Фамилие ӵемгес юрттылӥз… «быжъёс» люканы

«ЙЫГ! йыгаським» рубрикамы ужзэ азьланьтэ. Таяз радэ со туж ӟеч, егит, чебер, шаплы ПЁТР ПУШКИН доры йыгаськылӥз. Нош юанъёс пӧртэмесь, кылсярысь: кызьы со бескозыркаен сцена вылэ потам? Юрттылэм-а солы дано фамилиез? Кызьы ним бырйиллям пизылы… Пётр соослы ваньмызлы рос-прос валэктонъёс сётыны тыршиз. Я, дасесь-а милемын ӵош со доры «вуылыны»? 3… 2… 1… Вырӟим!

Ижкарысь Юлия Главатских:
– Пичи дыръяд но таӵе ик чупырес, етӥз но вераськыны яратӥсь вал-а?

– 3-тӥ классысен мон сцена вылэ потӥ, ваньмыз огшоры кылбуръёс бордысен кутскиз. Собере сюрес усьтӥськиз кырӟанъёслы. Тодам вайисько на: атаелэсь бадӟым бескозырказэ, стрелочкаен штанизэ, тельняшказэ дӥсяса, мон сцена вылын кырӟай: «Бескозырка белая, в полоску воротник, э-э-х, пионеры смелые спросили напрямик: с какого парохода, с какого парень года и на каких морях ты побывал, моряк…» Та кырӟанэн ик Вотка карын ортчем «Утренняя звезда» вожвылъяськонэ вуылӥ. Сцена вылын мон задор мылкыдо, чупырес, нош эшъёсы пӧлын чылкак мукет – шыпытгес, ганякгес. Аръёс ортчемъя, со эшшо но золгес шӧдӥськыны кутскиз, малы ке шуоно сцена вылын ужаса жадиськод но, эшъёсын яке семьяен гинэ, шыпытак пукыса шутэтскем потэ ни.
Алнаш ёросысь Писэйгуртысь Полина Осипова:
– Пушкин фамилиед адямиослы тунсыко потэ-а?

– Фамилиелэсь тунсыко луэмзэ гуртысь кошкеме бере гинэ, УдГУ-э дышетскыны пырыса, валаны кутски: тросэз А.С. Пушкинэн ӵошатылӥзы. Нош мынам йыры кур луылӥз, быдӟым ӟуч писателен уго асме нокызьы но уг герӟаськы, мон чылкак мукет. Дышетӥсьёс но фамилие борды «кырмиськылӥзы», соин ик кыӵе ке контрольной уж луыку яке коллоквиум дыръя, медаз гинэ юалэ шуыса, кытчы ке парта улэ ватскыны турттылӥ. Нош дышетӥсь журналэз усьтоз но, шуом, Васильевез но, Агорельцевез но уз юа, шуоз: «О, Пушкин, кыӵе умой! Ойдо, пот, пыр-почгес валэкты милемлы…» 2-тӥ курсысен мон «Мынам Удмуртие» ТРК-ын ужаны кутски, дышетсконме кӧня ке палэнтӥ. Соин ик сыӵе вакытъёсы мыным тужгес но секыт вал, малы ке шуоно фамилие университетын «быжъёс» люканы ӵемгес юрттылӥз.
Можга ёросысь Кватчи гуртысь Ангелина Владимирова:
– Семьяед кызьы учке ужед шоры, ӵемысь ӝытъёсы но уйёсы ужаськод ук?

– Мынам улонам вань сыӵе – «нормальной адями», мон асме «не нормальной адями» шуисько, малы ке шуоно нормальной адямиос клубъёсы шутэтскыны ветло – мон нош отчы ужаны ветлӥсько, нормальной адямиос праздникъёсы семьяенызы ӵош кытчы ке шутэтскыны мыно – мон нош ик кытчы ке ужаны дыртӥсько. Соин ик, дыр, нырысь-валысь ог-огмес валантэм учыръёс но луыло вал. Нош мукет ласянь ке – со сыӵе ик уж, кытын тон уждун басьтӥськод. Соин ик, аръёс ортчемъя, кузпалэ таӵе уже шоры валаса учкыны кутскиз.
Нош Миронлэн али тужгес но секыт вакытэз. Со тодэ ни: атаез дӥсяське ке, озьыен, кытчы ке но кошкоз. Нырысь бӧрдэ вал. Дыр ортчемъя, мукет сямен учке ини. Дӥсяськемме адӟыса лыктэ но шуэ: «Папа, дени? Пока» – Папа, пошёл зарабатывать деньги… Маке-маке курыны но быгатэ ини: «Папа, дени? Купи моженку». Дорам пырисько ке, вамышъёссэ соку ик кылӥсько ини. Нырысетӥ юанэз: «Папа, что купил?» Соин ик котьку но магазин пыр бертыны тыршисько…
Пичи Пурга ёросысь Баграш-Бигра гуртысь Настя Ботникова:
– Пидылы кин сыӵе ним малпаз?

