Вӧлдэтозь тэтчатэм… «Ӵушъял»

Ар талэсь азьло Алнаш ёросысь Кузебаево школаысь газетмылы матысь эш шедьтӥм. «Редакциын ужасьёс вуылэм бере, «Ӟечбур!»-ен эшъяськыны мылкыды лӧптӥз, – кыкетӥзэ пумиськыкумы мылкыдзэ усьтӥз 6-тӥ классын дышетскись Владислав Никонов. – Азьвыл ик кылбурасько ни вал ке но, лябытэсь малпаса, гожъямъёсме нокинлы ӧй возьматъя. «Ӵушъял» кылбуре «Ӟечбур!»-ын потэм бере малпанъёсы воштӥськизы. Кылбурме газетысь адӟыса, вӧлдэтозь тэтчай».
Озьы бурдъяськыса Владислав ог дасо кылбур пӧрмытэм ини. Кылбуръёсызлы темаос, пе, куддыръя кык нунал но бырйыны выре, нош куддыръя чуръёсыз туж ӝог вордӥсько. Ӵужаез В.И. Савина но мылкыдзэ бурдъя, со угось ачиз но кылбуръёс гожъя. Кулэ дыръяз Валентина Ильинична Владиклэсь чуръёссэ волятэ. Пияшлэн анаез М.Я. Никонова – удмурт кылъя но литературая дышетӥсь. Соин ик Владиклэн быгатонлыкъёсызлы паймонэз ӧвӧл, солэн со выжыезъя.

Дышетсконын но пияш азьмынӥсь, спортэн но эшъяське. Ваньмаз вуттӥськыны тыршемез сярысь ачиз вера: «Куд-ог дыръя туж жадьыса, иземе потыса бертӥсько. Но валасько: гуртэ ужез одно ик быдэстоно. Асме вормисько но уж борды кутскисько. Кык аресъем выны вань. Мӧзмеменыз, лэся, бертэме бере со но котырам мерскыны кутске, шудэмез потэ. Мон сое яратӥсько, соин ик солы но дыр висъяме потэ. Ярослав ним но солы мон малпай».

Нош «ку но кызьы шутэтскиськод?» юанэлы Владик вераз:
«Суредаськыны яратӥсько, тӥни соку ик шутэтскисько. Толалтэ куасэн нискыласько. Гужем чорыгасько, губиясько. Пичигес дыръям шур дуре огнаме уг лэзьяло вал, соин ик анайме сьӧрам ӧтчалляй. Табере огнам ветлӥсько. Одӥг пол тыметысь бадӟым карп поттӥ, лескае чигиське ни вал. Нош губияны ке мынӥсько, коньыгубиос асьсэос син азям возьматӥсько кадь. Капчи мылкыдын инкуазе потоно. Соку ваньмыз сюре – чорыг но, губи но».

Владиклэсь пушкысьтыз бугыръяськыса потӥсь малпан-веранъёссэ кылзыса, азьланяз со сярысь одно ик ӟечен кылом на шуыса малпай.

Алеся ГЛАВАТСКИХ.

Добавить комментарий

Ваш e-mail не будет опубликован. Обязательные поля помечены *