Ваньмес огазея УДМУРТ КЫЛ

Асьсэлэсь анай кылзэс тросэз нылпиос али уг тодо. Тодэмзы но уг поты кадь. Туала улон – со ӵукнаысен ӝытозь интернетын пукон, социальной сетьёс пыр вераськон, эшъяськон… Зэмос улонлы шумпотыны дыр но уг кыльы ни. Азьлогес мынам аслам но улонэ озьыгес радъяське вал. Но одӥг пол мон «Шундыкар» лагере шеди – яратоно «Ӟечбур!» газетэ мыным отчы путёвка кузьмаз. Нырысь, конечно, туж шумпотӥ. Собере кышкай, ваньмыз удмурт кылын луоз шуыса, нош мон, малпалляй, туж алама вераськисько удмурт кылын. Озьы асме кӧня ке ултӥяса вози. Нош лагере вуыса, сыӵе малпанъёсы тӧлӟизы, монэн артэ угось пӧртэм нылпиос вал: городъёсысь но гуртъёсысь, туж шаплы вераськисьёс но мон кадь лябъёсызгес… Нош ваньмес огазеяз удмурт кыл.
Вуонояз гужем мон ачим конкурсэ пыриськыны мылкыд кари но нош ик «Шундыкаре» шеди. Кӧня выль эшъёс шедьтӥ, марлы но ӧй дышетскы соку!
«Ӟечбур!»-лэсь 31-тӥ номерзэ лыдӟыса, тодмо нимъёсты адӟи: Кирилл Кириллов, Елизавета Корнева, Алёна Мохова… Ваньмыныз та адямиосын мон удмурт кылэз, лулчеберетэз мургес дышетыны мылкыд сётэм лагерьысен тодматски. Удмурт егитъёслы сӥзем номерысь мон озьы ик тодӥ выль нимъёсты. Котькудзылэн соослэн асьсэлэн улонзы, но ваньзы ик трос дырзэс висъяло удмурт кыллы. Шумпотӥсько, малы ке шуоно сыӵе адямиос луизы ке, удмурт кылмы но азинскоз.
Озьыен, «Ӟеч-бурлэсь!» та номерзэ лыдӟыса, мылкыд бурдъяське, угось валаськод: ас кылзэс яратӥсь но гажась адямиос вань! Малпамея, соос трос, но куд-огъёсыз ас сярысьтызы калыклы вераны кепырало. Соин ик ёросысьтымы куд-огъёсыныз мон тӥледыз тодмато.
Света Зянкулова. Улэ Пичи Пурга черкогуртын, туэ 9-тӥ классэ вамыштӥз. «Шундыкарысен» тодӥ: та кырӟась нылаш удмурт кырӟанъёсты но быдэсъя вылэм. Озьы ик фортепьяноен шудэ, школаын но ёросын ортчылӥсь ужрадъёсты чебер куараеныз шулдыртылэ. Пӧртэм конкурсъёсын, фестивальёсын вормисьёс радэ сюрылэ. Малпасько, крезьгурез со азьланяз но уз палэнты, выль но выль ужъёсыныз шумпоттылоз. Солэн апаез но, Алёна Рудина (Зянкулова), – кырӟась. Солэсь кырӟанъёссэ «Мынам Удмуртие» радио пыр ӵем кылыны луэ. Мон соослы тунсыко выль малпанъёс но удмурт кылын кырӟаны бурдъясь эшъёс сӥзисько.
Озьы ик милям черкогуртамы искусствоосъя дышетскон юрт вань. Туж трос нылпиос отчы ветло. Кин кырӟа, кин эктэ, кин суредаське. Крезьчиослэн ансамбльзы но вань, «Крезьгур» нимаське, кивалтӥсьёсыз – Н.Ю. Кузьмина но М.П. Тубылова. Кӧня ке аръёс талэсь азьло со кылдӥз. Будыса, школаез йылпумъяса одӥгъёсыз нылашъёс отысь кошко, нош мукетъёсыз, пичиос, лыкто. Удмуртиын крезен шудӥсьёс трос ӧвӧл, соин ик ёросамы куное вуэмъёсты соос паймытыны но шумпоттыны быгато. Нокыӵе ёрос ужрад но соостэк уг ортчы.
Ансамбль туэ йӧскалык культураослы сӥзем «Мой дом – Москва» нылпи фестивале ветлӥз.
Крезьлэн аслаз но куараез чебер, нош куке соин шудо чебер удмурт нылашъёс, мылкыд эшшо но ӝутӥське.
Озьыен, котькуд нуналмы вордскем кылынымы вераськыса, соин герӟаськыса мед ортчоз!

Лида НЕКРАСОВА,
Пичи Пурга черкогурт.

Добавить комментарий

Ваш e-mail не будет опубликован. Обязательные поля помечены *