Гуртэ вуылэмзэс уз вунэтэ

Ижкарысь 57-тӥ школа удмурт кылэз дышетӥсь но кадет классъёсыныз куд-ог дышетсконниослэсь висъяське. Пӧртэм ужъёсын вормонъёссы сярысь но ӵемысь кылыны луэ. Тани туэ гужем нылпиослы школаын шутэтскон лагерь радъян понна соос «Планета ЗОЖ» нимаськись проектэнызы «Ижевские каникулы» нимо гранд утӥзы. Лагерь 17—28-тӥ инвожое радъяськиз. Отын 5— 8-тӥ классъёсын дышетскись нылъёс но пиос шутэтскизы. Проектлэн авторез — воспитательной ужъя директорлэн воштӥсез Гаванна Вениаминовна Феоктистова. «Планета ЗОЖ» лагерьлэн начальникез но со ик вал, нош юрттӥсез — социальный педагог Максим Борисович Королёв. Смена куспын пиналъёс пӧртэм интыосы вуылӥзы. Ижкарысь медакадемиысь анатомияя музее, КFC-лэн фастфудъёсты лэсьтонъя музеяз. Нош тужгес вунонтэм кылиз, дыр, пиналъёс понна Дэри ёросысь Шаберды школае вуылэмзы. Отын угось бадӟым ужрад ортчиз. Со квест шудонэн кутскиз. Кык школаосысь люкаськем командаос пӧртэм станциос пыр потӥзы. Соос тӧдьы халатъёсын пумитасьёслэн тазалыко улонэн герӟаськем юанъёссылы валэктонъёс утчазы, куронъёссэс быдэсъязы. Собере комической футболэн шудӥзы, серекъязы. 57-тӥ школаысь дышетскисьёс шаберды пиналъёс понна урокъёс вискын шутэтскон сярысь мастер-классъёс радъязы. Пиналъёслэн та тунсыко пумиськонзы эшлыко дискотекаен, тылскемен, ческыт ӝукен но пыштурынэн парем чаен йылпумъяськиз.

Алеся ГЛАВАТСКИХ.

Добавить комментарий

Ваш e-mail не будет опубликован. Обязательные поля помечены *