Анай кыл – улонэ сюрес усьтӥсь

Котькуд калыклэн азьпал улонэз – егитъёс. Кызьы соосты туннэ будэтом, кыӵе сямъёс пыӵатом, отысь ик потоз кылмылэн, культурамылэн ӵуказе кыӵе луонэз. Соин ик нылпиосын али, будыкузы, бадӟым уж нуыны кулэ.
Сое чакласа ик Ижкарысь Калыкъёслэн эшъяськон юртазы «Этноментальность удмуртской молодёжи в меняющемся мире» улосвылкуспо научно-практической конференция радъямын вал. Отчы пыриськизы Башкириысь, Татарстанысь, Пермь но Удмурт шаеръёсысь удмурт пиналъёс но дышетӥсьёс. Нырысетӥ люкетаз трос вераськизы анай кылэз гажан, тодон, дышетон пумысен. Лэчыт кылъёс вераз нылпиослы Камсьӧр удмуртъёслэн кивалтӥсьсы Ф.А. Чибышева: «Ӧд ке тодэ анай кылдэс, кин луоды соку тӥ? Нокин. Со тӥлед улонады паськыт сюрес усьтыны юрттоз». Нош филология наукаосъя доктор Р.Ш. Насибуллин пусйиз: «Удмурт кылмы Европаын тужгес но тунсыкоез кыл луэ». Конференциын нылпиослэн анай кылынызы доклад лыдӟемъёссы туж шумпоттӥзы. Быръем темаоссы но ас калыкенызы, гуртэнызы, культураенызы герӟаськемын вал (Одӥгеныз, Жанна Фёдоровалэн уженыз, тодматскыны быгатӥськоды 3-тӥ бамын). Нош Пермь шаерысь Куеда ёросысь Вуж Шагирт школаысь Есения Ракимова, Яна Михайлова но Ксения Куснимарданова анай кылзэс вунэтыны кутскемзы пумысь туж сюлмасько. Валан валало, нош вераськыны шугъясько ини. «Удмурт кылмес школаямы но ум дышетӥське, – шуо нылъёс. Туннэ сак кылзӥськиськом вераськыны быгатӥсь нылпиосты. Милям школамылэн директорез Алина Матнуровна Надырова анай кылыныз туж чебер вераське, милемыз удмурт кырӟанъёсты быдэстыны дышетылэ. Озьы ик милемын ӵош ужрадэ лыктэм дышетӥсьмы Венера Галимовна Тимурова но удмурт кылэз мед тодомы шуыса сюлмаське».
Кыкетӥ люкетэз конференцилэн практической луиз. Ужъёс «Журналистика», «Проектирование» но «Культура» секциосын радъяськизы. Нырысетӥ секциен кивалтӥмы ми, «Ӟечбур!» редакциын ужасьёс но «Кизили» журналын ужась, писатель У.Ш. Бадретдинов. Вакчи дыр куспын тыршимы валэктыны нылпиослы, кызьы пӧрме газет но кызьы ужало корреспондентъёс. Быдэстэм «Ӟечбур!» газетмы пиналъёслэн ужаменызы туж яркыт, тунсыко, пуштросо пӧрмиз.
Конференция одӥг нуналэн ӧз йылпумъяськы. Ӵуказеяз зоопарке ветлӥзы. Конференцие вуылэм нылпиослы сюлэмазы но йырвизьмазы одно ик ӟеч пытьы кельтӥз та ужрад.

Добавить комментарий

Ваш e-mail не будет опубликован. Обязательные поля помечены *