Терроризмлы пумит нюръяськонъя Россия Федерациын 2013–2018 аръёслы чаклам комплексной планэз  улонэ пыӵатыса, кышкытлыклэсь утиськонъя  «Спас-Экстрим» нылпи портал кылдытэмын: (http://www.spas-extreme.ru/). 

Мар гинэ лэсьтыны уг луы вылэм кукуруз палочкаослэсь: рафаэлло, чак-чак, рулет, торт «Кузьыли кар»…
«Ням-ням» конкурсэ трос гинэ рецептъёс вуизы. Пиналъёс ужзэс редакцие лэземзылэсь азьло, сиёнзэс лэсьтыса утчаллям, туспуктэмъёссэс но ыстӥллям. Ижкарысь Кузебай Герд нимо гимназиын дышетскись Дарина БАЙСАРОВА кукуруз палочкаослэсь чак-чак лэсьтыны дэмла, отын ик дышетскись сузэр-вынъёс Ксюша но Кирилл КАЛАШНИКОВЪЁС «Чиньыдэ ньылод» торт, кузятэмлэсь десерт пӧраллям. Рафаэлло лэсьтыны дэмлало Шаркан ёросысь Карсашур школаысь Наташа ДЕНИСОВА, Пичи Пурга ёросысь Вуж Монья школаысь Альбина ДМИТРИЕВА, Кез ёросысь Александрово школаысь Степан МАРКОВ, Завьял ёросысь Изгурт школаысь Полина АЛЕКСАНДРОВА. Нош 11 номеро школаын дышетскись Настя МИХАЙЛОВА «Кузьыли кар» торт малпам, та школаысь ик Настя АШПАЛАТОВА — рулет. Ческыт десерт лэсьтыны дэмлало Ижкарысь Яна МАТВЕЕВА но Завьял ёросысь Шор Постол школаысь Ваня КАБАНОВ, кукуруз пог ӵекто Кез ёросысь Александрово школаысь Лия но Трофим АШИХМИНЪЁС.
Конкурс вань конкурс, отын котькудаз вормись луэ, таяз учыре удалтӥз Дарина Байсаровалы. Со аспӧртэмгес сиён дэмлам, туспуктэмъёс но лэсьтэм. Озьыен, кукуруз палочкаосын пуйыез сётӥськом Дариналы. Мукетъёсыз пиналъёс сертификат но синпель кузьым басьтозы.
«Мон – кукуруз палочка» номинацие тунсыко выжыкылъёс вуизы. Пичи Пурга ёросысь Баграш-Бигра гуртысь Катя ИВАНОВА (выжыкылэзлы суред лэсьтэм эшез Юля ПЕТРОВА), Завьял ёросысь Изгурт школаысь Данил ТОТОЕВ но Катя ЭРКИШЕВА выжыкылъёсазы лэчыт веранъёсты но пыртӥллям. Кузебай Герд нимо гимназиын дышетскисьёслэн Даша ФЁДОРОВАЛЭН, Кирилл КАЛАШНИКОВЛЭН кукуруз палочкаоссы асьсэлы эш утчало, Завьял ёросысь Шор Постол школаысь Яна СИМАКОВАЛЭН Стёпка кукурузаез дуннеез котыръяны ветлэ.
Лыдӟисьёсмылы анайёссы но юрттӥллям. Тани Завьял ёросысь Выль Казьмас школаысь Арина ЗАМАРАЕВА но Ижкарысь Катюша РОДИОНОВА выжыкылзэс анайёсынызы ӵош гожтӥллям. Катялэн но анаезлэн выжыкылэнызы но суредэнызы 13-тӥ номерын тодматскиды ни. Катя тужгес пичиез пыриськисьмы бере, солы «18 кенгуру» нылпи студие сертификат сётӥськом. Пичи Пурга ёросысь Шорын Юри школаысь та номинациын вормисе потэм Анюта ОСИПОВА кукуруз палочкаосын пуйыез утӥз. Татарстанысь Балтаси ёросысь Улын Ушма покчиёзо школаысь Лена АНТОНОВА 2-тӥ интые потӥз. 3-тӥ интыез утӥз Кузебай Герд нимо гимназиын дышетскись Ксюша ПУШКАРЕВА. Лена но Ксюша басьтозы Данъян грамота но синпель кузьым. Конкурсэ вань пыриськемъёс электронной почтаысьтызы шедьтозы электронной сертификат.
Конкурсэ вуэм ужъёс азьланяз печатласькозы на.

