Жадизы ке но пыдъёс, кылдӥзы, оло, бурдъёс…


Иворто «Егит гожъясьчи» кружоке ветлӥсьёс. Кивалтӥсьсы – Л.Г. Широбокова.

Походэ туннэ ветлӥм,
Кужыммес ми эскерим,
Бызьылыса, тэтчаса,
Тымет вамен потаса…
Собере лэсьтӥм тылскем.
Картошмы ческыт пыжем.
Сиськимы, чай юимы,
Шудӥмы но кырӟамы…
Жадизы ке но пыдъёс,
Кылдӥзы, оло, бурдъёс:
Ӝог вуимы гуртамы,
Анай-атай юртамы.

Юлия ПОПОВА, 5-тӥ класс.


Школаямы витёнтэм шорысь Китайысь куно, Бяо Сюй, вуылӥз. Шэньчжэнь карын улӥсь воргоронлэн тодмоосыныз В.Г. Шутовен, Г.Н. Пчельниковаен но Ӟозлуд-Каксяысь эшъёсыныз адњиськемез потэм. Егит ужбергатӥсьлэн Москваын чаен вуз карись магазинъёсыз, пе, вань. Куномы улэм-вылэмез сярысь вераз. Верамысьтыз тодӥм, кышноез но пичи нылыз вань, соослэсь туж мӧзме шуыса. Со Читаысь пединститутын дышетскем, ӟуч кылъя но литературая дышетӥсь луыны малпаса (туж чебер вераське ӟуч кылын). Но Китайын, пе, ӟуч кылын герњаськем удысъёс ќвќл. Озьы ке но тодмомы мылкыдзэ уг куашкаты, котьмаин тунсыкъяське. Коридор кузя вамышъякуз, пиналъёс гыж! гинэ сьӧраз ветлӥзы. Туж тунсыко адскиз. Ма, осконтэм кадь: кызьы, пе, зэмос китай адями милям школамы кузя ветлоз. Вожъяськыса кылизы нылпиос, угось милям 8-тӥ классмы азьын гинэ со вераськиз. Бяо Сюй милемлы «Катюшаез» китай кылын кырӟаз. Нош ми сое ик ӟуч кылын быдэстӥм, собере удмурт кырӟан-эктонъёсмес возьматӥм. Макем яраз солы ми дорын! Кошкон азяз куномес ми доска вылэ китай кылын маке гожтыны курим… «Ӟечбуресь, пиналъёс», «Ӧтиськом но возьмаськом тӥледыз Китайын», «Мон тонэ яратӥсько» – гожтӥз со.

Вика МЕНЬШИКОВА, 8-тӥ класс.


Одӥгаз куарусёнэ ми быдэс школаен Васькино гурт доры походэ ветлӥм. Милемын ӵош ужрадэ пыриськизы Ӟозлуд школаысь пиналъёс. Соосын ми скаут раллиосъя ӵошатским. Сое дышетӥсьёс ортчытӥзы, нош кивалтӥз туж мыло-кыдо, вазиськись организатор А.В. Полянкина. Мон соин вазенгес эшъяськи ни, «Скауткемп» лагерын кык пол шутэтски угось. Лагерьын тросэзлы дышеменым ик, дыр, скаут раллиос секыт ӧз потэ. Ми быдэс классэнымы ӵош ужаны тыршим, ог-огмылы юрттӥм.
Та выллем ужрадъёсын дышетскыны мылкыд но ӝутӥське, эшъяськиськом но. Туж шумпотӥськом, дышетӥсьёсмы но отчы пырисько ке.

Даша САДОВНИКОВА, 7-тӥ класс.


