Маша, Миша но Выль ар

Шудӥсь муртъёс:
Маша.
Тол бабай.
Лымы ныл.
Гондыр (Миша).
Нуись.
Пиналъёс.
Нуись пиналъёсты актовой залэ ӧте.
НУИСЬ. Ӟечбуресь, эшъёс! Туннэ асьме доры куное вуоз Маша. Мур лымыетӥ гушъяса со асьме доры лыктытозь асьмеос ваньмы ӵош кыз котыр султом, кырӟалом но эктом. Тӥ соглаш-а?
«Тик-так», «Кабы не было зимы…» кырӟанъёсты быдэсто. Собере «Раз морозною зимой» кырӟан гуръя залэ Гондыр пыре, кунулаз кыз вае, нырулаз маке кырӟа. Пиналъёсыз адӟыса пайме.
ГОНДЫР.
Ӟечбуресь, пиналъёс!
Выль армы тани лыктоз.
Кыз вайисько мешокын,
Дӥсяло шудонъёсын.
(Гондыр кыззэ пукон вылэ пуктэ, вылаз шудонъёс ошылыны кутске. Машалэн куараез кылӥське.)
МАША. Ми-ша-а-а-а! Тон кы-ты-ы-ын?! (Гондыр кышкаменыз кытчы пырыны уг тоды ни, шудонъёсын коробказэ басьтэ но пегӟе, кыз йылэ понон кизили коробка пыдэстӥ усьыса кыле. Залэ Маша пыре.)
МАША. Тон кытын, Миша? Чимаса шудӥськод шат? Толон гинэ шудӥм вал ук ай! Ӟечбуресь, эшъёс! Тӥ Гондырез ӧд-а пумиталэ? (Пиналъёс йырзэс шонало.) Эх!.. (Маша лулӟылэ.)
МАША (пукон вылысь кызэз адӟе). Ой, кыӵе чебер кыз! Таиз нош мар та? (Кизилиез выж вылысь ӝутэ.) Непорядок! Кызьы кыз кизилитэк луоз? Тупатоно! (Маша кыз йылэ сузьтӥське, но кизилиез интыяны уг пӧрмыты – кыз Машалэсь ӝутытгес. Акыльтэмез бере кыз котыртӥ берганы ӧдъя, каллен кырӟа.)
МАША. Нюлэскы ми ветлыса, вож кызэз… Мар бен карим вал?.. Кызьы ай?.. Лушкам! Ӧвӧл, озьы ӧй вал… Пӧям? Ӧвӧл, нокинэ ми ӧм пӧялэ кадь… Вож кызэз вайим. Зэм! Лымызэ ми курткыса, коркамы пыртӥм… Ой, ярам. (Дугдэ но кыз шоры учкыса сылэ.) Эх, кулэ ик вылэм та кизилиез кыз йылэ поныны… (Мукет пукон басьтыса тубе, кизилиез поныны нош ик курадӟе. Шӧдтэк шорысь кыз выж вылэ усе но тӥяське.) Ай-яй-яй! Мар мон дауртӥ! Умойтэм!.. (Залэ бызьыса Гондыр пыре, выж вылысь кыззэ адӟе.)
ГОНДЫР. Мар та таӵе? Кызьы табере Выль арез пумиталомы?
МАША. Ой, Миша, вождэ эн вай! Ойдо нюлэскысь мукетсэ ӵогыса ваём!
ГОНДЫР. Уг, уг яра! Асьмеос браконьеръёс шат? Нюлэс – мынам вордскем доре.
МАША. Нош кызьы бен табере кызтэк?
ГОНДЫР. Ойдо нюлэскы мыном но отысь кызэз чеберъялом.
МАША. Тӥ, эшъёс, соглаш-а? (Берытско но чебер кызэз синйылто.)
МАША. Миша, Миша, учкы, кыӵе чебер кыз сылэ! Чеберъяллям но ини! Ойдо эктом!
