Кылбураса данъя, суредаса возьматэ сӥзьылэз

Завьял ёросысь Пальники гуртысь Л.А. Яковлева (удмурт кылъя дышетӥсь вал со) мур но ненег сюлэмо адями, потӥз мыным. Нырысьсэ пумиським ке но, кемалась эшъёс кадь люкиським соин. Бакча сиёнъёс, пӧйшуръёс, сяськаос, инкуазь, мусо пиналъёсыз-дышетскисьёсыз, яратоно кузпалыз Сергей Геннадьевич но трос мукетыз сярысь кема кенешим. Но мар сярысь гинэ вераськыны ӧм кутскылэ, бӧрысь асьмеос но шӧдытэк инкуазь вылэ выжылӥм. Бусыостӥ, возь вылъёстӥ, нюлэсъёстӥ поръяса, Любовь Афанасьевна сюлэмзэ буйгатэ, аслыз выль кужым басьтэ. Собере гуртаз бертэ но мылысь-кыдысь ужаны — гожъяськыны, суредаськыны — кутске. Вань сюлэм шунытсэ поныса кылдытэм чуръёсыз пельёсты лэйкато:
Мыным кельше зоро сӥзьыл,
Куке инмез возъя пилем.
Куке тонъя мӧзме сюлэм,
Йыгаськыны кутске каньыл.
Куке инмысь зор шапыкъёс
Усё каллен, йӧтско бамам,
Тӥни соку ӟеч малпанъёс
Кылдо, бугыръясько сюлмам.
…Учкисько, келясько сӥзьылэз,
Шаян тӧл позыръя сюлэмез,
Тон эн дырты вал кошкыны,
Лулпушме ас сьӧрад нуыны.
Л.А. Яковлевалы тужгес кельше сӥзьыл. Сое со кылбуръёсаз но данъя, мукет ужъ-ёсаз но возьматэ. Корка пушкысьтызы борддоръёссэс чеберъясь суредъёс вылысь но арлэсь та вакытсэ адњыны луэ. Соос мынэсьтым синъёсме кыскизы. Пайми, соосты Любовь Афанасьевна ачиз суредам. Нош кыӵе чебересь туспуктэмъёс рамкаосы интыяса ошылэмын! Ваньмыз соос Пальники палъёсын лэсьтэмын. Нырысь-валысь соос нокыџе ик уг пото кадь. Кемагес учкиськод ке, сюлэм бугырскымон, синкыли пызьырамон удмурт шаермы соос пыр усьтћське!
Мар борды гинэ уг кутскы, ваньзэ дыртытэк, малпаськыса лэсьтэ Любовь Афанасьевна.

Галина Широбокова.

Добавить комментарий

Ваш e-mail не будет опубликован. Обязательные поля помечены *