Учкисько но, «Королева Елизавета» бӧрдэ

«Лиза, Лизонька» шуыса вазьыло солы тросэз, нош мынам анае «Королева Елизавета» шуэ. Шуныт гужем нуналъёсы со угось дэремезлы тупась шляпаосын ветлыны яратэ. Льӧль дэремен ке, льӧль шляпа йыраз изьыя, чагыр-лыз ке, сыџе ик буёло шляпа понэ. Мемиез ачиз вуре, соин ик дэремез но, шляпаез но сомында.
Мон али вынылэн эшез сярысь верасько. Кыкназы но нылпи садысь одӥг группае ветло. Лизонькамылэн йырсиез кельыт-кельыт. Шунды-мумы солы џыжытсэ сётэм, мед, пе, шундыныл кадь ветлоз. Ымныраз но пытьыоссэ кельтыны вунэтымтэ. Лиза туж чебер вераське, кепыранэз чик уг тоды.
Одӥг нуналэ азбарысенымы пичи муртлэсь бӧрдэмзэ кылӥ. Капка азе потӥ но адӟисько: школа азьын (коркамы школа дорын сылэ), Королева Елизавета бӧрдэ. Мон куалектӥ.
– Лиза, мар луиз? – кеськыса юасько.
– Пыдесме вӧсь кари! – бӧрдыса вераз нылаш.
Корка пыраса, бинт, йод басьтӥ но бызьыса дораз мынӥ. Пыдзэ эскери, шуккиськем интызэ йодэн зырай, бинялляй – буйгатӥ кадь. Озьы ке но пичи Лизалэн пыд вылаз лёгиськемез ӧз луы. Соин ик ки вылам ӝутыса дораз нуи. Вӧзаз эшез вал, со но юрттӥськиз – Лизалэсь самокатсэ нуиз. Мукет нуналаз Лиза пыд вылаз вал ини, укно уламы лыктэм но черекъя:
– Настя! Настя!
Капка азе потӥ.
– Настя, бадӟым тау юрттэмед понна! Тани тыныд кузьым, – мыняса шорам учкиз но шоколадзэ мыным сётӥз нылаш. Но соку ик йылтӥз: «Нош эшъёсын шори люконо». Мар карод на. Дорамы пыртӥ но асьмелэн канфетэнымы кунояй.
Озьы тӥни пичи эшелы луыса малпамтэ шорысь волонтёр но луи, салам но сии.

Настя СМИРНОВА.
Чем-Куюк школа.
Алнаш ёрос.

Добавить комментарий

Ваш e-mail не будет опубликован. Обязательные поля помечены *