Архив за месяц: Апрель 2018

Вормонъёсыз бурдъяло

Зюзино черкогуртысь Софья Кожевникова школае мыло-кыдо ветлэ, отын уго синмаськымон дышетӥсьёс ужало.

Кылсярысь, Ираида Александровналэн урокъёсыз сяна, Софьялы литературно-творческой кружокез но туж яра. Отын пиналъёс нырысетӥ чуръёссэс кылдыто, экскурсиосы потало. Витетӥ классын дышетскись дыдылы Гопгуртэ ветлэмзы вунонтэм кылем.

Нылаш теннисэн, волейболэн эшъяське, бызьылэ. Ассэ ёрос ӵошатсконъёсын возьматэм ини. 3-тӥ инты басьтэмез сое выль вормонъёсы бурдъя.

Эльвира СИМАКОВА.

Софья Кожевникова

Шаркан ёрос.

Кичабонъёс кузьманы лыктӥмы

Воткинскысь «Юбилейной» культура юртэ удмурт кырӟанъёсты яратӥсьёс люкаськыло. Пиналъёс но пӧлазы ичи ӧвӧл. «Жингырты, удмурт кырӟан» концертэ Карина Набиеваен Алина Артемьева туэ нырысьсэ лыктӥллям.

Нылъёс 1-тӥ номеро школаын 5-тӥ классын дышетско. Та школаын удмурт кыллы дышетэ Л.А. Иванова, «Элькуновидение — 2017» вожвылъяськонын одӥгез вормись (лыдӟисьёсмес соин 1-тћ номерын тодматъям ни).

«Любовь Александровналэсь кырӟамзэ кылзӥськыны лыктӥмы, – шуо нылъёс. – Милемыз уг дышеты ке но, ми сое гажаськом, переменаосы дораз вуылӥськом. Со туж лякыт сямо, визьмо, мылкыдэз ӝутыны быгатӥсь дышетӥсь, соин ик ми со борды кыстӥськиськом, «Изба-читальня» нимаськись кабинетаз пыраськом. Отын туж тунсыкоесь, песянайёслэн корка пушказ кадесь, вашкала арбериосыз вань.

«Ӟечбур!» газетъёс но отын лач тыремын. Котькуд мылкыд карись сое учкыны, лыдӟыны быгатэ. Тодӥськом, Любовь Александровна милемыз котьку но шуныт пумиталоз, ӟеч кыл вералоз, кулэ дыръя буйгатоз.

Соин ик концертэ ми лыктӥм солэсь чебер кырӟамзэ кылзыны но кичабонъёс кузьманы».

Алеся Главатских.