…Кылзэ тодӥсьтэм адями кузь сюрес вылэ дасяськись тылобурдо кадь

Лельвижмы милям бадӟым, шулдыр. Бускель гуртъёсын бигеръёс уло ке но, гурт калыкмы кылзэ, сям-йылолъёссэ уг вунэты. Сое ваньзэ утьыны юрттэ школамы.
Школаямы 53 пинал тодон-валан люка. 2-тӥ классысен кутскыса, англи, удмурт, бигер, ӟуч кылъёсты дышетӥськом. Ваньмызлэн ик соослэн кулэлыксы бадӟым. Туала адями быдэс дуннелэсь историзэ но лулчеберетсэ тодыны кулэ, но нырысь ик – ас калыкезлэсь. Чеберлыкез адӟон, сое валаны, дунъяны быгатон – адямилэн вераны луонтэм бадӟым узырлыкез. Соин ик национально-эстетической тодон-валан сётонлы школаын бадӟым саклык висъяське.
Школаямы пиналъёсты кибашлы, ӟеч сямо, котьмае тодыны тыршись будэтон понна, вань луонлыкъёс кылдытэмын. Нылпиос – улонлэн сяськаосыз шуиськомы ке, соослы пушйыны, усьтӥськыны юртто школаысь дышетӥсьёс но анай-атайёс. Удмурт кылъя урокъёсамы удмурт газет-журналъёсты уже кутӥськом. Удмурт кылъя но литературая олимпиадаын вормисьёсынымы Ангелина Капитоноваен но Ксения Усмановаен данъяськиськом. Туэ но соос Казаньын ортчем олимпиадаын вормыса, Ижкарын ортчем олимпиадае пыриськизы.
Адями чебер вераське ке, солэн культураез азинске. Ас калыкедлэсь кылзэ тодытэк, кыӵе адями луод, кинлы но малы кулэ луод?
Анай кылэз яратон мылкыд пиналъёслы пӧртэм ужрадъёс, кружокъёс пыр но пыӵатӥське. Трос кырӟанъёсты, эктонъёсты, шудонъёсты нылпиос тодо. Озьы ик яратыса кырӟало бигер кырӟанъёсты, экто пор эктонъёсты, кылбурало англи кылын. Ваньмыз со пӧртэм ужрадъёс дыръя яркыт адӟиське. Нылпиослэсь быгатонлыкъёссэс чакласа ик, школаямы «Пинал мылкыд» ансамбль кылдытэмын. Солэн программаяз удмурт калык кырӟанъёс, эктонъёс, шудонъёс. Ваньзэ соосты люкаськомы гуртысьтымы пересьёслэсь. Сцена вылэ потан дӥськутсы но пересьёслэн сандыкъёсысьтызы поттамын. Вашкала сям-йылолъёсын, эктон-кырӟанъёсын, дӥськутъёсын, пӧртэм вашкала арбериосын нылпиос туж тунсыкъясько. Соосты ваньзэ шедьтыны луэ шаертодонъя музейысьтымы. Отын экскурсиос радъяськыло, урокъёс но ортчыло.
Удмурт школаосысь бадӟым классъёсын дышетскисьёс арлы быдэ пумиськонъёс радъялляло. Бускель ёросъёсысь но бадӟым классъёсын дышетскисьёс отчы пырисько.
Анай кыллэн калыккуспо нуналаз школаямы кенешонъёс, квестъёс, презентациос, удмурт дискотекаос ортчыло.
Пересьёс тазьы верало вылэм: «Аслэсьтыз кылзэ тодӥсьтэм-валасьтэм адями кузь сюрес вылэ дасяськись тылобурдо кадь». Жаляса верано луэ, тросэз егитъёс «шунды пуксён паллэн лулчеберетэз» доры кыстӥсько, со нош калык выжыослэсь люкиськонозь вуттэ, адямилэсь лулпуш узырлыксэ воштэ. Асьмелэн дугдылытэк вошъяськись дуннеямы тросэз калыклэн улонысьтыз, солэн йырсазьысьтыз кошке, ыше.

Жанна ФЁДОРОВА,
10-тӥ класс.
Лельвиж школа.
Кукмор ёрос, Татарстан.

Добавить комментарий

Ваш e-mail не будет опубликован. Обязательные поля помечены *