Валя милемыз туж витем

Татариысь Ошторма-Юмья школае вуылыкумы, пичи мугоро нылашез синйылтӥмы. Милемыз, «ӟечбуръёсты», туж витем шуыса адӟиське: кык кырӟан дасям. Одӥгзэ кырӟанзэ, мунёзэ кияз лэйкатыса ик, туж мусо быдэстӥз. Валя 2-тӥ классэз туэ йылпумъяз. «Классамы ми Кириллэн кык кузя дышетскиськом, – ачиз но эшез сярысь веранзэ кутскиз нылаш. – Ог-огмылы юрттӥськом. Мон Кириллы тросгес валэктӥсько, алякъяськыны кутске ке, даллашисько но. Дышетӥсьёсмес Серафима Степановнаез но Ангелина Пантелеевнаез мон туж яратӥсько».

Туж быгатыса кырӟаз бере, семьяязы кырӟасьёссы вань-а меда шуыса тодэме потӥз. «Семьямы милям бадӟым, ми, пиналъёс ик, ньыль кузя: Диана, Дима, мон но пичи Евамы. Атае, интернетысь шедьтыса, пӧртэм кырӟанъёсты кылзӥськыны яратэ, ӵемысь соин ӵош коркан кырӟаськом но эктӥськом. Нош песятае мон кадь ик кырӟась вылэм. Кырӟам сяна, мон суредаськыны яратӥсько.

Вуонояз дышетскон арын, урокъёс бере, Кирилл сямен ик Кукморе ветлыса, художественной школаын дышетскысал, нош со крезьгуръя школаын тодон-валан люка, – веранзэ азьланьтэ нылаш. – «Ньыльёслы» но «витьёслы» мед дышетско шуыса, мон гужем но лыдӟиськисько, гожъяськисько. Анаелы но юрттӥськыны уг вунэтӥськы: пастуханы ветлӥсько, Ева сузэрме возьмасько, сиён пӧраны юрттӥсько. Туж яратӥсько салатъёс лэсьтыны но сиыны».
Валялэн туж аспӧртэм нимо коӵышез вань – Валямяу. Песятаез солы сыӵе ним сётэм. Нылаш со сярысь выжыкыл но гожтэм. Соин тодматскоды азьланяз потоно номерын.

Алеся ГЛАВАТСКИХ.

Добавить комментарий

Ваш e-mail не будет опубликован. Обязательные поля помечены *