Котькуд тулыс ми атаеным бурдоосты пумитаны дасяськиськом. Шырчикъёслэсь вуэмзэс тужгес но возьмаськом. Соос уго шулдыр кырӟанэнызы котыр улосэз сайкато, мылкыдэз лӧпкыто. Тани туэ ми ньыль шырчик уморто лэсьтӥм. Огзэ «коркамес» школа азбаре ошим. Проектме мамаеным дасям. Эшъёсылы кылзыны мӧзмыт медаз луы шуыса, сое вакчигес гожтыны тыршим, туспуктэмъёс пуктылӥм. Проект лэсьтонъям ачим но трос тунсыкозэ тодӥ. Шырчик умортоосты нырысьсэ ошылыны кутскиллям Пётр I кивалтон дыръя. Европаетӥ ветлыкуз, cо та паймымон «коркаосты» синйылтэм. Ӟеч сям Россиын улӥсьёслы но пыӵам.
Шырчикъёс адямиослы бадӟым юрттэт сёто (шырчикъёслэн пиоссы вить нунал куспын 1000 майской бӧчыосты, озьы ик туж трос нымы-кибыосты сиыны быгато).
Умортоме классэ вайи но, эшъёсы котыртӥз кема бергазы. Зынъяса но утчазы. Ческыт выль пул зын классэ вӧлдӥськиз. Урокъёс бере атае лыктӥз. Кузь тубат ваем. Дышетӥсе монэ асме ик писпуэз бырйыны косӥз. Милям школа азбарамы беризьёс но кызьпуос трос, улмопуос, палэзьпуос но вань. Мон кыр азьынгес будӥсь веськрес кызьпуэз бырйи. Быдэс классэн потӥм. Папае умортоез кызьпу борды юнматэ, ми тубатэз возиськом, нош Любовь Евгеньевнамы мылкыдмес ӝутэ, туспуктылэ. Куазь но туж шулдыр тупаз. Одӥг потэмен кырын шудӥм на.

Гриша ГАЛЕЕВ.
Варзи-Ятчи школа.
Алнаш ёрос.

Татарстанысь пиналъёс удмурт кылъя одимпиадаын арлы быдэ ӟеч тодон-валанзэс возьмато. Туэ но быгатонлыкъёсынызы шумпоттӥзы.
«Ижкаре мон нырысьсэ вуи, соин ик туж пайми Удмуртилэн шоркарезлы, мон малпамъя, со туж чебер, – мылкыдзэ усьтэ 9-тӥ классъёс пӧлын нырысетӥ инты басьтӥсь Юля Исанькина. – Ми, дыр шедьтыса, Шор площадез учкыны ветлӥм. Отын йӧлэсь аспӧртэмлыко выжыкыл лэсьтэмын вал. Кукмор ёросысьтымы мынам сыӵеоссэ адӟеме ӧвӧл, соин ик выль чеберлыкез усьтэмелы туж шумпотӥ. Озьы ик Свято-Михайловской черке пырамы. Татын но мон туж пайми. Со сыӵе чебер! Котыраз йӧлэсь лэсьтэм кылчинъёс. Черке пыраме ноку ӧй вал, соин ик нырысь кышкасагес вамыштӥ, нош потыкум шӧдӥ, кызьы мугорылы но лулылы капчи луиз. Олимпиадаын вормыны но мыным Инмар юрттӥз, дыр. Валамон ини, ачид ӧд ке тыршы, вормонъёс басьтыны секыт. Со понна мон уй но нунал тыршӥ чеберлыко произведениосты лыдӟи, гожъясьёслэн улон сюресэнызы тодматски, кылбуръёсты но мукет произведиосты эскерылӥ. Визь-кенеш сётӥсе но котьку вӧзам вал. Со Шор Кумор школаысьтымы удмурт кылъя но литературая дышетӥсе – Мария Ислановна Юркеева. Матысь адямиосылэн оскемзы но мыным кужым сётӥз. Мон бырйи удмурт литератураез. Сётэм юанъёс туж тунсыкоесь, малпаськытӥсесь вал. Та нырысетӥез таӵе бадӟым вормонэ. Мукет ёрос, элькун вожвылъяськонъёсын вормонъёсы вань ке но, таиз мон понна тужгес дуноез.
Олимпиадаосы пыриськон трос выль эшъёсын, тунсыко адямиосын пумиськон кузьма.
Кылсярысь, ёросысьтымы ик Нижняя Русь школаысь Наташа Ивановаен ми Татарстанын ортчем удмурт кылъя но литературая элькун олимпиадаын тодматскимы, отысен ик эшъяськонмы кутскиз. Малпасько, кусыпъёсмы азьланяз эшшо но юнмалозы».
Наташа Иванова но дунъясьёсты ӟеч тодон-валанъёсыныз шумпоттӥз. «Ижкар мыным туж чебер но шулдыр потӥз, — вера со. – Кузебай Герд нимо гимназиын милемыз умой пумитазы. Вуоно арын но аслам элькунам нырысетӥ инты басьтыса, Ижкаре мыныны малпасько.
Мон туж яратӥсько лыдӟиськыны. Ӟуч классикъёс пӧлысь Н.В. Гогольлэн произведениосыз ярало, соос шулдыр мылкыд кельто, нош удмурт писательёс пӧлысь тужгес но яратӥсько Кедра Митрейлэсь гожъямъёссэ, соос туж мур пуштросъемесь. Удмурт кылын сяна, мон мукет предметъёсын но районамы олимпиадаосы ветлӥсько, отын но вормисе потылӥсько.
Ваньмон дыръям мон «киросэн» пужыятскисько. Талы милемыз технология урокъёсын дышетӥзы».

Антонида ЕРМОЛИНА.