Мед пыласькозы, но – чакласькыса!

Гажано анай-атайёс!
Пӧсь нуналъёсы нылпиосты шур дурысь улляны секыт. Шуныт вуын жомбылляськонлэсь ма умоез вань на меда 25–32 градус дыръя? Но, жаляса верано луэ, котькытын ик пыласькыны чаклам нимысьтыз интыос ӧвӧл, соин ик пиналъёстэс ас кожазы вуэ пыремлэсь алэ, вӧзазы асьсэлэсь бадӟымгес но умой уяны быгатӥсьёс мед луозы, марысь-мар ке, соку ик юрттыны мед быгатозы. Шаерысьтымы шуръёсын но тыметъёсын угось таяз гужем луэм шудтэм учыръёс одӥг гинэ ӧй вал ни. Шуръёсын ву бергась интыос пумиськыло, нылпи отчы шедиз ке, юрттӥсьтэк потыны курадӟоз, кужымез бырыса, ву улэ но кошкыны кема ӧвӧл. Нош тыметъёсын мур но лазег интыос, пыдэсазы сисьмем писпуос, жуг-жаг луыны быгато. Соин ик туж чакласьконо, шулдыр гужем кӧшкемыт кайгу медаз вайы.

Нош тӥ, пиналъёс, «мон бадӟым ни» шуыса, анай-атайдылэсь юаськытэк шур дуре мыныны эн дыртэ. Дыраз ӧд берытске ке, мед тодозы кытысь утчаны. Озьы ик, пыласькемысь бертыса, эшъёсыныды ӵош кытчы ке шудыны эн кошке, нырысь одно ик дорады возьматске – тӥ шур дурысь вуэмын ни шуыса мед тодозы.

Добавить комментарий

Ваш e-mail не будет опубликован. Обязательные поля помечены *