсьёсын люкамез но тырмиз. Изэз усьтон нуналэ гуртоос вӧзаз стелла пуктон сярысь но вераськизы. Оскиськом, вуоно арын таиз но малпан улонэ пыӵалоз.
Гуртамы ик вордскем но будэм Антонида Алексеевна Хохрякова туж тупась кылбурзэ вераз ужрадын.

Добавить комментарий

Ваш e-mail не будет опубликован. Обязательные поля помечены *