Шулдыр мылкыдлы – Данёгуртэ

Дэбес ёросысь Данёгурт кузя машинаен ӵем ортчылӥсько, куд-ог дыръя магазиназы пырасько, гурт калыкен вераськылӥсько. Со угось дор палъёсам нуись сюрес вылам шеде. Шумпотӥсько, татын удмурт кыл возиське на шуыса. Гуртъёс ӵемысь школа ванен возисько, но татын со пытсаськемын, нылпиос бускель Тыловай гуртэ ветло. Кызьы шуо гуртоос, сьӧрлось школае кошкыса, нылпиоссы ӟучомо. Нош данёгуртъёслэн азьвыл школа юртазы библиотека но клуб усьтэмын. Калык ӵем люкаськылэ отчы. Татын угось лулысь-сюлмысь тыршись, калыкез огинэ люканы быгатӥсь адямиос ужало. Пӧлысьтызы одӥгез – библиотекарь А.А. Хохрякова – пӧртэм ужрадъёс ортчытъя, удмуртлыкез утёнлы бадӟым саклык висъя. Пичиез но бадӟымез, лыдӟиськыны яратӥсьтэмез но библиотекае ӵуштыр гинэ кыстӥсько. Гуртын пиналъёс трос ӧвӧл ке но, соосын со ас кылдытэм проектъёсызъя бадӟым ужъёсты бергатыны быгатэ. Гужемлы быдэ шудон площадказы ужа. Гуртазы пукись песяйёс понна библиотекарен «Купанча» ансамбль кылдытэмын. Пересьёс кырӟаны, вераны, кытӥяз кӧтӝожзэс ог-огзылы вераны люкаськыло, ог-огзылэсь мылкыдъёссэс ӝуто.

Данъяськымон, 2016-тӥ арын библиотеказы «Устоез нылпи библиотека» элькун конкурсын вормем. Та вормонозь вуон понна, трос аръёс ӵоже бадӟым ужез бергатоно луэм Антонида Алексеевна.

Клубын ужасьёс но трос пӧртэм ужрадъёс ортчытъяло. Людмила Валентиновнаен Антонида Алексеевна Хохряковаос соослы ӵош дасясько. Одӥг ансамбль гинэ уг улы та пичи юртын. Людмила Валентиновна гуртысь егитъёс понна асэныз кылдытэм «Шулдыр мылкыд» ансамблен кивалтэ. Отчы ветлӥсьёс пӧртэм удысъёсын ужало, тросэзлэн пичи нылпиоссы вань. Озьы ке но, гурт котырысьтызы ужъёссэс лэсьтэмзы бере, ӝытъёсы шумпотыса люкасько. Нылпиоссы но сьӧразы ветло. «Ай эшшо кырӟаны милесьтым азьпал дӥсяськыса клубе дырто, репетиция нуналъёсты чидатэк витё», – верало ансамбле ветлӥсьёс.

«Ужын жадёно, – шуэ Татьяна Ситникова, – нош нылкышноосын ӵош кырӟаськом, эктӥськом, серекъяськом но – жадёнмы быре. Мон бускель гуртысь ке но, машинаез нуллыны быгатӥсько бере, ӝыт пуксьыса, «шулдыр мылкыд» дуре ширтӥсько. Людмила Валентиновна туж валаса быръе репертуар, соин ик клубе туж мыло-кыдо ветлӥсько».

Та коллективын ик «Таня но Маня» дуэт кылдэм ини. Нылкышноос кыксы ик пӧрасьёс, Татьяна Лопатина нылпи садын ужа, нош Ольга Максимова – гурт столовойын. Сцена вылын соос аспалъёссэс серекъято.

Озьыен, калыкен ужаны быгатӥсь, тыршись адямиоссы Данёгуртын вань. Соослы луыса ик возиське но пушъе Данёгурт, палэнысь адямиосты но аслыз синмаськытэ.

Алеся ГЛАВАТСКИХ.

 

Добавить комментарий

Ваш e-mail не будет опубликован. Обязательные поля помечены *