«Лэсьты Маша кадь» шудон. Маша «Вперёд четыре шага» но «Мы повесим шарики» кырӟанъёсъя пиналъёслы пӧртэм выросъёс возьматэ, нылпиос соосты бќрсяз быдэсъяло.
МАША. Ваньмыз умой кадь, но мар ке но уг тырмы… Мар меда?.. А-а, тодӥ! Асьмелэн праздникамы Тол бабаен Лымы ныл уг тырмо! Нош кытын соос? Непорядок! Эшъёс, асьмелы одно ик Тол бабаез ӧтёно! Ойдолэ сое ӧтём: Тол бабай, ау-у-у! (Нылпиос џош ќтё. Тол бабай пыре.)
ТОЛ БАБАЙ. Ӟечбуресь, ӟечбуресь! Татын-а монэ куное витё? Выль арен, пиналъёс! Ой, (кызыны кутске) черласько-а, мар-а мон?..
МАША. Ой, Тол бабай, кызьы бен тон табере Выль арез пумиталод? Сылэ ай, мон али ик вуо! (Бызьыса кошке. Кема ик дыр уг ортчы, вуэ. Кияз – аптечка, йыраз – эмъясьлэн такъяез, вылаз – тӧдьы халат.) Дасяськы, Тол бабай, тонэ али ик йӧнатом. Та-а-ак… (Маша аптечкаяз бугыръяське но отысь бадӟым шприц поттэ.) Миша, вай ай мыным пукон! (Гондыр Маша шоры син ултӥз учке но, киоссэ кусказ тырыса, пельпумзэ ӝутыса пуконлы кошке.)
МАША. Пуксьы, Тол бабай!
ТОЛ БАБАЙ. Тау, Маши, сюлмаськемедлы!
МАША. Шып ул, Тол бабай! Тынад ньылоныд висе! (Тол бабайлы градусник сётэ.)
НУИСЬ. Пиналъёс, ойдолэ Тол бабаез шулдыртом. Оло, соку шаплыгес йӧналоз!
Пиналъёс «Нюлэскы ми ветлыса…», «Пяточка-носочек» кырњанъёсты кырњало, нош Маша Тол Бабаез кампетэн йӧнатыны выре.
ГОНДЫР. Кыӵе ни ай Тол бабайлэн тазалыкез, Маша?
МАША. Туж урод! Выль ар уз луы!
НУИСЬ. Кызьы озьы, Маша? Нош ми мар каром?
МАША. Йӧнамзэ возьмано луоз.
НУИСЬ. Выль арез пумитатэк кельтыны уг яра! Яке али, яке ноку! Пиналъёслэн мылкыдзы куашкалоз. Мар ке но малпано!
МАША (малпаське). Та-а-ак… О, мон малпай! Али ик лыкто… (Бызьыса кошке но Тол бабайлэсь дӥсьсэ вае.) Тани, Миша, дӥся!
ГОНДЫР (мылыз потытэк). Яралоз-а, мар-а ни…
МАША. Ой, Миша, кыӵе мынэ тыныд та дћсь!
ГОНДЫР. Уд пӧяськы-а?
ТОЛ БАБАЙ. Юртты ик вал, Миша, пересь висисьлы. Кызьы Выль ар Тол бабайтэк ортчоз? Нош тынад тӥни юрттӥсед но вӧзад (Маша шоры возьматэ).
МАША. Ух-ты! Мон табере юрттӥсь! Миша, кылӥд-а, мон табере Тол бабайлэн юрттӥсез! Али ик вуо! (Нош ик бызьыса кошке но Лымы ныллэсь костюмзэ дӥсяса вуэ.) Миша, асьмеос табере Тол бабаен Лымы ныл! Ойдо пумиталом Выль арез!
ГОНДЫР. Яралоз-а, мар-а ни, иське… Вай, Тол бабай, саламъёсын мешоктэ…
МАША. Тол бабай, нош кытын бен кузьымъёсын мешокед?
ТОЛ БАБАЙ. Э-эх, пересь йыр, кельтӥськем ук!