Кырӟаса-чирдыса ортчиз, шуыны луоз гужеме. Но мон понна туж пайдаё но тунсыко со вал. Инвожое ми пичи сузэреным Ижкарысь апаймы дорын кунояським. Кинотеатре, парке вуылӥм, тымет дуртӥ поръям. Анайлэн пичи сузэрезлэн пиеныз но утиським.
Та толэзе ик мон магазинын, анае дорын, выж миськи. Макем шумпотӥ, нырысетӥ уждунме басьтыса! Инвожолэн пумаз эшъёсыным егитъёслэн «Эру» фестивалязы пыриським, со Шаркан ёросын, Тол бабайлэн усадьбаяз, ортчиз. Петуньки, Зар-Вишур гуртъёсы вуылӥм. Озьы мыным нырысетӥзэ та чебер но аспӧртэмлыко интыосы ветлыны кылдӥз. Пӧртэм ӵошатсконъёсы пыриськыса, ми, ньыль нылъёс но ньыль пиос, жадёнэз но валатэк, уез но кӧлытэк, кыкетӥ нуналаз но шулдыръяським на.
Вунонтэм кылиз «Шундыкар». Куинетћзэ вуылћ отчы. Азьвыл шутэтскыкум тодматскем эшъёсыным пумиськеме потэмен, быдэс ар возьмай сое. Дас нунал шутэтски, гужемлэн берпуметӥ нуналаз гинэ бертӥ. Ӵуказеяз школае вамыштӥ, нош мылкыды, лулы лагерьын на вал…

Маша САДОВНИКОВА, 9-тӥ класс.


Инвожо толэзьлэн нырысетӥ нуналаз поезд милемыз «Орлёноке» нуиз.
Ой, кыӵе кельшиз мыным лагерьын! Пӧсьсэ жалясьтэм шунды, чылкыт мур зарезь, трос выль эшъёс, пумтэм-йылтэм ӵошатсконъёс, выль тодон-валанъёс – ваньмыз вал. «Орлёнокын» радъям туристическо-краеведческой сменаын ми гурезьёс йылэ тубам, ориентированиен вырим, походэ кык пол ветлӥм. Одӥг полаз палаткаосын куинь нунал ӵоже улӥм. Тыбырамы пӧртэм сиёнъёсын но арбериосын тырмытэм рюкзакъёсын гурезь йылъёсы тубамы, одӥгезлэн ӝуждалаез 850 метр вал. Егитэсь, шаплыесь вожатойёсмы нош кќня вожвылъяськонъёс дасяллям милемлы! «Бадӟым карта» ӵошатсконын но быгатонлыкмес эскерим, кунмы сярысь тросгес тодӥм, кылбур лыдӟим, кырӟам-эктӥм. Смена пумын радъям контрольно-туристической маршрутын эмтодосъя, туризмъя, спортъя, шаертодонъя, географияя, экологияя басьтэм тодон-валанъёсмес эскеризы. Милям отрядмы (Удмуртиысь нылпиос трос вал пӧламы) нырысетӥ инты басьтӥз. Данъяськисько!

Даша ЗАЙЦЕВА, 9-тӥ  класс.


Походэ мынон нуналэз чидатэк возьмай. Ӵукна вазь ик рюкзакам тыриськи но школае дыртӥ. Отын эшъёсы пумитазы. Ваньзылэн мылкыдзы бурдъяськемын вал. Тани милемыз огинэ люказы, ваньзэ валэктӥзы. Дышетӥсьёсмы ӟеч мылкыд но вормонъёс сӥзизы.
Куазь но удалтӥз — шундыё, шуныт нунал тупаз. Вӧл-вӧл бусые вуэммы бере, бадӟым эшъёсмы валэктӥзы, кызьы ортчоно созэ яке тазэ могњетэз. Кылсярысь, «Восьмёркаын» кык поглянъёс пыр потыны быгатоно вал, «Болотоын» – кор кузя тыметлэн мукет ярдураз, «сыръясь интые» усьытэк… Ваньмыз туж тунсыко вал. Ваньзэ чаляк быдэстћм. Ми бызьылыса пќртэм заданиосты быдэсъятозь, дышетӥсьёсмы тылскизы. Отын картошка пыжимы, собере пӧсь чаен, кокрокен кунояськимы…

Софья ФЁДОРОВА, 7-тӥ класс.
Гурезь-Пудга школа. Вавож ёрос.

Добавить комментарий

Ваш e-mail не будет опубликован. Обязательные поля помечены *