– Пи луоз шуыса ми азьло ик тодӥськом ни вал. Матвей, Владислав но Мирон нимъёсты кельшытӥмы, но пӧлысьтызы кудзэ ке огзэ бырйыны нокызьы но ӧм быгатэ. Пимы 3-тӥ толшоре вордскиз, мынам со тужгес но «пӧсь» вакытэ. Со нуналэ мон эфирын ужай, собере Настяез нылпи ваён юртэ нуи но ачим Играе кошки. Дискотека дыръя со мыным жингыртэ, пимы, пе, вордскиз. Мукет нуналаз нылпи ваён юртэ лыктыса, со пичи комокез адӟи, киям кутӥ но валай, та Мирон шуыса. Со ним ачиз лякиськиз кадь со борды.
Ангелина Владимирова:
– Вордскем гуртад бертӥськод ке, кызьы пумитало тонэ анай-атаед?

– Анай-атаймы понна со бадӟым праздник, шергес удалтэ угось бертылыны – дыр, жаляса верано, уг окмы. Шутэтскон нуналъёсы «Эктоникаен» ужаны потоно. Толэзьлы одӥг пол ке но тыршиськом бертаны. Бертэммылы быдэ анай пыжиське, атай мунчо эстэ. Нунокенызы вешасько, кузьымъёс окто, саламъёс сьӧрамы келяло…
Алнаш ёросысь Писэйгуртысь Лилиана Михайлова:
– Туала реперъёсын тунсыкъяськиськод-а?

– Кинлы ке но соослэн кырӟанъёссы ярало, дыр. Мон монна соослэн ужзы – одӥг нуналъем хайп. Реперъёслэн кырӟанъёссы сюлэмысь потӥсесь ӧвӧл, тросгес коньдон поттон но «кизилияськон» понна, дыр, соос ужало.
Учком, кызьы меда героймы йырвизьзэ бергатыны быгатэ…
Полина Осипова:
– Пӧйшурлы пӧрмытскыны быгатысалыд ке, кыӵе пӧйшур кариськысалыд?

– Ӧрӟи луысал! Вылӥетӥ, лыз инбаметӥ, эркын лобась ӧрӟилы пӧрмытскысал. Одӥг интыын пукыны уг яратӥськы, кытчы ке но мыныны, выллань но выллань лобӟыны тыршисько!
Вика Максимова, УдГУ-ын дышетскись:
– Дас вить ар талэсь азьло «капсула времени» лэсьтысалыд ке, мар отчы понысалыд?

– Аслым ачим салам келясал, сыӵе арбериосты, кудъёсыз улонэлэн ог вакытаз вуылыны, сюлэмме шунтӥсь учыръёсты тодэ вайыны юрттысалзы.
Ангелина Владимирова:
– Зарни чорыгез кутысалыд ке, мар солэсь курысалыд?

– Шудбур курысал но сое калыклы кузьмасал – та улонын вань адямиос шудоесь мед луысалзы!
– Вань-а улон сюрес кузя вамышъяны юрттӥсь девизэд?
– Мон шуысал: нокыӵе шуг-секытъёс шоры учкытэк, азьлань мыноно. Уродысь котьку но маке но ӟечсэ шедьтоно. Нырез ошыны уг яра. Уг пӧрмы, усиськод ке, султоно но азьлань мыноно!
Ух, трос-а выльзэ тодӥды героймы сярысь? Нош ми интыямы ум сылӥське, ӝоген рубрикамы туж «бадӟым» адямилэн ӧсаз йыгаськоз. Кин меда со – тододы кӧня ке улыса. Нош таяз радэ Пётр Пушкинлэн кинюртэменыз блокнотмес утӥз Вика Максимова. Ӟечкыласьком!

Светлана Еремина.

Добавить комментарий

Ваш e-mail не будет опубликован. Обязательные поля помечены *