Ӟечбур, КЫШКАСЬТЭМ ожгарчи!

Тыныд гожтэ Виктория. Мон данъяськисько удмурт луэменым, шумпотӥсько, Россиын вордӥськи но улӥсько шуыса. Кытын меда, асьме шаерамы сярысь, шулдыргес? Кытын меда инкуазь чебергес? Чагыр инбам, яркыт шунды, луд вылысь турлы сяськаос, тылобурдо гуръёс, нылпиослэн серекъям куараоссы – ваньмыз со милям вань, тынад ми сярысь сюлмаськеменыд. Тодӥсько, тон но куке мон сямен будӥд, дуннелэн чеберезлы шумпотӥд. Вазь ӵукна сайкаса, кезьыт ошмес вуэн пыласькылӥд, анай-атаеныд ӵош гурт котырысь ужъёсты быдэсъяд. Егит дырыд вуыса, сюлэмад пушйиз яратон: шунды пуксьыку, шобрет улэ ӧд дыртылы – яратоно нылаштэ китӥз кутыса юмшад вож садын, луд вылын, шур дурын. Куке но туж шудо тон вал.

1941-тӥ арын 22-тӥ инвожое малпамтэ шорысь кӧшкемыт война гудыртӥз. Кема ик дыр ӧз ортчы, тонэ но фронтэ басьтӥзы. Тон, али гинэ улонэз валаны кутскем егит пияш, кияд пыӵал кутыса, кышкатэк атыкай музъеммес утьыны кошкид. Мынам син азям ӵемысь таӵе суред пуксьылэ: киязы автоматъёсын немец солдатъёс, танкъёс вылэ пуксьыса, шаерысьтымы сюресъёс кузя дынгыр мыно… Соку ик азязы султэ асьме солдат. «Кытчы тон?! Мар дауртӥськод?! Али ик кошкы! Ыбозы! Ыбозы! Ыбозы! Кошкы, уз жалялэ!» – кесяськисько, киыным шонасько. Нош со монэ уг кылы… Кӧня солдатъёс озьы быризы, атыкай музъеммы понна улонзэс сётӥзы. Нош кӧня егитъёслэн яратонзы уретӥськиз! Тон астэ жаляны ӧд валалля. Йырад одӥг малпан улӥз: тушмонэз ӝоггес улляно но анайдэ, матысь адямиостэ, эшъёстэ, яратондэ ӟыгыртоно. Бӧрысь нош соослы югыт улон лэсьтыны сюлмаськоно. Куинь ар кыстӥськиз война, кызьы меда чидад? Паймисько мон тӥляд, солдатъёслэн, кужымдылы.

Пыдъёстэк но, киостэк но армимы Гитлерез пырак Берлинозь улляз. Синвуосме уг ватӥськы. Но со шумпотон синвуос курытэсь. Малы Гитлер сыӵе ваменэс? Малы виылӥз асьме калыкмес? Адями сыӵе луыны быгатэ шат? Нош со ке вормысал, кызьы меда азинскысал улонмы туннэ? Луысалзы меда дунне вылын анае, атае, ӵыжы-выжыосы но мон? Туж бадӟым тау шуисько тыныд, ожгарчи! Тон атае ӧвӧл ке но, таӵе шулдыр улон мыным кузьмад! Ноку уг вунэты тонэ: гажало, ярато, йыбыртто. Тани матэктэ Вормон нунал. Мон одно ик дорад вуо, пыд улад горд сяська поно, чалмытак гинэ вӧзад сыло. Котьку тодам возё.
Нош али йылпумъясько гожтэтме.
Ӟеч лу! Кӧл ни, гажано ожгарчи.

Гажаса но яратыса,
Вика МАКСИМОВА.
Бадӟым Пурга школа.
Игра ёрос.

Добавить комментарий

Ваш e-mail не будет опубликован. Обязательные поля помечены *