ГОНДЫР. Маша, ойдо Тол бабайлэсь мешоксэ ваём. (Машаен Гондыр кошко.)
НУИСЬ. Нош асьмелэн праздникмы азьланьтӥське! Тол бабай, тон яратӥськод-а мадиськонъ-ёсыз? (Нуись Тол бабай но Лымы ныл сярысь мадиськонъёс лыдӟе.)
«Российский Дед Мороз» кырӟан чузъяське. Нош собере залэ Лымы ныл пыре но Тол бабай шоры паймыса учке.
ЛЫМЫ НЫЛ. Мар луиз, песятай?
ТОЛ БАБАЙ. Висьыны уси тани…
ЛЫМЫ НЫЛ. Адӟид-а? Мон верай вал, кезьыт куазен чорыганы эн ветлы шуыса!
ТОЛ БАБАЙ. Ой, нылы, яратӥсько угось чорыганы! Оло, дорамы бертомы? Отын гинэ йӧнатско ни…
ЛЫМЫ НЫЛ. Тол бабай, нош пиналъёс? Мар карозы соос тонтэк? Кузьымтэк кылёзы ук! Озьы уг яра, Тол бабай! Мон тодӥ, мар кароно! Ойдолэ ваньмы ӵош кыз котыре султомы, кырӟаломы-эктомы, шудомы, серектомы! Тол Бабай шулдыръяськыны яратэ. Кин тодэ, оло, соку ӝоггес но йӧналоз. Ваньмыз ваче ки кутӥськыса кыз котыре султо.
«Джингл белс», «Арам зам-зам», «Мои ручки хороши» кырӟанъёс чузъясько. Залэ Гондырен Маша пыро, Гондырлэн тыбыраз саламъёсын мешок.
МАША. Так-так-так! Кытын ай милям висисьмы? (Тол бабаез утча.)
МАШАЕН ГОНДЫР (паймыса). Тол бабай, тон воксё йӧнамед ни, лэся, ук!
ТОЛ БАБАЙ. Бен, бен, пиналъёс но тон, Маша, юрттӥды. Тау тӥледлы! Таӵе шулдыръяськонэ мон туж кемалась ӧй вуылы ни вал. Мыным татын туж кельшиз! Кызмы но тани улэп кадь адскыны кутскиз, милемын џош шулдыръяське, кожалод…
МАША. Так-так-так! Кызды нош малы ке уг пишты ук! Кызьы сотэк?
ЛЫМЫ НЫЛ. Шонер вераськод, Маша! Нош кызьы сое югдытоно? Ми ум тодӥське.
МАША (киыныз шоналтэ). Эх, тӥ! Тазьы верано:
Ог-огмылы серектом,
Чебер кызмес югдытом!
(Ваньмыз Маша сьӧры верало.)
«Ёлочка» кырњанэз быдэсто. Выль арен герӟаськем ӟуч но удмурт эктонъёсты экто.
ТОЛ БАБАЙ. Тау тӥледлы, эшъёс! Нош мыным кошкыны дыр вуиз.
ЛЫМЫ НЫЛ. Тол бабай, пиналъёс тыныд кылбуръёс дасяллям, кылзы на, саламъёстэ но люкылыны эн вунэты!
ТОЛ БАБАЙ. Ой, нылы, ӧжыт гинэ ӧй вунэты, тау верамедлы! Саламен мешокме но тани вуттӥзы. Шумпотыса кылзо кылбуръёстэс! (Нылпиос дасям кылбуръёссэс лыдӟо. Маша, Гондыр но Лымы ныл саламъёсты люкылыны юртто.)
ТОЛ БАБАЙ но ЛЫМЫ НЫЛ. Выль арен, эшъёс! Выль шудбурен! Вуонояз арын одно ик вуо на тӥ доры куное. Ӟеч луэ!

Дасяз О.В. Иванова,
Кузёбай нылпи садысь визьнодась.
Алнаш ёрос.

Добавить комментарий

Ваш e-mail не будет опубликован. Обязательные поля помечены *