ОШМЕС КАДЬ ЖИЛЬЫРТЭ удмурт кылмы

5-тӥ южтолэзь… 5 час ӵукна гинэ ай, нош ми, «Ӟечбур!» газетлэн редакцияз ужасьёс, каллен сайкась Ижкаретӥ Эшъяськон юрт доры машинаен ширтӥськом ини. Отын возьмась автобус милемыз Татарстанысь Кукмор ёросысь Ошторма-Юмья школае вуттыны кулэ.
Шуныт микроавтобусэ интыяським но, со вырӟиз. Куазь тём пеймыт луэмен но вазь султэменымы, лэся, малпанъёсамы ай небыт валес но ческыт ум гинэ. Кема ик ӧм мынэ, жур! гинэ бергась поглянъёс веттаса сямен умме уськытӥзы. Киров улосвылэ вуыкумы гинэ укно пыр кырмышъясь ӵук шундыез шӧдыса сайкамы. «Нуналды ӟеч ортчоз!» – шуыны турттыса кадь, со укноямы пальыштӥз. Водительмы автобуссэ чупырес нуллэ вылэм, зуркатыса но тэтчатыса ӝог гинэ вуттӥз Татарстанэ. Удмурт шаермес гурезё-бамало шуиськом ке но, та палась гурезьёсты адӟыса эшшо но синмаським. «Здесь гора, там гора, посередине Кукмора!», «Кукмор гурезьёс вискы пачкамын», – серекъяса вералля, пе, татысь калык.
Школа доры вуим гинэ но, школалэн директорез В.Г. Семёнов ураме потыса ик милемыз пумитаз. Ма, кузь сюрес вылтӥ лыктыкумы но Виталий Геннадьевич сюлмаськыса жингыръяз, ӟеч-а сюресмы шуыса юалляськиз.
Мынясь нылпиосын но ды-шетӥсьёсын, укно дуръёсаз ворекъясь сяськаосын тырмем вӧл-вӧл, югыт, шуныт школае пырыса, кузь сюрес вылын пыӵам жадён но кытчы ке чиптэм-чаптэм ышиз. Ческыт ӝукен, табанен но узы варенняен кунояськеммы, историен дышетӥсен В.Н. Рамазановен радъям экскурсия дыръя школаен тодматскеммы бере асьмеды воксё ас дорамы кадь шӧдыны кутскимы. Та школаын дышетскись нылпиослэн пӧртэм кружокъёсы ветлыны луонлыкъёссы городысь нылпиослэнлэсь пӧртэм ӧвӧл, шуыны луоз. Куасэн бызьылонъя, эктонъя, куиськонъя, суреданъя, куролэсь киужъёс лэсьтонъя… Кыӵеез но ӧвӧл!

«Культура речи, родной язык XXI века» нимо ужрадэ Балтаси но Кукмор ёросъёсысь нылпиос но дышетӥсьёс лыктӥллям. Удмурт кылэз дышетӥсь школаосын таӵе пумиськонъёс арлы быдэ Татариын радъяськыло. Сое ортчытон туэ Ошторма-Юмья школа вылэ усем. «Тазьы люкаськылыса, пиналъёс анай кылзылэсь дунзэ валаны кутско, – вераз Виталий Геннадьевич. – Мукет школаосысь ёзъёсынызы пумиськыса, куспазы верасько, удмурт кырӟан-эктонъёс, сценкаос пыр ог- огзылэсь быгатонлыкъёссэс учко, мастер-классъёсы пыриськыса, выль тодон-валан басьто». Зэм но, ми но тани куное гинэ шуыса доразы ӧм лыктэ ук, журналистикая мастер-класс радъямы. Мукетъёсаз нылпиос куыны дышетскизы, кинематографлэн но мультипликаторлэн Денис Корниловлэн уженыз тодматскизы, Ошторма-Юмья школаысь дышетӥсен Л.В. Галимьяноваен эктыны но дышетскизы. Удмурт кылъя дышетӥсьёс, директоръёс, кивалтӥсьёс, котырес ӝӧк сьӧры люкаськыса, кылдэм юанъёсты, ужпумъёсты сэрттыны-пертчыны быгатӥзы. Нош нылпиос нуналзэс дискотекаен йылпумъязы.
Лулпушез бугыртӥз, сюлэмез небӟытӥз, удмурт, бигер но ӟуч кылъёс та палъёсын ваньзы асьсэды кузёен шӧдыны быгато шуыса. Та палась удмуртъёс соосты одӥг кадь дунъяло но данъяло. Удмурт шаерамы анай кылмес ӟуч кыл пумен лёгыны турттэ кадь, нош та палъёсын сыӵе югдур уг шӧдӥськы ай. 1-тӥ классысен кутскыса 11-тӥозь нылпиос удмурт, ӟуч, бигер яке немец но англи кылъёсты дышето. «Вань кылъёсты туж тыршыса дышетӥськом, нош удмуртсэ, сюлэммылы матысьсэ, тужгес яратӥськом но дуно кариськом. Удмурт шаере шумпотыса мынӥськом, отын уго удмурт концертъёс, спектакльёс адӟыны быгатӥськом», – веразы та школаысь Аделинаен Алина Спиридоноваос но Диана Ганеева.
Бускель шаерысь эшъёсынымы пумиськон удалтӥз, вунонтэм кылиз. Кырмышъясь ӵук шундылэн ӟеч нунал сӥзьыса сипыртэмез быдэсмиз. Та ужрадэ вуылыны юрттэмзы понна, бадӟым тау кариськом Удмурт Элькунысь йӧскалык политикая министерстволы но солэн кивалтӥсезлы Л.Н. Бурановалы, Камсьӧр удмуртъёслэн кивалтӥсьсылы Ф.А. Чибышевалы но Ошторма-Юмья школалэн директорезлы В.Г. Семёновлы. Та пумиськонысь кошкыкумы ӟеч луэ! ӧм шуэ – вуоно пумиськытозь! Одно ик озьы луоз, малпаськомы.

 

Добавить комментарий

Ваш e-mail не будет опубликован. Обязательные поля помечены *