Тау, ӵужатае!

Ӵужанае дорын куноякум,  туспуктэмъёсын альбом шедьтӥ. Йӧно воргоронлэн туспуктэмез син шорам йӧтӥз.  Мӧля вылаз орденъёс, медальёс. Со ӵужанаелэн атаез  И.П. Федотов вылэм.
Школаямы котькуд ар «Бессмертный полк» акция ортче бере,  мынам но пересь ӵужатаелэсь туспуктэмзэ возьматэме  потӥз. Но нырысь, киям кутыса, соин вераськи:
– Ӟечбур, пересь ӵужатае! Кӧня ке вера вал война сярысь.
– 1941-тӥ  ар, 22-тћ июнь.  Та шулдыр нуналэ ваньмыз вал: бер-пуметӥ вальс, сюлме пырись кырӟанъёс, институтэ пырон пумысен малпаськонъёс… Нош ӵуказеяз секыт  ивор кылӥськиз: война кутскем. Нырысетӥ яратон, семья, институт  сярысь  чебересь малпанъёс огкутскемен воштӥськизы. Ми эшъёсыным военкоматэ вамыштӥм. «Повестка гуртады вуоз», – шуизы но милемыз дорамы бертыны косӥзы. Уйёсме изьылытэк повестка возьмай, угось туж юн потэ вал вордӥськем шаермес утеме. Но монэ  Пирогово  школае келязы.
–  Нош малы школае?
– Мон, нылы, дышетсконын азьветлӥсь вал. Соин ик 1–3-тӥ классъ-ёсты дышетыны куризы. Дышетӥсь луэме потэ вал, но война люкетӥз.
– Нош ку тонэ войнае басьтӥзы?
– 1942-тӥ арын  монэ фронтэ келязы. Сталинградэз тушмонлэсь утён нокызьы но йырысьтым уг кошкы. Со вакытэ туж секытэсь ожъёс мынӥзы.
– Нош малы тынад пельыд секытэн кылэ? – юай мон солэсь.
– Бомбаос усьылыку,  пыды сӧсырмиз но контузить кариз – пельы кылэмысь дугдӥз. Кисловодскын эмъяськеме бере,  гуртам келязы, сӧсыр кыли уго. Бертэме бере выльысен вераськыны дышетски. Пельы секытэн но шуген вераськеменым,  школаын ужаны ӧй быгаты ни.
– Семьяед нош ку кылдӥз?
— 1946-тӥ арын кузпалъяськи,  вить  нылпи будэтӥ.  Ваньзы вылӥ тодон-валан басьтӥзы. Кыкез нылъёсы дышетӥсьёс луизы, мынэсьтым малпанме быдэстӥзы.
– Тау тыныд, пересь ӵужатае, милемыз утемед, чылкыт инбам кузьмамед понна!
Жаляса верано, ӵужатае 70 аресаз улонысь кошкиз. Но солэсь подвигъёссэ ми ноку но ум вунэтэ. Пересь ӵужатаеным данъяськыса, туэ но мон «Бессмертный полк» акцие пыриськисько.
Юля ЧЕТКАРЕВА, 5-тӥ класс.
Изгурт школа, Завьял ёрос.

Добавить комментарий

Ваш e-mail не будет опубликован. Обязательные поля помечены *